Yee. Nzambi bisari biandi bia mbevo kabelokelaka lwaka. Mu bungu dia wumosi mu bawu, mu Bibila tutangaka ti : “Yehova mbo kamubakisa ku mfulu’andi ya timbevo.” (Mikunga 41:3) Tala ti timbevo tie naku tilembo wasaka, mabanza ma matatu mata landa malendi ku bakisa:

1.   Sambila mu baka ngolo za tindila. Mbo baka “tidzunu tia Nzambi tiyôkele mabanza mamansoni,” tilendi katula lwaka lwaku ntono timbevo.​—Bisi-Filipe 4:6, 7.

2.   Bâ na mabanza ma mbote. Bibila ditêle ti: “Mutima wa yangalala tilongo tia mbote tiena, kâ mabanza ma bunôkena ngolo mamanisaka.” (Bingana 17:22) Vulu sehesaka na bantu. Tuseho mbo tuhana mutsamina mu bilumbu biaku bia buyongongo, mpe bubote bwena mu bungu dia tikola.

3.   Kurisa tivuvu mu bungu dia bilumbu bita kwiza. Tivuvu tia ngolo tilendi ku bakisa mu bâ mu nsayi ntono timbevo tilembo wasaka. (Bisi-Rome 12:12) Bibila ditâka ti ntangu yibâ kô “Ka kubâ muntu ko wuzingaka mu nsi wutâ ti: ‘Timbevo tie nani.’” (Izaya 33:24) Buna, Nzambi mbo kawasisa bimbevo biabiansoni bi balembo bukaka bwawu bu ku lupitalu. Mu tifwani, muntu wa nuna mbo vutu bâ ntwenia ye na tikolela tia mbote: “Bika musunia’andi wabâ wa mbote yôka mu buntwenia bwandi; bika kavutu bâ ntiana mu bilumbu bia buntwenia bwandi.”​—Yobe 33:25.

 Note: Ni bu sa ti lukwikulu lwe nawu ti Nzambi nkatika lubakusu kahanaka, Mbangi za Yehova traitements za badoktere basarilaka mu buka bimbevo bilembo wasaka. (Marke 2:17) Buna, kabasolaka traitements ko mu bungu dia bantu bakaka. Muna muntu wufweti bonga nzengolo.