BIKIZI bikutendelwa mu majurnale, ku lalio nu ku televizio? Butombo, bita nu bwiti. Mango ugwenyene ukubabalwa na lusambo aba wakwilwa na mutundwa wobe.

Unibuzya bunee:

• Ndi Kalaga u watundile kalamo kane nu ka kikanga kyane kabe buno?

• Kuni ku ninamona lukasyo lwa kwitania mankunku mane?

• Ndi kesé kikaba na bubobelelo busi bumozi?

Biblia bili na nakulo za bulili ku mbuzya zezo.

• Banakantu tabekalama lingo mu mbabazyo, tabekakunguka lingo nu tabekakua lingo.​—Kulolesibwa 21:4

• “Bitunga byatumetume anga nkenge.”​—Isaya 35:6

• “Meiso ma byuku mazibulwe.”​—Isaya 35:5

•  Bantu bakule bekayukibwa kutuka ku bakuzi.​—Yoana 5:28, 29

• Takukaba muntu ukasamba lingo.​—Isaya 33:24

• Naa muntu mu kesé ekaba n’idia liengi.​—Nimbo 72:16

Mango unakengela buno mamo malagi mansania meli ku nsamba 4 nu 5 za kino kitabu meli tugu ndozi. Tondo Kalaga u walaga kukita bubo bwigi gano, nu Biblia byatulosya buni bwekakita bubo.

Galisa na bubo, Biblia byatwigisya bitondo byeingi. Byatulosya buni butunaba na mbogimbogi kutukila ono lelo. Kengela tangi ku bitondo bikukuzangyazangya kano kaluma. Ndi lukita lubé lwa mubili? Ndi mankunku ma kikanga? Ndi mankunku ma mwido wa musanga? Ndi mutundwa wobe akule? Biblia binakukasya kwitania mankunku mamo. Byakukase tondi nakulo za kukubobelezya ku zeno mbuzya:

• Kabamba kabuni tukusungibwa?

• Buni butunitania mankunku meitu?

• Buni bunaba kikanga kyeitu na mbogimbogi?

• Kuni kukwendaga bakuzi?

• Ndi kuli busi butukamonana lingo na batundwa beitu bakule?

• Kabamba kakizi tunakatizya buno Kalaga ekazindilizya malagi mage mansania??

 Kubuno ukusanzula kino kitabu, bubo bwalosya buno ukutunda kumenya bigisya Biblia. Kitabu kikino kyakukasye ku bubo. Naa kibombo, kili na mbuzya zakukasye kumenya Biblia busoga nunse. Ma milioni ma bantu bekutundaga kwezezya na Balongeki ba Yehowa ku kabamba ka Biblia. Twalemanina buno bubo bwakutananizye tondi. Kalaga akukase mponga ku kwidendeka kwobe kumenya bitondo bikwigisya Biblia!