Makengelo meitu ku likolo malemanina kanuni za Biblia. Naa Mulongeki ekukambyaga kalenganio kage ka gomibwa na Biblia kwakumenya bulamuzi bwakate kulembana na zeno kanuni za Biblia zalemba. *

•  Likolo lili lya mutali

•  Bwatunganana kuba na makengelo masoga ku kabamba ka likolo

•  Kulemba nunse likolo kunabigya misako za muntu nu bwida bwage gamozi na Kalaga

•  Ndi balongeki ba Yehowa bekubezaga na mpango za meigisya ma Biblia ku bana?

 Likolo likukasyaga muntu ku “kokomezia menge nu bumenyinino,” milumbo za mutali nunse bulingilingi na Biblia. (Misumo 2:10, 11; 3:21, 22) Yesu nuwe, akakizizye basengwa bage kwigisya bango makakizio m’aba kakizizie. (Matayo 28:19, 20) Ukinsa naa Mulongeki wa Yehowa atunganana kuba na bumenyinino kishembe, anga: kumenya kusanza nu kusanzulá busoga, nu kumenya kwezezya na bango, * kuba na bumenyinino kishembe ku kabamba ka mango madini nu bungo bumba.​—1 Bakorinto 9:20-22; 1 Timoteo 4:13.

 Kubuno guvernema nuzo zamonde mutali wa likolo ukinsa zakakizya miunsuka kwenda ku likolo lya primere nu segondere. Tukwanzaga milembe za bubo bulingilingi na lino ikakizyo lya bunee: “Muntu na muntu anze bangati banene,” aba guvernema. (Baroma 13:1) Kwa kutaleka, tukuzegelaga bana beitu beikasene nunse ku likolo, kwa kut’ijanizya. * Anga bwalosya Kitondo kya Kalaga bunee: “Kinsania kimukukita, kitazi na mutima umozi, anga ku Mukota, nu ta ku bantu.”​—Bakolosayi 3:23.

 Likolo likutukasyaga ku kukya meijanizio ma bikanga byeitu. Bulingilingi na bwatenda Biblia, “Ndi muntu nteku langa mibuto zage nu ba kikanga kyage, wono nti ekutuna bukatizio nu nti eli mubi kutinga wozo utakatizia.” (1 Timoteo 5:8) Kwenda ku likolo kunatukasya kwanza ikakizyo lyatukasa Kalaga lya kukukya meijanizio ma bikanga byeitu. Kitabu The World Book Encyclopedia kyatenda buno, likolo “likukasyaga nunse bantu kubasila kuba ba mutali . . . anga kuba bakambi bekusakamya bikulo bya nsé.” Muntu uli na bumenyinino kishembe, wendile ku likolo, eku kukyaga kwa boogo meijanizio ma kikanga kyage kutinga muntu ut’izi kango nu ut’endile ku likolo.​—Misumo 22:29.

 Kusenga bana ku likolo kuli kwa mutali nunse ku babuti, buno bakungike bana babo ku kalamo ka buntu bukulu. (2 Bakorinto 12:14) Tukuzegelaga babuti kusenga bana babo ku likolo kinga buno ku zingo nsé bubo buna sega kulega musanga, aba bun’engokana na bumba bwabo. * Tukulisyaga tondi nsungu zatunganana ku babuti zakubakasya kulemba bukwendelela bana babo ku likolo. *

 Tuku songololaga busoga likolo litwijigisye. Biblia byatenda bunee: “Kikongolo ekwitabizagia na bo na bo, tondo mwiya mwenge ekutitika bwe kwenda.” (Misumo 14:15) Tukukambyaga sungu zezo anga, ndi muntu asila segondere kwakusombola fakilté nkizi zajigisye lingo, mosanga wasegwe ko nu mutali unalisya fakilté zongi. Anga, kukita formasio kishembe kuna kasya muntu kumenya lubilo itombe kishembe kwakutatingya nkungu neingi.

 Meigisya ma Biblia meli ma mutali nunse kutinga meigisya mekwigisibwaga ku likolo. Bwatingana na meigisya ma ku likolo, meigisa ma Biblia mekutukasyaga kumenya Kalaga nu kumona kalamo ka milyalya. (Yoana 17:3) Zinukutwigisyaga bu tunaba na misako misoga u kubula​—“bubo ‘buwamenyine aba butwamenyine’ kwisanana nu lusungio, nu bulili mu nzila nsoga insania.” (Misumo 2:9) Ono lelo tuna lengemania likolo lyendile ku lyo Paulo na iniversité, tondo alosizye bwase-bwase buno “busoga nunse bwa kumenya Yesu Krito,” u bwabezaga bwa mutali nunse. (Bafilipi 3:8; Misako 22:3) Ono lelo tondi beingi ba Balongeki ba Yehowa bendile ku iniversité ba titikizya nubo buno meigisya ma Biblia meli ma mutali nunse. *

 Kazeni kamozi ka Biblia katenda bunee: “Mwiya menge anamona ku bubi nu nti eibisa.” (Misumo 22:3) Balongeki ba Yehowa bekumonaga buno ku ma iniversité nu ma enstiti siperi-ere kishembe b’egisibwa benatimbwa na bantu bena bigya misako nu bwida bwabo gamozi na Kalaga. Ku kako kabamba ukinsa, Balongeki ba Yehowa beingi tabekwendaga aba kusenga bana babo ku biziki anga bibyo. Babasile kumona buno ma iniversité nu ma enstiti siperi-ere mekwigisyaga butatunganana anga bunee:

•   Makengelo meta tunganana: Mosanga uku langaga muntu nu kumu lisizya mbogimbogi

   Buku bulagwa buno kwijigisya nunse u kuku kasyaga muntu kumona mulimo uku lega mosanga mwingi, nu bubo u bukusengaga bantu beingi kwenda ku iniversité buno bamone mosanga mwingi. Kilemanizio kya bantu kishembe kili buno mosanga wabalisizye mbogimbogi nu ngolola, tondo Biblia byalosya buno mamo makengelo tam’isa. (Musambazi 5:10) Nu kyamutali nunse ntu bubuno bwigisya Biblia buno “kulinga kwa bubi bunsania kuli kwelama bikulo” nu kuku zimizyaga bukatizio bwa beingi. (1 Timoteo 6:10) Balongeki ba Yehowa bekukitaga magala mabo mansania kwa kut’engelelwa na “bwengelezi bwa bikulo.”​—Matayo 13:22.

•   Makengelo meta tunganana: Kwenda ku iniversité kunalisizya muntu bukuti

   Anga, Nika Gilauri, wabezaga ministre mutangi ku Georgia, atendile mano matenda makuka nunse mu nsé zage: “Buno ube muntu unalemaninwa ku Georgia watunganana kuba na dipoloma lya iniversité. . . . [u kubula buno w’akalazi,] miunsuka bet’endaga ku iniversité babezaga nsoni ku bikanga byabo.” * Biblia bili na makengelo mengukana nunse na mamo: Byatu tonda ku makengelo makwilondela lutanuno. G’abede ga kesé, Yesu abwinde bakulu ba madini b’ilondelaga lutanuno bunee: “Buni bumunakatizia inyuwe bekukasana lutanuno bweinyu bweinyu?” (Yoana 5:44) Iniversité zinakita muntu kuba na lwikotio, mulumbo wasomba Kalaga.​—Misumo 6:16, 17; 1 Petro 5:5.

•   Makengelo meta tunganana: Muntu na muntu en’ilamulila bubi nu busoga

   Balongeki ba Yehowa bekwanzaga milembe za Kalaga zalemanina bubi nu busoga. (Isaya 5:20) Tondo, bulingilingi na musagu wabaside kw’ibuku Journal of Alcohol and Drug Education, Beigisibwa beingi “bekukataga bulamuzi bwatingana na bumenyinino bu bekubezaga nabo ku kabamba ka bubi nu busoga,” * kubuno bekusindikwaga na bantu babatimba. Makengelo mamo m’ungwana na luno lusungu lwa Biblia: “Mugomio mubi ukubigia misako misoga.” (1 Bakorinto 15:33) Misako zikusomba Kalaga, anga bulebi bwa maku, kunua meté za kulebesia, kujama gamozi lwabusyo lwa kusongana, u zikuzegelwaga bantu kuba nazo ku iniversité unu bugomya bwa ko.​—1 Bakorinto 6:9, 10; 2 Bakorinto 7:1.

•   Makengelo meta tunganana: Kwenda ku iniversité u nzila nsoga za kukita kisi kuba kisoga

   Lebelebe, bantu beingi ntabekwendaga ku iniversité kwa kwelama bikulo, kwilondela lutanuno aba ku menka ku mbogimbogi za misako zitatunganana, tondo kwakukita kalamo kabo nu kesé kuba nsoga. Buli busoga, tondo Balongeki ba Yehowa bekubezaga na makengelo mengukana na mamo. Anga Yesu, tukumonaga buno, Bukota bwa Kalaga u bukakita kesé kuba kisoga. (Matayo 6:9, 10) Aba bubo, tatukwikalaga tugu nu kulindila buno Bukota bwa Kalaga buvwe kuzindya mankunku ma kesé. Ukinsa, anga Yesu, tukusambalaga “musagu musoga wa Bukota” mu kesé kinsania, nu kukasya ma mia ma mamilioni ma bantu naa mwaka kubasila kuba na kalamo kasoga. *​—Matayo 24:14.