ISOMO 7
Kikizi u bukota bwa Kalaga?
1. Bukota bwa kalaga u kikizi?
Kikizi ukyasinga Yesu ebe Mukota musoga?—MARKO 1:40-42.
Bukota bwa Kalaga buli bwangato bwa mwigulu. Bwatukye bwangato bunsania nu kukita ntundo za Kalaga zikitwe mwigulu nu gano ga kisi. Lolazi guno musago musoga! Kano kaluma, bubo Bukota bwasile meijanizyo ma bana kantu mu bwangato busoga. Bukakulumania bikazi bansania ba ga kisi.—Soma Danieli 2:44; Matayo 6:9, 10; 24:14.
Bukota bwa tunganana kuba na Mukota. Ga ntata ga Bukota bwage, Yehowa abikile mwana wage, Yesu Kristo.—Soma Kulolesibwa 11:15.
Lola video Bukota bwa Kalaga u kikizi?
2. Kabamba ka buni Yesu eli Mukota wa tunganana?
Mwana wa Kalaga eli Mukota watunganana kabamba ka buno eli musoga nu ekusungila kili kisoga. (Yoana 1:14) Lingo, eli na magala mengi kwa kukasya bana kantu, kubuno kutukila kwigulu ekagandaganda gantata ga kisi. Tondo, kutukila mu ijukilo lyage abakamile mwigulu nu ikede ku sidume kwa Yehowa mu kulindila kwimikwa. (Baebrania 10:12, 13) Kuzinda, Kalaga amukasile mpumba za kugandaganda.—Soma Danieli 7:13, 14.
3. Banazi u bek’angata gamozi na yesu?
Kibombo kimozi kikumanwa “basilila” kikaangata bukota gamozi na Yesu kwigulu. (Danieli 7:27) Basilila batangi basombwendwe babezaga basingwa bakatizya ba Yesu. Kuzinda, Yehowa abatalikinde bango bakatizya, balume nu bakikulu, kubasa ono lelo. Anga Yesu, bekujukibwa na mubili wa muuza.—Soma Yoana 14:1-3; 1 Bakorinto 15:42-44.
Bantu banga ubekenda kwigulu? “Lusumba lukeke” ubwatendile Yesu. (Luka 12:32) Bekakuka tununu lukama lumozi nu makumi manazi nu manazi (144 000) kuangata kisi gamozi nage.—Soma Kulolesibwa 14:1.
4. Kikizi ukyatingile gabende Yesu aangata bukota?
Bukota bwa Kalaga bwanzile mulimo mu mwaka wa kanunu kamozi nu nkama mubula nu ikumba n’inazi (1914). * Mulimo mutangi wakitile Mukota Yesu wabende kulekela Satana nu masumbu mage ga kisi. Anga muntu wakatwa na busile, Satana anzile kukita matenda mu kisi kinsania. (Kulolesibwa 12:7-10, 12) Kutukila gago, tubebe twa banakantu twalengelende. Bita, nzala, nsambo nene nu tuningini u “kalolesio” ka buno Bukota buse bwigi kukata binse bya ga kisi.—Soma Luka 21:7, 10, 11, 31.
5. Kyakite Bukota bwa Kalaga?
Kutingila mulimo wa kuigisya bango bantu, Bukota bwa Kalaga bukukundamania kibombo kinene kya bantu ba bilongo binsania. Tununu nu tununu twa bantu ba bobelela bese bantu ba Yesu. Bukota bwa Kalaga bukabalanga gabukavwa kwita kino kisi kya lelo kya betekukatizya. Bansania bekutunda kukaswa mponga za bubo bukota batunganana kuba bantu babolela kwa Yesu.—Soma Kulolesibwa 7:9, 14, 16, 17.
Mu nkungu za miaka 1 000, Bukota bukakita makengelo ma kulinga ma Kalaga ku bana kantu. Kisi kinsania kikagaluka paradizo. Kuzinda, Yesu ekasubya Bukota mu maboko m’isi. (1 Bakolinto 15:24-26) Kuli ungo muntu u unatunganana kusambalila uno musago wa Bukota bwa Kalaga?—Soma Nimbo 37:10, 11, 29.
^ par. 6 Ndi watunda kwelengula bulengania bwa Bibilia byalosya mwaka wa 1914, lola kitabu “Biblia Byatwigisya Kikizi?” nsamba 215-218.
