Maud ekulamaga ku France nu mulimo wage uli wa kukasya bana beli bitunga mu nkungu zibeli ku likolo. Mu nkungu kishembe beigisibwa b’igisibwaga ku kabamba ka ma kambi za bakandwa ba Banazi, nu bwitaga basola Banazi b’ita Bayuda beingi. Mu kambi, bakandwa bavwalaga ma iniforme mabezaga na tulolesyo twidangi zatingana-tingana. Bwabezaga kalolesio kongo nu idangi zako u byalosyaga kabamba kakitile buno muntu abekwe mu kikando.

 Mwigisya atendile buno gatendelaga kalolesio k’idangi za violé kavwalaga bantu kishembe babezaga mu kikando, “Nizi buno bakandilwe kubuno bajamaga gamozi bakikulu ku bakikulu nu bamulume ku bamulume.” Gabede mwigisya asila kwigisya, Maud amubwide buno, Banazi bakambyaga kalolesio k’idangi za violé kwa kukasya kumenya Balongeki ba Yehowa. * Amulagile kumuvwela na kitabu kyatendela musagu wozo. Mwigisya itabizizye bwamubwinde Maud nu amusegile isulide beigisibwa musagu wongo.

 Mu ingo isomo mwigisya akambizye karte zabezaga na tulolesio twatingana-tingana twa vwalaga bantu babezaga mu kikando. Karte zezo zalosizye buno Balongeki ba Yehowa u babezaga na kalolesio k’idangi za violé. Gabede mwigisya asila kwigisya, Maud amubwide buno eke nkungu za kumwisulila misagu kishembe ku bubo. We nuwe itabizizye, nu akatile mpango kishembe buno Maud enwisulile beigisibwa bubo.

 Maud akundamanizye misagu z’en’isulide mu dakika 15 ku isomo lyenalingile kulyo, tondo galingile kwisula, mwigisya amubwide bunee: “Uli na saa imozi kwa kukita bubo.” Maud alingile kwakulosya video zalosyaga bwasungibwaga Balongeki ba Yehowa na Banazi. Gabende video zalosya buno Banazi b’ekile bana 800 ku babuti babo babezaga Balongeki ba Yehowa, Maud emanizye video nu kusanzulá misagu zatendelaga basatu gesamba bana bongo. Kusila kulosya video, Maud azindilizizye kwakusanzulá mukanda umozi wasanzilwe mu 1940 na munsuka umozi waku Autriche, Gerhard Steinacher wabezaga na miaka19. Asanzile wozo mukanda kwa kulaga babuti bage gabezaga ese bwigi kwitoa na Banazi. *

 Maud isulide bubo tondi kwisomo lyalembaga. Kyoza kyage, kyakasizye babo beigisya babili, nu gabekwigisyaga leno ku kabamba ka kambi za Banazi, tabekwidaga lingo kulosya buno Balongeki ba Yehowa babezaga gesamba bantu bakandwaga na Banazi.