Mu lumbu tia 23 mars 2020, ku mumvuka wu batâka nkumbu Khabarovsk ku Russie, bamilitere ba FSB(Federal Security Services) ka bamona tiari ko mu bungu ti, baye tsala nzo ya mpangi Igor Avramenko, bilumbu 6 ha manima ma lufwa lwandi. Bantu bô basongele kwe mpangi Avramenko (mukento wa sisiri mpangi Igor Avramenko) nswa wa dinga na wa mwangasa nzo yeri mu nkumbu ya mpangi yo yafwiri, kâ mpe basiri bonga ordinatere, caméra na bima biakaka bia mfunu bia mufwiri wo, Yelena.

Lumbu tio mu pari, mfumu za FSB zaye bonga mpangi ya yikento Avramenko ku tisalu tiandi, bamunata kwe Stanislav Grebenkin, muntu wuta tuma peleko wuta twarisa tisalu tio tia tsala, mpe muntu wo wamusongela nswa wa tsala. Mpangi Yelena Avramenko watâ kwe Grebenkin ti bakala diandi diafwiri. Grebenkin wamutêlele ti zebi ti mpangi Avramenko wafwiri, kâ fweti sala tisalu tia dinga na ti tsala mu bungu ti mu ntangu luyalu lwasari nswa wo ka lwatokolo’â zaba ko ti mpangi Avramenko wafwiri.

Muntu wo wuta kipa tisalu tia tsala, watâ kwe mpangi Yelena ti bamilitere mu zulu zulu kwa baketi kwe tari, wavutu tâ ti wafwanakana basala tisalu tio ngatu “bakulu manisa musamu wo mpe bahana mikanda ku archives [FSB].” kâ, bamilitere batomo tsala kwakwingi nzo’andi.

Ku mumvuka wa Khabarovsk, mbangi za Yehova za 10 bakwikisiri ti misamu mia mbi bayirikaka peleko criminels zena. Ni bu sa ti bantu ba luyalu bayelele mu ngolo mu bwisa timinu ti mpangi zeto za ku Russie, tuzebi ti mpangi zeto “ngolo zawu mbo zibâ ti babâ ba dzuna mpe basongela lukwikulu” mu Yehova, Tata’eto dia luzolo.​—Izaya 30:15.