Tukulembaga nunse bwatenda Biblia ku kabamba ka “Idia lya Mwigolo lya Mukota,” likumanwa lingo Idia Izinda aba Kakengelesio ka lukuo lwa Yesu. (1 Bakorinto 11:20; King James Version) Tondo, bukatizio nu bumba bwa mango madini tabwalemanina Biblia ku bubo.

 Inilo lya Idia lya Mwigolo lya Mukota lili kukengela Yesu, ukutenda buno kulosya lusimo ku kisansa kyakasanine ku kabamba keitu. (Matayo 20:28; 1 Bakorinto 11:24) Kukengela kwongo ta sakramenti aba bumba bw’idini butunakita kwakumona mponga aba kusigililwa bwagi bweitu. * Biblia bigisya buno tunasigililwa bwagi bweitu kwa kukatizia Yesu tondo ta kwakukita bumba kishembe bw’idini.​—Baroma 3:25; 1 Yoana 2:1, 2.

 Yesu akakizizye beigisibwa bage kukengela Idia lya Mwigolo lya Mukota, tondo, ntalosizye buno batungananine kukita bubo mambizi manga. (Luka 22:19) Bantu bamozi bekumonaga buno batunganana kukengela Idia lya Mwigolo lya Mukota na mwezi, bango n’izinga, na busi, nu bango mambizi meingi ku busi bumozi, aba mambizi meingi anga bwatunda muntu. * Tondo, lola bitondo byatunganana kukengela kubyo muntu.

 Yesu alingizye Idia lya Mwigolo lya Mukota ku kindi kyakitaga kukyo Bayuda Pasaka, nu kusila akule busi bubo. (Matayo 26:1, 2) Kubuno Masanzo ma Biblia malengemania kisansa kyakasanine Yesu na kyana kya mukoko kya Pasaka, ukinsa Yesu alingizye Idia lya Mwigolo lya Mukota ku kindi kya Pasaka. (1 Bakorinto 5:7, 8) Pasaka zakitwaga tugu limbizi limozi ku mwaka. (Kutuka 12:1-6; Balawi 23:5) Bulingilingi na bubo, Bakristo ba nkungu za basingwa bakitaga Kakengelesio ka lukuo lwa Yesu limbizi limozi ku mwaka. * Unubukukitaga Balongeki ba Yehowa kwa kulemba bubo bwatenda Biblia.

 Bubo bwakitile Yesu bwatukasya kumenya twatunganana kukita Kakengelesio mambizi manga, ku kindi kikizi nu mu nkungu nkizi. Yesu alingizye Kakengelesio mu nkungu za kugoba kwa musi ku kindi kya 14, mwezi wa Nisani mwaka wa 33 N.Z., bulingilingi na kalendari ka Bayuda ka nkungu zezo. (Matayo 26:18-20, 26) Tukwendelelaga kukita Kakengelesio ku kindi kikyo na mwaka kwakulemba bwakitaga Bakristo mu nkungu za basingwa. *

 Aba buno kindi kya 14, mwezi wa Nisani mwaka wa 33 N.Z. kyabezaga busi bw’itano, tondo idati lyongo linaba bungo busi buteli busi bw’itano kulembana na mwaka. Kuteli kulemba kalendari ka bino bindi ka Bayuda, tukumenyaga na mwaka buno kindi kya 14, mwezi wa Nisani kyabe busi kishembe, kwa kuganza bindi bulingilingi na bwaganzwaga bindi mu nkungu za Yesu. *

 Kwa kulingya Kakengelesio kongo, Yesu akambizye kampampa keteli na mugago nu divai zasigalaga gabalyaga Pasaka. (Matayo 26:26-28) Kwa kulemba musumo wage, tukukambyaga kampampa keteli na mugago aba ketasambikwa na bingo nu divai zakisimana, tondo tatukukambyaga mazi ma biguma aba divai z’iswa mmo bingo.

 Madini meingi mekukambyaga kampampa keli na mugago, tondo Biblia bikukambyaga mugago mambizi meingi kwakuzisusanizya na bwagi nu kubiga. (Luka 12:1; 1 Bakorinto 5:6-8; Bagalatia 5:7-9) Lebelebe kampampa keteli na mugago nu ketasambikwa na bingo u kasusanizya mubili wa Yesu ute na bwagi. (1 Petro 2:22) Kingo kitekwitabizibwa mu Biblia u kukambya mazi mato ma zabibu ku kiziki kya divai. Madini kishembe mekukitaga bubo bulingilingi na bumba bwabo butalingimana na Biblia bwa kutanua maku.​—1 Timoteo 5:23.

 Kampampa keteli na mugago nu divai zakisimana zikutingaga ku Kakengelesio, tuli tugu tulolesio twa mikila nu mubili wa Yesu. Tulolesio twongo tatukugalukaga mu nzila za miganogano nu kuba mikila nu mubili wa Yesu, anga bukukengelaga bango. Lola bwatenda Masanzo ma Biblia ku kabamba ka bubo.

•   Songo Yesu akakizizye basingwa bage kunua mikila zage, kasi enabigile mulembe wa Kalaga wa kutalia mikila. (Kulinga 9:4; Misako 15:28, 29) Lebelebe Yesu ntenakakizizye bango kubigya mulembe wa Kalaga ku kabamba ka mikila, kubuno zaswagibwa.​—Yoana 8:28, 29.

•   Songo basingwa banude lebelebe mikila za Yesu kasi ntenababwinde buno mikila zage za “kubuke,” bubo bwalosya buno abezaga nteikasana kuba kisansa.​—Matayo 26:28.

•   Yesu akasananine kisansa kyage “limbizi limozi tugu.” (Baebrania 9:25, 26) Songo kampampa nu divai byagalukaga mu nzila za miganogano nu kuba mubili nu mikila za Yesu mu nkungu Z’idia lya Mwigolo lya Mukota, babo baliaga kampampa nu kunua divai mu nkungu zezo benakitile kisansa kyage kikasanwe mambizi meingi.

•   Yesu atendile bunee: “Kitazi bubuno bumukankengelaga,” tondo ta “bumukankasanaga kuba kisansa.”​—1 Bakorinto 11:24.

 Babo bekukatiziaga buno kampampa nu divai bikugalukaga mu nzila za miganogano nu kuba mubili nu mikila za Yesu, bekutikyaga mamo makengelo mu Masanzo kishembe ma Biblia. Anga, bwisuzi bweingi bwa Biblia bwalosya buno Yesu atendile buno ku kabamba ka divai: “Zeno zili mikila zane.” (Matayo 26:28) Tondo bitondo bya Yesu bin’isulwa lingo bunee: “Zeno zasusania mikila zane,” “Zeno zili anga mikila zane,” aba “Zeno z’isulwa mikila zane.” * Yesu abezaga ekwigisya kutingila misumo anga bwakitaga mambizi meingi.​—Matayo 13:34, 35.

 Gekukitaga Balongeki ba Yehowa Idia lya Mwigolo lya Mukota, bakeke tugu kubo u bekulyaga kampampa nu kunua divai. Ku kabamba kakizi?

 Mikila za Yesu zakubukile zalingizye “idagano ito” lyekile kiziki ky’idagano lyakitile Kalaga na kilongo kya Baisraeli. (Baebrania 8:10-13) Babo beli mu idagano ito u bekulyaga kampampa nu kunua divai mu nkungu za Kakengelesio. Bubo bwalosya buno ta Bakristo bansania u bekulyaga kampampa nu kunua divai tondo “babo bamaninwe” tugu mu nzila za bwele-bwele na Kalaga. (Baebrania 9:15; Luka 22:20) Babo bantu u bek’angata gamozi na Yesu mwigulu, bantu 144.000 u bamonile bubo bukuti anga bwalosya Biblia.​—Luka 22:28-30; Kulolesibwa 5:9, 10; 14:1, 3.

 Bwatingana na “lusumba lukeke” lwa babo bamanilwe kwangata gamozi na Kristo, Beingi gatusamba tuli na kilemanizio kya kuba mu “musanganano munene” wa babo bekamona kalamo ka milyalya ga kisi. (Luka 12:32; Kulolesibwa 7:9, 10) Aba buno beiswe beli na kilemanizio kya kulama milyalya ga kisi tatukulyaga kampampa nu kunua divai mu nkungu za Kakengelesio, tukukundamanaga kwakulosya lusimo lweitu ku kisansa kyakasanine Yesu ku kabamba keitu.​—1 Yoana 2:2.