1. Kubuno use wamenya bulili bwingi bwa Biblia, tondo mango unibuzya buni?

WAMENYA meigisya meingi ma bulili ma Biblia kwa kwijigisya kino kitabu. Gamesamba, use wamenya bulili ku kabamba ka bakuzi, kilemanizio kya kuyukibwa kwa bakuzi nu kikyo kya kalamo ka milyalya. (Musambazi 9:5; Luka 23:43; Yoana 5:28, 29; Kulolesibwa 21:3, 4) Mango ukukundamanaga na Balongeki ba Yehowa nu wakatizya buno bekukumbaminaga Kalaga mu nzila nsoga. (Yoana 13:35) Mango usewalingya ku gugumania bwida bwobe na Yehowa nu ukutunda kumukambéla. Tondo  embe unibuzia bunee: “Natunganana kukita kikizi buno nikambéle Kalaga?”

2. Kabamba kabuni Mwetiopia atundile kututikwa?

² Mwetiopia umozi walamaga mu nkungu za Yesu ibuzizye buni bwenakita kwa kukambéla Kalaga. Nkungu kishembe nagayukizibwe Yesu kutuka ku bakuzi, umozi ku basengwa bage amanagwa Filipo, asambalide wozo wamulume. Amutitikizizye buno Yesu u wabezaga Masiya. Meigisya meijigisizye wozo Mwetiopia mamukatile nunse ku mutima ukinsa mu kazanga kongo anutendile bunee: “Kikizi lingo kinkulindila buno nsinatutikwa mu mazi mamano meli gano?”​—Misako 8:26-36.

3. a) Yesu akakizizye basengwa bage bakite kikizi? b) Mukristo unsania atunganana kututikwa buni?

³ Biblia bili bwase: ndi ukutunda kukambéla Yehowa, watunganana kututikwa. Yesu akakizizye basengwa bage bunee: “Mukite Babilongo bansania kuba beigisibwa, nu kubatutika.” (Matayo 28:19) Yesu wenyene alosizye musumo musoga kwa kututikwa. Tabamutogizye tugu maze ku itoe tondo atutikilwe we unsania mu maze. (Matayo 3:16) Unubwatunganana ku mukristo unsania ukutunda kututikwa, atunganana kututikwa we unsania mu maze.

4. Gatutikwa muntu nti alosya kikizi ku bango?

⁴ Gatutikwa muntu, nti alosya ku bango buno ekutunda lebelebe kuba mwida wa Yehowa nu kumukambéla. (Nimbo 40:7, 8) Mango unibuzia léno bunee: “Kikizi kinatunganana kukita buno nitutikwe?”

5. a) Lwabusio lwakubasela kututikwa watunganana kukita kikizi? b) Kabamba kabuni mikundamano za bakristo zili za mutali?

⁵ Lwabusio lwakubasela kututikwa watunganana kumenya Yehowa nu Yesu. Use walingya kubukita kwa  kwijigisya Biblia. (Sanzula Yoana 17:3.) Tondo ntunazindila tugu gago. Biblia byatenda buno watunganana kuba muntu wizile na “bumenyinino bwa muuza [bumenyinino bwa swaga bwa bulili, NWT]” bwa ntundo za Yehowa. (Bakolosayi 1:9) Mikundamano za Balongeki ba Yehowa zakukasye ube na bwida bwagugumana gamozi na Kalaga. Unu kabamba kasoga ka kukundamana ku naa mukundamano.​—Baebrania 10:24, 25.

6. Meigisya makizi ma watunganana kumenya lwabusio lwa kututikwa?

⁶ Yehowa ntekukukakizya buno umenye binsania mu Biblia lwabusyo lwa kututikwa. Ntakakizizye tondi Mwetiopia buno amenye binsania lwabusyo lwa kututikwa. (Misako 8:30, 31) Kubuno kujigisya bitondo ku Kalaga takuli na kuzinda. (Musambazi 3:11) Tondo lwabusio lwa kututikwa, watunganana kumenya nu kwitabizya meigisya matangi-matangi ma Biblia.​—Baebrania 5:12.

7. Buni bwakukasizye ijigisio lyobe lya Biblia?

⁷ Biblia byatenda buno geteli bukatizio tabunakulungana kutananizia Kalaga. (Baebrania 11:6) Kasi lwabusyo lwa kututikwa watunganana kuba na bukatizyo ku Kalaga. Kusila kuungwilila meigisisya megisyaga basengwa ba Yesu, beingi ku bantu ba mwino wa Korinto “bakatizizie nu bo, nu batutikilwe.” (Misako 18:8) Unu bwakukasizye ijigisyo lyobe lya Biblia kuba na bukatizyo ku malagi ma Kalaga. Nu lyakukasizye tondi kuba na bukatizyo mu kisansa kya bukuluzi kyakasene Yesu.​—Yosua 23:14; Misako 4:12; 2 Timoteo 3:16, 17.

8. Kikizi kyakukase nkasa za kusolela bango biukwijigisya?

⁸ Buukukuzya kumenya meigisya ma Biblia, unu buwamamone buno meli masoga kumakambya mu  kalamo kobe nu nti bukatizyo bwobe bwagugumane. Unaba léno na nkasa za kusolela bango biukwijigisya.​—Yeremia 20:9; 2 Bakorinto 4:13.

9, 10. a) Banazi baunalinga kusolela biukwijigisya? b) Watunganana kukita kikizi ndi use watunda kusambala gamozi n’ikundamano?

⁹ Mango unaba na nkasa za kusolela bukatizyo bwobe ku bantu ba kikanga kyobe, ku bilemba byobe, ku bantu beli mu kolokolo zeinyu aba ku banyobe na mulimo. Buli busoga kukita bubo, tondo ubukitage kwa kwolela nu kwisigulizya. Nu bukutinga nkungu, mango unatunda kusambala n’ikundamano. Ndi wimona buno unasambala léno n’ikundamano, solela Mulongeki wa Yehowa wozo ukukwigisya Biblia. Ndi amona buno useli lebelebe kayikayika nu ukulama bulingilingi na kanuni za Biblia, akukulumanie na bakungu babili b’ikundamano gamozi nage.

¹⁰ Mwakite kikizi gamwakundamane? Bakungu bezezye n’ugwe kubuno bamone ndi use wamenya nu kukatizya meigisya matangi-matangi ma Bibila. Batunde lingo kumenya ndi ukukambya byatenda Biblia mu kalamo kobe ka naa busi, nu ndi use watunda lebelebe kuba Mulongeki wa Yehowa. Ntukue boba kwezezya na bakungu. Kengela buno bekulanga bantu bansania b’ikundamano, kasi nugwe tondi. (Misako 20:28; 1 Petro 5:2, 3) Gawasile kwezezya nabo, bakubule ndi unasambala léno gamozi n’ikundamano.

11. Ndi bakungu b’ikundamano bakubula buno kuli migaluko zi uki watunganana kukita, kabamba ka buni buli busoga nunse kukita migaluko zongo?

¹¹ Mango bakungu b’ikundamano bakusolele buno kuli migaluko zi uki watunganana kukita lwabusyo lwa kulinga kusambala gamozi n’ikundamano. Kabamba ka buni buli busoga nunse kukita migaluko zongo? Kabamba  keli buno gatukutendela Yehowa ku bango, tukutenda ga kiziki kyage. Kasi kalamo keitu katunganana kulosya buno twamukutya.​—1 Bakorinto 6:9, 10; Bagalatia 5:19-21.

12. Kabamba ka buni tubansania twatunganana kwigonga?

¹² Kuli kingo kitondo kiwatunganana kukita lwabusyo lwa kututikwa. Musengwa Petro atendile bunee: “Mwiyaniazi [aba mwigongazi, NWT] nu mugaluke ku Kalaga buno asigilile bwagi bweinyu.” (Misako 3:19) “Kwiyania aba kwigonga” kwisulilwa buni? Bubo bwisulilwa buno kwibezya ku bubi bunsania buwakitile. Anga, ndi wakitaga butazi watunganana kwigonga. Aba buno ukwidendekaga kukita bili bisoga bindi binsania, watunganana tugu kwigonga. Kubuno tubansania tuli baagi, twatunganana kusega isigililo ku Kalaga.​—Baroma 3:23; 5:12.

13. “Kugaluka” kwisulilwa buni?

¹³ Ndi kwibezya tugu ku bubi buwakitile u kuzinda? Nu kilo. Petro atendile buno watunganana lingo “kugaluka.” Kwisulilwa buno watunganana kusiga mébé insania nu kukita bili bisoga. Anga wono musumo: Wenda ku kiziki kishembe limbizi lyobe isoki. Wasanga maakano (masanganzila) wenda mu nzila imozi, kwa kutizizya wamona buno uli mu nzila zitatunganana. Wakite kikizi? Wende bukebuke, wemane, nu “wagaluke” ku nzila nsoga nu kwenda. U buli bubo kwa kwijigisya Biblia, mango unimmona buno watunganana kukita migaluko mu kalamo kobe aba kusiga misako nu bumba kishembe. Ntwizizye “kugaluka,” ukubula buno kukita migaluko ziwatunganana kukita nu widendeke kukita bili bisoga.

14. “Kwikasana kwa Yehowa” kwisulilwa buni?

¹⁴ Lwabusyo lwa kututikwa, watunganana kukita kingo kitondo kya kilemanizyo u kutenda buno kwikasana kwa Yehowa. Kwikasana kwa Kalaga kwisulilwa buno, wakita idagano mu masego mobe buno wamukumbamine we wenyene tugu, kitangi nu kya kilemanizio mu kalamo kobe u kukita ntundo zage.​—Kukokomezia mulembe 6:15.

15, 16. Kikizi kikuzegela muntu kwikasana kwa Yehowa?

¹⁵ Kulaga Yehowa buno wamukambéle we wenyene tugu mu kalamo kobe, kwalengemanibwa na kulaga muntu ukutunda buno watingye kalamo kobe kansania gamozi nage. Tweke musumo: Kuli wamulume nu mukikulu, nagwe naukutananizibwa na munyage. Bukukuzia wamulume kumenya mukikulu unu bwekukuzia kumutunda. Nu ekutunda kumusonga. Aba buno buli bungatu buzitu, tondo kubuno ekumutunda, itabizia kukukya binsania byasega isonga.

¹⁶ Buukukuzia kumenya Yehowa, unu buwakuzye kumutunda nu kukita magala mobe mansania buno umukambéle. Bubo bwakuzegelé kumulaga mu masego buno wamukambéle. Biblia byatenda buno muntu unsania watunda kuba mweigisibwa wa Yesu “eitune wenyene.” (Marko 8:34) Bubo bwalosya buno kwanza Yehowa u kwatunganana kuba ku kiziki kitangi mu kalamo kobe. Ntundo za Yehowa u zatinga ntundo zobe za mubili nu mpango zobe.​—Sanzula 1 Petro 4:2.

17. Kabamba ka buni bantu kishembe tabekwikasana kwa Yehowa?

¹⁷ Bantu kishembe tabekwikasana kwa Yehowa kubuno  bekukua boba kutazindilizya idagano lyabo lya kumukambéla. Tabekutunda kumwinia mutima. Mango bekukengelaga buno Kalaga ntekabasungya ku mébé zibekukitaga kubuno tabeikasene kweli.

18. Kikizi kyakukasye kukinda boba bwobe bwa kuteinia Yehowa mutima?

¹⁸ Lutundo lwobe kwa Yehowa lwakukasye kukinda boba bwa kutamwinia mutima. Kubuno wamutunda, wakambye magala mobe mansania buno ulame bulingilingi na buwamulagile. (Musambazi 5:4; Bakolosayi 1:10) Ntwamone buno buli bubibu kukita ntundo za Yehowa. Musengwa Yoana asanzile bunee: “Kubuno lutundo lwa Kalaga luli kulanga makakizio mage. Nu makakizio mage tameli mabibu.”​—1 Yoana 5:3.

19. Kabamba ka buni ntwatunganana kukwa boba kwikasana kwa Yehowa?

¹⁹ Ntwatunganana kuba wasililila buno wikasane kwa Yehowa. Ntekulegela kweitu buno tukite bitatunavwama kukita. (Nimbo 103:14) Akukasye kukita bili bisoga. (Isaya 41:10) Ndi wamulemanina na mutime wobe unse, “nu we akusondelezie mu nzila zobe.”​—Misumo 3:5, 6.

20. Kusila kwikasana kwa Yehowa, watunganana léno kukita kikizi?

²⁰ Ndi use watunda léno kwikasana ku Yehowa? Kusila kwikasana kwa Yehowa mu masego: kitondo kya kulemba u buno watunganana léno kututikwa.

21, 22. Buni bu “uneitabizia ga mulungu” bukatizyo bwobe?

²¹ Solela mwemanizi wa lusu lwa bakungu b’ikundamano lyobe buno use wikasana kwa Yehowa nu use watunda kututikwa. Alongeke bakungu kishembe  bezezye n’ugwe nu kulola ndi use wa menya meigisya matangi-matangi ma Biblia. Ndi bamona buno use watunganana kututikwa, nti bakusolela buno watutikwe ku musanganano walemba wa Balongeki ba Yehowa. Ku musanganano wongo, lusumbi (diskuru) lumozi lwalosye bwisulilwa bwa kututikwa. Lingo ntendi abuzye mbuzya ibélé ziteli mbibu ku babo batutikwe.  Kwa kwakula ku mbuzya zezo, nti “witabizya ga mulungu” bukatizyo bwobe.​—Baroma 10:10, NWT.

²² Nu kuzinda watutikwe. Watutikwe kwa kwiswa ugwe unsania mu maze. Kututikwa kwobe kwalosye bantu bansania buno wikasana kwa Yehowa nu use léno Mulongeki wa Yehowa.

23. Kututikwa “mu izina lya Tata, nu lya Mwana, nu lya muuza wasililila” kwisulilwa buni?

²³ Yesu abwide beigisibwa bage buno benatutikilwe “mu izina lya Tata nu lya Mwana nu lya muuza wasililila.” (Sanzula Matayo 28:19, NWT.) Bubo bwisulilwa buno twatunganana kwitabizya bwangato bwa Kalaga. Twatunganana lingo kwitabizya mulimo wa Yesu mu mpango za Kalaga. Twatunganana tondi kwitabizya bukukambyaga Kalaga muuza wage wasililila kwa kuzindilizya ntundo zage.​—Nimbo 83:18; Matayo 28:18; Bagalatia 5:22, 23; 2 Petro 1:21.

24, 25. a) Kututikwa kukulosya kikizi? b) Lubuzia lukizi lwakulwe mu sula nzinda?

²⁴ Kututikwa kukulosya kitondo kisoga nunse. Gawatutikwa mu maze, bwisulilwa buno uli anga wakua ku lukita lwa kalamo kobe ka wakalazi. Bubo bwalosya buno walusiga. Nu gawatuka mu maze, nti uli anga walingya lungo lukita luto lwa kalamo kwa kukambéla Kalaga. Bubo bwalosya buno kutukila nkungu zezo, wakambéle Yehowa. Kengela buno, ntwakasene kalamo kobe ku munakantu, aba iketelo, aba ku mulimo kishembe, tondo kwa Yehowa!

²⁵ Idagano liwalagile Yehowa lyakukasye kugugumania bwida bwobe gamozi nage. (Nimbo 25:14) Bubo tabwisulilwa buno tukaonibwa tugu kubuno tuse twatutikwa. Musengwa Paulo asanzile bunee: “Mwitile kukita mulimo ku lonio lweinyu gamozi na boba, nu kugilimina.” (Bafilipi 2:12) Kututikwa kuli tugu kulingya bwida na Yehowa. Buni buunakuzya léno kuba mwida wa Yehowa? Sula nzinda zakule lubuzya lulo.