1, 2. Nazi unatulanga ono lelo?

KENGELA tangi bubuno: ukwenda lugendo lwa mu mpego. Igulu lise lyakumpama, mikenzi nu mikulumino zise zatinga, mu nkungu nkeke mbula nene zanza kuloka. Walonda kiziki kya kutenéna mbula. Kuzinda, wabogaboga kumona kiziki kimozi!

² Lelo, tukulama mu nkiko zasusania na bubo. Bubi bwétéla nunse mu kesé. Mango ukwibuzya bunee: “Kuni ku ninaténéna buno nilangwe?” Mukambi umozi wa Kalaga asanzile bunee: “Yehowa eli itinino lyane nu mukolo wane, nu Kalaga wane, nu nkumukatizia [aba nkumulemanina, NWT].” (Nimbo 91:2) Lebelebe, Yehowa ekutubobelezyaga nu atukasa kilemanizyo kya nkungu zikuvwa.

3. Twatunganana kukita kikizi buno Yehowa atulange?

³ Buni bukutulangaga Yehowa? Ekutukasa magala ma kwikalila mankunku ma nkita insania. Nu kubuno eli na magala nunse kutinga babo benatunda kutukitila bubi, kasi ndi mankunku matubasela, tukatizye buno mu nkungu zikuvwa, Yehowa asile mbabazyo zeitu zinse. Biblia byatukakizya buno twidangye kuba “mu lutundo lwa Kalaga.” (Yuda 21) Kwa kumona lukasyo lwa Kalaga mu nkungu za mankunku, twatunganana kuba biida bage. Tondo buni butunakuzya kuba biida bage?

4, 5. Buni bwatulosya Yehowa lutundo lwage?

⁴ Kwa kukuzya kusigala biida ba Yehowa, twatunganana kukatizya buno atutunda lebelebe. Kengela tangi  binsania byekutukitilaga. Atukasile kesé kili kisoga nunse, nu akizazizye na nyama nu bijikanwa bisoga. Atukasa tondi idia isoga nu maze masongoloka. Kutingila Biblia, atulosya izina lyage nu milumbo zage za kwangamya. Galisa na binsania, atulosizye lutundo lwage kwa kusenga ga kesé, Mwana wage mutundwa, Yesu, buno akasane kalamo kage ku kabamba keitu. (Yoana 3:16) Kutingila kisansa kikyo, tuli na kilemanizyo kisoga kya nkungu zikuvwa.

⁵ Yehowa emikile Bukota bwa kimasiya, u kubula guvernema za mwigulu zikusondelezibwa na Yesu, zikazindya mankunku mansania nu kugalukia kesé kuba paradizo. Mu kalama bantu mu bubobelelo nu ngolola ku milyalya. (Nimbo 37:29) Yehowa atulosya lingo lutundo lwage kwa kutwigisya butunakita kwa kuba na kalamo kasoga ono lelo. Kwa kutalekela, atukakizya kumusega, nu ekutuungwilila bindi binsania. Yehowa alosya lebelebe lutundo lwage kwa naa muntu kutuli.

6. Buni buunalosya Yehowa buno wamutunda anga bwakutunda?

⁶ Buni bunalosya n’ugwe buno watunda Yehowa? Umulosye lusimo ku binsania byekukukitilaga. Lelo bantu beingi tabeli na lusimo. U bwanubezaga mu nkungu zabezaga Yesu mu kesé. Busi bumozi, onizye beija bibali ikumi, tondo umozi tugu u wamulosizye lusimo. (Luka 17:12-17) Tukutunda kuba anga wozo umozi walosizye lusimo. Bindi binsania tukutunda kulosya lusimo lweitu kwa Yehowa.

7. Twatunganana kutunda Yehowa mu lukita lukizi?

⁷ Twatunganana tondi kulosya buno twatunda Yehowa. Yesu abwide ku naa mwigisibwa wage bunee: watunganana kutunda Yehowa na “mutima wobe unsania,” nu “mu kalamo kobe kansania,” nu “mu makengelo  mobe mansania.” (Sanzula Matayo 22:37.) Bubo bwisulwa buni?

8, 9. Buni butunalosya Yehowa buno twamutunda?

⁸ Ndi matenda meitu u matunganana tugu ku losya buno twatunda Yehowa? Nu kilo. Ndi twamutunda na “mutima weitu unsania” nu “mu kalamo keitu kansania” nu “mu makengelo meitu mansania” twalosye bubo kutingila misako. (Matayo 7:16-20) Biblia byatenda bwase bwase buno ndi twatunda Kalaga, twanze makakizio mage. Ndi buli bubibu kwanza makakizio mage? Nu kilo, kubuno “tameli mabibu.”​—Sanzula 1 Yoana 5:3.

⁹ Twabe na kalamo ka mbogimbogi ndi twanza Yehowa. (Isaya 48:17, 18) Tondo, kikizi kinatukasya tukuzye kuba biida bage?

10. Kabamba ka buni watunganana kukuzya kumenya Yehowa?

¹⁰ Buni buwabasile kuba mwida wa Yehowa? Wamumenyile kwa kwijigisya Biblia, nu wakuzizye bwida bwobe gamozi nage. Bwida bubo buli anga keija. Buno keija kabange, bwatunganana kukagulumizia na misalé. Mu lukita anga lulo, kwa kugugumania bwida bwobe na Yehowa, watunganana kukuzya kumumenya.​—Misumo 2:1-5.

11. Meigisya ma Biblia mabe na mbaselo nkizi ku guli?

¹¹ Mu kukuzya kwijigisya Biblia, wijigisye meigisya makukate nunse ku mutima. Lola buni bwijungwile beigisibwa babili ba Yesu, gabede Yesu abisulila bulengania bwa Biblia. Batendene bunee: “Ndi tatwabezaga na mitima za kukengela tugu [ndi tatwakatilwe tugu ku mitima, NWT] gaatutendaga mu nzila nu kutwisulila masanzo?”​—Luka 24:32.

12, 13. a) Bulingilingi na Matayo 24:12 buni bunabasela kuba lutundo lweitu ku Kalaga? b) Twatunganana kukita kikizi buno lutundo lweitu ku Kalaga lukuzye kugugumana?

 ¹² Anga bwabogidebogide metema za beigisibwa ba Yesu gabamenyine masanzo, mango u mbogimbogi ziwabede n’ugwe nazo gawalingile kumenya bigisya Biblia. Bubo bwakukasya kumenya Yehowa nu kumutunda. Ntusige lulo lutundo lwobe lutambe aba lukokoke.​—Matayo 24:12.

¹³ Watunganana kukambya mpumba zinse buno bwida bwobe na Yehowa bugugumane. Kuzya kwijigisya bitondo byeingi ku kabamba kage nu Yesu. Nu kengela busoga buni buunakambya binsania biukwijigisya. (Yoana 17:3) Mu nkungu ziukusanzula aba kwijigisya Biblia, ibuzye bunee: “Gono musagu wanigisya kikizi ku kabamba ka Yehowa? Mu masanzo mamano, kikizi kyanzegela buno nimutunde na mutima wane unse nu na kalamo kane kansania?”​—1 Timoteo 4:15.

14. Kabamba ka buni masego mekutukasya kugugumania lutundo lweitu ku Yehowa?

 ¹⁴ Ndi uli na kilemba kyobe kiwatunda nunse, nti ukutunda kwezezya nage nkungu insania. Kutingila mwezezyo wozo, bulemba bweinyu nti bwagugumana. Anga bubo, ga tukwezezya mambizi meingi na Yehowa kutingila masego, lutundo lweitu kweli nti lwagugumana. (Sanzula 1 Batesalonika 5:17.) Masego meli nkaso nsoga zatukasile Tateiswe wa mwigulu. Kasi bindi binsania, twatunganana kumusolela binsania bya mu mutima weitu. (Nimbo 62:8) Tatwatunganana kusubilila masego matuseli twabeka mu makengelo, tondo tumusolele bili mu mutima weitu. Buno tugugumanie lutundo lweitu ku Yehowa twatunganana kukuzya kwijigisya Biblia nu kumusega na mutima unse.

15, 16. Buni buukumona mulimo wa kusambala?

¹⁵ Kwa kukuzya kusigala biida ba Yehowa, twatunganana tondi kusolela bango bukatizyo bweitu. Kusambala musagu wa Yehowa kwikile kitondo kya bukuti. (Luka 1:74) U mulimo wakasile Yesu ku bakristo bansania. Kasi tubansania twatunganana kusambala musagu musoga wa Bukota bwa Kalaga. Ndi ukubukitaga?​—Matayo 24:14; 28:19, 20.

¹⁶ Mulimo wa kusambala wabezaga wa bukuti kwa musengwa Paulo. Ukinsa atendile buno uli “isuku.” (2 Bakorinto 4:7) Kusambalela bango musagu wa Yehowa nu mpango zage u mulimo wa mutali ugunakita. Zili nzila za kukambéla Yehowa. Nu ekutananizibwa nunse na biukumukitila. (Baebrania 6:10) Kwa kutalikila, busambazi bwalisye mponga ku babo bekukuungwilila nu kuguli. Kubuno, wakasye bango nu wikasye kukunda  Yehowa nu kumona kalamo ka milyalya. (Sanzula 1 Bakorinto 15:58.) Ndi kuli ungo mulimo unakukasa mbogimbogi niingi?

17. Kabamba ka buni mulimo wa kusambala uli mulimo wa kusasya?

¹⁷ Mulimo wa kusambala, uli mulimo wakusasya. Twatunganana ku “sambala idagi kayikayika.” (2 Timoteo 4:2) Banakantu batunganana kuungwa ku musagu wa Bukota bwa Kalaga. Kubuni? Kubuno Biblia byatenda bunee: “Busi bunene bwa Yehowa buseli bwigi; buseli bwigi nu bukuvwa lubilo nunse.” Kalolesio ka kuzinda “takakwizizia.” (Zefania 1:14; Habakuki 2:3) Bwigi gano, Yehowa azikye kesé kyangatwa na Satana. Tondo lwabusyo lwa bubo, banakantu batunganana kukengelesibwa bikabasela buno bisombolele kukambéla Yehowa.

18. Kabamba ka buni twatunganana kukumbamina Yehowa gamozi na bango bakristo ba bulili?

¹⁸ Yehowa ekutunda tumukumbamine gamozi na bango bakristo ba bulili. Biblia byatenda bunee: “Tulindanie bweitubweitu buno tube na lutundo nu makitilo masoga. Tatulekele kukundamana gamozi, anga bukukitaga bango, tondo tukasane magala bweitubweitu, kwitila nunse kubukita anga bumukumona buno busi bubo buse bwigi.” (Baebrania 10:24, 25) Kasi twatunganana kukita magala meitu manse buno tukundamane ku mikundamano insania. Mikundamano zikutukasaga kiziki kya kulindiana metema bweitu-bweitu.

19. Kikizi kinatukasya tutunde mibuto nu babitu beitu?

¹⁹ Kwa kukundamana ku mikundamano za kikristo, wabe na bilemba byakukasye kukumbamina Yehowa. Wakulumane na mibuto nu babitu ba nkita insania bekwidendeka kukumbamina Kalaga anga ugwe. Tondo, tabasililila anga ugwe nu bekukitaga butatunganana. Kasi ndi bakita butatungana ubasigililage. (Sanzula Bakolosayi 3:13.)  Kengela nunsengania milumbo nsoga zibekubezaga nazo. Bubo bwakukasye kubatunda nu kukunda nunse Yehowa.

20, 21. Kalamo ka “bulili” u kalamo ka buni?

²⁰ Yehowa ekutunda biida bage babe na kalamo kasoga nunse. Biblia byatwigisya buno mu nkungu zikuvwa, kalamo keitu kekaba kasoga nunse kutinga kano ka lelo.

²¹ Tatukalama tugu miaka 70 aba 80, tondo tukalama “milyalya.” Mu paradizo, tukaba na lukita lwasililila lwa mubili nu tukalama mu bubobelelo. Ukinsa Biblia byamana kako kalamo “kalamo kasoga [aba ka bulili, NWT]. Yehowa alaga kutukasa ko. Tondo, kutukila kano kaluma twatunganana kukita magala meitu mansania kwa kwi “kokomezia” kumona kalamo kongo.​—1 Timoteo 6:12, 19.

22. a) Buni butunikokomezya kumona kalamo ka bulili? b) Kabamba kakizi tatunakunza kalamo ka bulili?

²² Buni butunikokomezya kumona kalamo ka bulili? Twatunganana kukita buli “busoga” nu kuba “bagumi ku makitilo masoga.” (1 Timoteo 6:18) Bubo bwisulilwa buno twatunganana kukambya bitukwijigisya mu Biblia. Tondo, tatukamona kalamo ka bulili ku kabamba ka magala meitu. Tatunakunza kalamo ka bulili kubuno keli tugu lukaso “lwa mponga” kutuka kwa Yehowa. (Baroma 5:15) Tateiswe wa mwigulu ekutunda lebelebe kukasa bakambi bage lulo lukaso.

23. Kubuni watunganana kukita kusombola kusoga kuteli kwizizya?

²³ Wibuzye tangi bunee: “Ndi nkukumbamina Kalaga mu nzila z’ekutunda?” Ndi uli na migaluko ziuki watunganana kukita, zikite kutukila kano kaluma. Ndi tukwidendeka kwanza Yehowa nu ndi twamulemanina, abe itinino lyeitu. Alange bakambi bage mu bindi binsania  bizinda bya kesé kyangatwa na Satana. Nu lingo, ekatukasya tulame bindi binsania mu paradizo anga bwalagile. Nu ndi wakita kusombola kusoga kuteli kwizizya, ukamona kalamo ka bulili!