14 OCTOBRE 2021
RUSSIE

Mbangi za Yehova yôka 80 bazengele boloko na bweso bwa lembo dia kota—Ngano bwe?

WÂ MU

Tûka avril 2017, ku Russie bu yayimina bisalu bia Mbangi za Yehova, mpangi yôka 500 bakanga mpe bakwikisila bumpumbulu. Mbangi za Yehova 40 bazengele boloko mpe 15 bafutisi mbongo. Mbangi za Yehova 80 balendi mambu mpe babazengele boloko na bweso bwa lembo dia kota. Ni bu sa ti ka bena na nsatu ko mu kwenda ku boloko bwawu bu, nkatika titantu tiena mpe misamu miamingi tita tulumuna.

Tintwari na misiku mia ku Russie, mfundisi lenda die nandi dia zengela muntu boloko na bweso bwa lembo dia kota, kani ka kamuzengela boloko dia mpamba. Tala ti musamu ni bo wena, mfundisi mbo kakubika mpe ntangu yizingila mambu na misiku miakaka. Tala ti ka baziti’â misiku miango ko, tribinale yilendi zengela muntu boloko mu ntangu yi bamukubikiri.

Boloko na bweso bwa lembo dia kota, bwe diyôkelaka? Bwe Yehova kabakisilaka mpangi zeto mu musamu wo? Interview tasiri ya mpangi zakaka zi bazengele boloko na bweso bwa lembo dia kota dia mvula zole tii sambanu. Nkwamusu zawu na mpila ya ba bakisiri Yehova mu telamana musamu wo bata zonzela.

Igor Ivashin

Bateme: 1999

Mambu: Boloko dia mvula sambanu, na bweso bwa lembo dia kota

Mabanza mandi

Ntia nsobolo mambu mo maneti mu luzingu lwaku?

Mbala mosi mu ngonda, mfweti monekena mfumu yikipaka mpila ya sarila misiku mi bakungeni. Ka ndendi’â ndienda ku mahata na ku nsi zakaka ko, tala ti ka bakungeni’â nswa ko kwe mfumu yo, ni bu sa ti ni mu bungu dia tikolela tiani.

Mambu ma bakunzengele mabebese tindiku tiani na bantu ba kanda diani balembolo Mbangi za Yehova, balembo bakulaka mu bungu dia nti muntu wufweti mwina mpasi mu bungu dia dibundu.

Bwe kanda diaku diamwinini mpasi mu nzengolo yo, mpe nti dita sa mu tindila?

Bantu babansoni ba mu kanda bafwemene mu bungu tia musamu wo. Bimbevo bieto biayizi vutu bâ ngolo. Ka tulendiʼâ tadioka mfwemoso zo ko mu bungu ti tuzebi ti ntangu ni ntangu mambu mani balendi ma sobesa mu boloko.

Kâ, bu tataluzuri misamu miamiansoni, tayizi bâ na mabanza ma mbote mpe watutumini mu bakisa mpangi zakaka zita bwabwana na misamu mia mpila yi. Mu ntangu ya nsambululu ya kanda, mitu-diambu tutaluzulaka mitubambulaka mu bungu dia nti misamu mi mita tu tûrila mpe nti bialungane mu musamu wo: Timbangi tia mbote taheni ku tribinale, ku tisalu na mu mumvuka.

Ngano tusakumunu wabakiri tu walembolo kekolo mu bungu dia musamu’aku?

Tindiku tiani na Yehova tiatomono kula. Bu nimonaka bwe Yehova katwarisilaka misamu mi kuntûrilaka, wa nzitukulu wena. Musamu wo wakumbakisi mu mona koko kwa Yehova.

Vladimir Kulyasov

Bateme: 2010

Mambu: Boloko dia mvula zole, na bweso bwa lembo dia kota

Mabanza mandi

Ntia nkwamusu wabwabane na zo bu bakukwikisiri bumpumbulu?

Mu ngonda nana, bakundwika musanga mu kulu mu landa nzila zani. Nafweti zakalaka ku nzo tûka 22h00 tii 6h00 mpe ka nafweti’â dûka ku hata diani ko. Mu bungu dia bumpumbulu bu bakunkwikisila, musamu wa mpasi wabâ mu baka tisalu. Nayizi dinga tisalu mu mbuka zazingi, kâ bakundiyimina tio. Bantu babingi beri ku mfwilaka tiari, kâ bawu bakunsongela tii ka babâ na lenda ko dia kumbakisa, mu bungu ti mfumu zawu ka zeri’â tambullaka ko ti bakungana tisalu.

Bwe tindisilaka mpangi zaku za mweni mpasi mu bungu dia musamu wo?

Bu tuzonzelaka nkwamusu zeto, tusakumunu twa Yehova mpe tuzonzelaka. Bweso bwa tu hana Yehova tuzonzelaka—bweso bwa zangula nkumbu’andi—mpe na kula kwa timpeve na bifu bia mbote bi takurisi mu bungu dia musamu wo. Lukwikulu tubahanaka ti, ntono nkwamusu, ka tubika tima ko tiatukabakasa mu baka tusakumunu mu musamu wo.

Ngano tusakumunu wabakiri tu walembolo kekolo mu bungu dia musamu’aku?

Mpangi yimosi ya yikento yatâ ti mfumu’andi ya tisalu muntu wabâ nandi nsatu mu mu bakisa ku nzo. Tatomo sambila. Mfumu’andi yakuntambula ku tisalu, mu nzila kwa ya ndombolo ya mpangi yo. Nkatika lusakumunu lwabâ mu bungu dia beto! Mvutu yabâ ya lusambulu lweto. Na lubakusu lwa Tata’eto die ku zulu, nalongokele tisalu tia môna tia munkengi wa nzo. Yehova lendi tomo bakisa bisari biandi mu bâ buna bu kazololo babâ!

Denis Timoshin

Bateme: 1998

Mambu: Boloko dia mvula zole, na bweso bwa lembo dia kota

Mabanza mandi

Ntia nsobolo mambu mo maneti mu luzingu lwaku?

Bawu bakundwika musanga mu kulu mu kwe kuntaluzuri. Mpasi weri kunsaka mu kulu mpe nsoni [. . .] weri kumfwisaka, mu bungu ti musanga wango we ntiana musinga wu bakangaka mbwa. Ntiana’eti nitu’ani ka mvwiri’â yo ko.

Mbuka bakuntêla yi mfweti lembo katuka. Mbuka yango nzila kwa yena. Buna, ndendi bâ ku lweka lumosi lwa nzila, kâ ka mfweti’â nabâ ku lweka lwakaka ko. Appareils za bisalu bia ku nzo ni yirikaka mu bungu dia bantu, buna bu bakunganaka tisalu, mfweti sa mayela mu lembo bâ ku lweka lwakaka lwa nzila. Mfwemoso yena, mpe mpasi wena mu tâ kwe bantu ba nisarilaka mu bungu dia nti fweti nilembo sala kwe bantu bakaka.

Bwe saka mu telamana mfwemoso ya mambu ma boloko?

Yêla niyêlaka mu mona musamu’ani ntiana bweso bwa songela ti wa kwikama ndiena kwe Nzambi. Nzebi ti mabanza ma Yehova mu bungu dia meno ka matarilaka mabanza ma luyâlu ko mu bungu dia meno.

Mukento’ani na meno mbo tutomo dimbitilaka mu bweso bwe neto bwa sa ti nkumbu ya Yehova yabâ ya santu. Tamweni bwe Yehova katubakisiri mu tinsuni, mu timpeve na mu luzolo, mivu mi miamiansoni. Ka tayizi’â kondo tima ko, ni bu sa ti mvula mosi na ndambu nayôkese ku nzo [ntete bakunkwikisila mambu] mpe mukento’ani ka wulendi’â wasala ko mu bungu dia timbevo.

Luzingu lwa bô babazengele boloko dia na bweso bwa lembo dia kota lututumini mu vulu sambilaka, nsungula mu bungu dia bawu na makanda mawu. Binsamu biawu bisongele ti Yehova mvutu kahanaka mu tusambulu twa bisari biandi bia kwikama mu ntontolo zazansoni.—2 Bisi-Korente 1:3, 4.

NSANGU ZA MÔNA

Mbangi za Yehova yôka 80 bazengele boloko na bweso bwa lembo dia kota—Ngano bwe?

Kilari

Mbangi za Yehova yôka 80 bazengele boloko na bweso bwa lembo dia kota—Ngano bwe?

https://cms-imgp.jw-cdn.org/img/p/702021096/univ/art/702021096_univ_sqr_xl.jpg

Sola zu diaku

Tambika