Mu tilumbu tia vendredi 13 décembre 2019, tribinale ya tizunga tia Leninsky, ku Penza yayizi zengela mpangiéto Vladmir Alouchkine boloko dia mvula 6. Ho nkatika bendo, bayizi mu kanga mpe bamukotesa boloko. Bantu 5 bakaka, na mukento wa Vladmir, Tatyana, babâ mu musamu wo. Tribinale yabalendi mambu, muna muntu bamuzengele boloko dia mvula zole, kâ ka bakota boloko ko. Mpangi zeto 6 za ku Penza mbo bakwizi lomba ngatu musamu’awu bavutu wa taluzula.

Ntiana bu bateleke wo, Vladmir Alouchkine bayizi mu kanga mu tilumbu tia 15 juiIllet 2018, mu ntangu bapolisie 12 babâ na bima ku tidiri yi bakota ko nzo’andi. Polisie zango zayizi tsala nzo’andi heures 4, mpe bayizi wuka telefone, ordinatere, mabibila, na mikanda miakaka. Tilumbu tiango, bapolisie bayizi tsala mpe nzo za Mbangi za Yehova tanu (5), mpe, kampe mpangi 40 banata mu bayula misamu.

Mfumu za tizunga tiango balunda mpangi’eto Alouchkine mu boloko dimosi bilumbu biole, ntete tribinale ya tizunga tia Pervomayskiy ku Penza yamutambika ku boloko dimosi mu yôkesa ngonda zole. Tribinale ya tizunga tiango yayizi yika ngonda zole mu bilumbu bia keti bâ mpangi Vladmir Alouchkine ku boloko. Ha manima ma ngonda 6 ku boloko, bayizi mu kotesa nzo yimosi yi bazunga kwe bapolisie mpimpa na mwini, ni mûna kena tuka tilumbu ti bamuzengela boloko, tia 13 décembre.

Tintwari na mpangi’eto Alouchkine, mpangi zitatu ha kati dia mpangi tanu bayizi kwisila misamu mia mbi mu musamu kwa wo. Mpangi zango zeri Vladimir Kulyasov, Andrey Magliv na Denis Timoshin. Bawu mpe bayizi ba tûla mu nzo yeri kêlaka bapolisie mpimpa na mwini. Mpangi zeto zakaka za zikento,Tatyana Alouchkina na Galiya Olkhova, bayizi bayimina, tuka février 2019, mu zonzaka na bantu bakaka.

Mu ngonda ya août 2019, timvuka tia bisalu tia Nations Unis mu bungu dia boloko dilembolo dia delakana (WGAD) tiayizi dukisa mukanda wa binima 12 weri sembaka nsi ya Russie bu bayizi kotesa mpangi’eto Alouchkine ku boloko. Mu mabanza ma timvuka tiango, mpangi’eto Vladmir Alouchkine “ka bafweti’â mu kotesa ku boloko ko, mpe ka bafweti’â mu kanga ko tala ti ka batoko’â mu fundisa ko. Na kani mfundusu yimosi ka bayizi’â ya sa ko mu bungu dia Vladimir Alouchkine.” Avocats bu zanwanina mpangi zeto 6 za ku Penza, bayizi sikamasa nzonzolo’awu mu mabanza ma WGAD ma tambulaka nza yayansoni. Kâ, mu ntangu yi batanga nzengolo mu tilumbu tia 13 décembre, mfundisi watâ ti tribinale yayizi banza ti nzengolo ya Nzo ya Mfundusu ya Yinene ya ku Russie ya 2017​—yeri yiminaka nsambululu ya Mbangi za Yehova—​mabanza ma WGAD yidiataka

Bwawu bu, nsi ya Russie yayizi zengela mpangi 18 mambu, 9 ha kati diawu bayizi kota boloko dia mpila na mpila. Mpangi yôka 40 be ku boloko, mpe 19 ba bakangiri mu nzo kwe bapolisie. Ku nsi ya Russie yayansoni, mpangi 300 bayizi kwikisila misamu mia mbi mu bungu dia timinu tiawu. Ni bu sa ti tiari tie neto mu bungu dia nkwamusu zi bata bwabana na zo, ka tuta yituku ko mu misamu mita ba turila. Misamu mio mia batibikurila, na kani dia lubakusu lwa Yehova mu luzolo. Sambila tuta kwe sambiri ngatu ‘mpeve ya mukembo, yee, mpeve ya Nzambi, yabâ na bawu.’​—1 Piere 4:12-14.