1. Nazi u unatulosya nzila nsoga za kukumbamina Kalaga?

MADINI meingi mekutenda buno mekwigisya bulili ku kabamba ka Kalaga. Tondo tabunakulungana, kubuno madini mekwigisya bitondo byatingana ku kabamba ka Kalaga nu nzila za kumukumbamina. Buni butunamenya nzila nsoga za kukumbamina Kalaga? Yehowa tugu u unatulosya nzila zongo.

2. Buni buunamenya nzila nsòga za kukumbamina Kalaga?

² Yehowa atukasile Biblia. Kutingila Biblia, tunijigisya nzila nsoga za kumukumbamina. Ukinsa ujigisye Biblia. Yehowa akukasye kumona mutali wa meigisya ma Biblia kubuno akutunda.​—Isaya 48:17.

3. Kalaga ekutunda tukite kikizi?

³ Bantu kishembe bekutendaga buno Kalaga itabizya madini mansania. Tondo Yesu nteigisizye bubo. Atendile bunee: “Ta na muntu na muntu ukumbula bunee: ‘Mukota, Mukota’, ukeingila mu Bukota bwa mwigulu, tugu wozo ukukita kusombola kwa Tatane uli mwigulu.” Kasi, twatunganana kumenya kikizi u “kusombola [ntundo za, NWT]” kwa Kalaga nu kuzikita. Buli busoga, kubuno Yesu alengemanizye bantu betekwanza Kalaga na biiti, u kubula buno “bakiti ba bubi.”​—Matayo 7:21-23.

4. Yesu atendile kikizi ku nzila nsoga za kukumbamina Kalaga?

⁴ Yesu atutondile buno bukaba bubibu kukita ntundo za Kalaga bindi binsania. Atendile bunee: “Ingilazi ku mwingilo wabumbutana. Kubuno kuli ungo mwingilo  watanuka, nu nzila zago zenda ku buzimizi, nu beingi bekwingilaga mugo. Kubuno wozo mwingilo wabumbutana nu kuzinda kwa nzila zago kuli kalamo, nu bekukamona tabeingi.” (Matayo 7:13, 14) Nzila zabumbutana, u nzila nsoga za kukumbamina Kalaga, zika ku kalamo ka milyalya. Nu nzila zatanuka, u nzila mbé za kukumbamina Kalaga, zika ku lukuo. Tondo Yehowa ntekutunda muntu azimine. Ukinsa akasa banakantu bansania kiziki kya kujigisya kumumenya.​—2 Petro 3:9.

5. Buni buunamenya babo bekukumbamina Kalaga mu nzila nsoga?

⁵ Yesu atendile buno tunamenya babo bekukumbamina Kalaga mu nzila nsoga. Tunakita bubo kwa kugelenzula bukatizyo bwabo nu bibekukita. Atendile bunee: “Mukabamenya ku biguma byabo.” Nu atendile lingo bunee: “Muti unsania musoga ukukolama biguma bisoga.” (Matayo 7:16, 17) Bubo tabwalosya buno bakumbamizi ba bulili ba Kalaga basililila. Tondo bekwidendeka naa busi kukita bili bisoga. Tulole buni butunabamenya.

6, 7. a) Kabamba ka buni meigisya ma bakumbamizi ba bulili matunganana tugu kutuka mu Biblia? b) Musumo wa Yesu watwigisya kikizi?

⁶ Bukumbamizi bweitu bwatunganana kulemanina Biblia. Biblia byatenda bunee: “Masanzo mansania mopidwe na Kalaga, nu meli na mutali ku kwigisya, ku kuzugila, ku kusungula nu ku kwana kwisanana; buno muntu wa Kalaga alinde, nu aswage ku mulimo na mulimo musoga.” (2 Timoteo 3:16, 17, NWT) Musengwa Paulo asanzide bakristo bunee: “Gamwasambalidwe idagi lya Kalaga, litwamusambalide, mwalisekede, ta anga idagi lya bantu, tondo anga bulili lebelebe, idagi lya Kalaga.” (1 Batesalonika 2:13) Meigisya ma idini lya  bulili mekutukaga tugu mu kitondo kya Kalaga, Biblia. Tamekwigisyaga makengelo ma bantu aba bumba bwa bantu aba bungo.

⁷ Binsania byegisyaga Yesu, byatukaga mu kitondo kya Kalaga. (Sanzula Yoana 17:17.) Mambizi meingi atekulaga masanzo. (Matayo 4:4, 7, 10) Bakumbamizi ba bulili ba Kalaga bekweiga musumo wa Yesu: binsania bibekwigisyaga bikutukaga mu Biblia.

8. Kulembana na Yesu, nazi u twatunganana kukumbamina?

⁸ Twatunganana kukumbamina tugu Yehowa. Nimbo 83:18 lyatenda bunee: “Uwe ukumanagwa Yehowa, uwenyene uli Wasakama Nunse, nu uli gantata ga kisi kinsania.” Yesu atundaga buno bantu bamenye Kalaga wa bulili, nu abamenyesizye izina lyage. (Sanzula Yoana 17:6.) Atendile bunee: “Kumbamina Mukota Kalaga wobe, nu nti wamukitila wenyene.” (Matayo 4:10) Ukinsa bakambi ba Kalaga bekujanga musumo wa Yesu. Bekukumbamina tugu Yehowa. Bekukambya nu kusolela bango izina lyage. Nu bekwigisya bantu bikabakitila Kalaga.

9, 10. Buni butunalosyana buno twatundana?

⁹ Twatunganana kuba na lutundo lwa bulili ku bango. Yesu igisizye beigisibwa bage buno batundane. (Sanzula Yoana 13:35.) Kinga kuni kutwatukile, butwalelilwe, tunube bagumi aba bazambi, twatunganana kutundana. Lutundo lweitu lwatunganana kutukita tube na bumozi nu kuba mibuto nu babeto. (Bakolosayi 3:14) Ukinsa tatukukitaga bita nu tatukwitaga bantu. Biblia byatenda buno tunamenya “bana ba Kalaga [. . .] nu bana ba Satana” kububuno: “Muntu utekukita bwisanana nti nteli wa Kalaga, aba wozo utekutunda mubuto wage.” Byatenda lingo buno “twatunganana kutundana  bweitubweitu, nu takususania Kaina, wabezaga wa wozo mubi, nu eitile muto wage.”​—1 Yoana 3:10-12; 4:20, 21.

¹⁰ Tukukambyaga nkungu zeitu, magala meitu nu bintu byeitu kwa kukasyana nu kulindiana bweitubweitu. (Baebrania 10:24, 25) Tukukitaga “busoga ku bansania.”​—Bagalatia 6:10.

11. Ku kabamba kakizi twatunganana kukatizia buno tunonibwa kutingila tugu Yesu?

¹¹ Twatunganana kwanza Yesu ku kabamba ka buno tukonibwa kutingila we. Biblia byatenda bunee: “Takuli lonio mu ungo. Kubuno takuli lingo izina kunsi kw’igulu, [. . .] lyatunganana konibwa kulyo.” (Misako 4:12) Mu sula 5 za kino kitabu, twijigisizye buno Yehowa asingile Yesu mu kesé buno akasenne kalamo kage kuba kisansa kya bukuluzi ku banakantu bekumwanza. (Matayo 20:28) Yehowa asombwede Yesu kuba Mukota wa kesé. Ukinsa Biblia byatenda buno, ndi twatunda kulama milyalya, twatunganana kwanza Yesu.​—Sanzula Yoana 3:36.

12. Kabamba kakizi tatukwisambekya mu politike?

¹² Tatwatunganana kwisambekya mu politike. Yesu ntakitile politike. Gasungizibwe na mukota Muroma Pilato, atendile bunee: “Bukota bwane tabuli bwa kisi kikino.” (Sanzula Yoana 18:36.) Anga Yesu, tuli balandania ku Bukota bwa Kalaga, buli mwigulu. Ukinsa, aba kuni kutukulama, tatunisambekya mu politike. Aba bubo, Biblia byatusega twanze “bangati banene,” u kutenda buno kwanza guvernema. (Baroma 13:1) Tukwanzaga milembe za nsé zitukulama muzo. Tondo, mu nkungu zikutingana milembe zezo na za Kalaga, tukweiga basengwa, batendile bunee: “Twatunganana kwanza Kalaga kutinga kwanza bantu.”​—Misako 5:29; Marko 12:17.

13. Kikizi kitukusambalaga ku kabamba ka Bukota bwa Kalaga?

 ¹³ Twatunganana kukatizia buno Bukota bwa Kalaga tugu u bukazindia mankunku ma kesé. Yesu atendile bunee: “Musagu musoga wa Bukota” ukasambalwa ku bansania ba kisi kinsania. (Sanzula Matayo 24:14.) Takuli guvernema za banakantu zinatukitila bisoga anga bikatukitila Bukota bwa Kalaga. (Nimbo 146:3) Yesu atwigisizye kusega ku kabamba ka Bukota bwa Kalaga anga bubuno: “Bukota bwobe buvwe. Kusombola kwobe kukitwe ku kisi anga bukukukitwa mwigulu.” (Matayo 6:10) Biblia byatenda buno Bukota bwa Kalaga bukazikya makota mansania ma banakantu nu “bobwenyene bukasigala ku milyalya.”​—Danieli 2:44.

14. Bulingilingi na makengelo mobe, banazi u bekukumbamina Kalaga mu nzila nsoga?

¹⁴ Unibuzya léno bunee: “Banazi u bekwigisyaga tugu meigisya mekutuka mu Biblia? Banazi u bekulosyaga bantu izina lya Kalaga? Bantu ba idini ikizi u bekutundana bwabo-bwabo? Banazi u bekukatizyaga buno Kalaga asingile Yesu mu kesé kwa kukulula banakantu? Banazi u betekwisambekyaga mu politike? Banazi bekusambala buno Bukota bwa Kalaga tugu u bukazindia mankunku ma banakantu?” Balongeki ba Yehowa tugu u bekukitaga bubo.​—Isaya 43:10-12.

15. Twatunganana kukita kikizi buno Kalaga itabizye ikumbamino lyeitu?

¹⁵ Tabwatunganana tugu kukatizya buno Kalaga eligo. Kubuno, basumbu nubo bekukatizyaga buno Kalaga eligo, tondo tabekumwanzaga. (Yakobo 2:19) Buno Kalaga itabizye ikumbamino lyeitu, twatunganana kukita byatukakizya.

16. Kukabamba kakizi twatunganana kwilekanukya na idini lya buza?

 ¹⁶ Buno Kalaga itabizye ikumbamino lyeitu, twatunganana kwilekanukya na idini lya buza. Mulengania Isaya asanzile: “Mutuke munkanti mwage, mwiyengie.” (Isaya 52:11; 2 Bakorinto 6:17) Kasi twatunganana kwilekanukya na binsania bili na mugomyo na idini lya buza.

17, 18. a) “Babeli Munene” u kikizi? b) Kabamba ka buni buli busoga kusasya kutuka mu idini lya buza?

¹⁷ Idini lya buza u idini nkizi? U madini mansania mekwigisyaga bantu kukumbamina Kalaga mu nzila zengokana na bwatenda Biblia. Mu Biblia madini ma buza mekumanwa “Babeli Munene.” (Kulolesibwa 17:5) Ku kani kabamba? Kubuno, mu mwino wa Babiloni u mwalingile meigisya meingi ma buza, kuzinda kwa mwiyalo munene mu nkungu za Noa. Mamo meigisya makukile mu kesé kinsania. Anga, bantu ba Babiloni bakumbaminaga bibombo bya tulaga tusatu tusatu. Aba ono lelo, madini meingi mekwigisya bantu Busatu bwa Kalaga (Mungu ni Utatu). Tondo Biblia bili bwase: bigisya buno Kalaga wa bulili eli umozi tugu, Yehowa, nu mwana wage Yesu Kristo. (Yoana 17:3) Bantu ba Babiloni bakatizyaga nubo buno, gakuaga muntu, kwabezaga kintu mweli kyasigalaga mu kalamo, aba kikusungibwaga ku keija ka lusungyo. Tondo bubo buli buza​—Sanzula mukanda 14, 17 nu 18.

¹⁸ Kalaga alagile buno madini mansania ma buza mese bwigi kuzikibwa. (Kulolesibwa 18:8) Wamona léno kabamba ka buni buli busoga kusasya kutuka mu idini lya buza? Yehowa akusega ukite bubo lwabusyo lwa kuzikibwa kwa Babeli Munene.​—Kulolesibwa 18:4.

19. Buni bwakukunge Yehowa ndi wasombola kumukambela?

 ¹⁹ Ndi wasombola kutuka mu idini lya buza buno ukambele Yehowa, mango bilemba byobe aba bantu ba kikanga kyobe tabenamenya kabamba kakizi wakita bubo. Mango benakusungya. Tondo Yehowa ntenakusiga. Wabe mu kikanga kya kesé kinsania kyatundana nunse. Wabe na kilemanizio kya kulama bindi binsania mu kesé kito. (Marko 10:28-30) Nu embe bamozi ku bilemba byobe, aba bantu ba kikanga kyobe, bekukuzugila, bekajiigisya nubo Biblia.

20. Kabamba kakizi buli busoga kukumbamina Kalaga mu nzila nsoga?

²⁰ Bwigi gano, Kalaga azindye butombo bunsania nu Bukota bwage bwangate kesé. (2 Petro 3:9, 13) Zikaba nkungu nsoga nunsengania! Bantu bansania bekakumbamina Kalaga bwekutunda. Kasi kita léno migaluko buno ukumbamine Kalaga mu nzila nsoga.