Yee, Bibila misamu miamingi ditâka misongelaka ti Nzambi kô kena. Beto dilombaka mu tunga timinu tieto mu Nzambi, ka kwikila ko kwa kwa mpamba ntiana butâka mabundu makaka, bu tukwe sariri “ngindu” na “mayela” meto. (Bisi-Rome 12:1; 1 Za 5:20, note) Tala mabanza ma sikamanaka mu Bibila:

•   Nza ye kô ye na bunkete, mpe na luzingu lusongelaka ti Mvangi ye kô. Bibila ditêle: “Diangana, muna nzo na titungi tiandi, kâ titungi tia bima biabiansoni, ni Nzambi.” (Bahebre 3:4) Ni bu sa ti mabanza mo ma fioti mena, bantu ba mayela babingi bamonaka ti ngolo mena. a

•   Beto bantu nsatu yi butukaka neto ya bakula nsasa na kani dia luzingu. Nsatu yo die ntiana lemina ditatamanaka bu tulungisaka nsatu zeto za tinsuni. Bibila musamu ni wo ditâka, bu dizonzelaka “nsatu za timpeve,” mwe na nsatu ya zaba na ya sarila Nzambi. (Matie 5:3; Nzabukusu 4:11) Nsatu zo za timpeve ni tidimbu tisongelaka ti Nzambi kô kena; kâ zisongele mpe ti Mvangi ye kô yituzololo, mpe yizololo ti talungisa zo.​—Matie 4:4.

•   Bibila mbikululu dizonzelaka zi batsoneka tûka mvula zazingi, mpe zalungana buna bu batêla zo. Butieleka na ndungananu ya mbikululu zo bisongele ti Nzambi ye kô yiyôkele bantu.​—2 Piere 1:21.

•   Bitsoniki bia Bibila luzabu lwa sianse lwa bâ nawu lwayôka lwa ngwala zawu. Mu tifwani, mu ntama, babingi beri banzaka ti Mutoto wa sikama weri ha zulu tibulu. (mpakasa, ngombe, ngulu, . . .) Bibila ditêle ti Nzambi “ka sikamasaka mutoto ha zulu tima ko.” (Yobe 26:7) Mpila mosi mpe, Bibila mpila yi bayirikila mutoto ditomo zonzelaka bu ditâka ti die ntiana “tinzongoloko (cercle).” (Izaya 40:22, note; Bîbila kia Kintuâri) Bantu babingi babanzaka ti musamu wa nkatika wa delakana ni banza ti luzabu lwawu kwe Nzambi lwatâka.

•   Bibila biyuvu biabingi bia mpasi dihaninaka mvutu. Tala ti ka bahanini’â bio mvutu ko, bilendi nata muntu mu banza ti Nzambi kena kô ko. Mu tifwani: Tala ti Nzambi Nkwa luzolo na Nkwa Ngolo Zazansoni, mu bungu dia nti kwe mpasi na mbi? Mu bungu dia nti mabundu matuminaka bantu mu yirika mbi kani basarila mbote?​—Tite 1:16.