Yehowa, walingizie misagu misoga, we u Kalaga ka mbogimbogi, atunda bikanga byeitu bibe na mbogimbogi. (1 Timoteo 1:11) Kalaga u walingizie isonga. Isonga lisanana ulikulisya mbogimbogi mu kikanga ku babo basongana nu bana babo beli mu bubobelelo. Bakristo batunganana kutabenga mulembe wa kisi wa kusanzya isonga.​—Soma Luka 2:1, 4, 5.

Buni buli makengelo ma Kalaga ku isonga? Kalaga eizye buno isonga libe mukulumano utena kutengatenga gesambana mulume nu mukikulu. Yehowa atunda buno mulume nu mukukilu bebe bantu bakatiziana. (Baebrania 13:4) Yehowa asomba kukwa kw’isonga. (Malaki 2:16) Kalaga asigilila mambizi mamozi Bakristo kwita isonga ali kulendela kabamba ka butazi nu kulonda lingo isonga lisanana.​—Soma Matayo 19:3-6, 9.

Yehowa abumbile mulume nu mukikulu ku buno nagwe na ukita mulimo wa kukasia munyage mu isonga. (Kulinga 2:18) Ku bwangati bwage bwa kikanga, wamulume eikete lukungo lwa kulisya bantu ba numba zage nu kubigisya bitondo bya Kalaga. Wamulume atunganana kutunda mukikulu wage. Wamulume nu mukikulu batunganana kutundana nu kulosyana lwanzo. Ku buno bamulume nu bakikulu bansania tabasililila, mutandilwa wa mbogimbogi mu isonga u buno nagwe na usigilila mibi za munyage.​—Soma Baefeso 4:31, 32; 5:22-25, 33; 1 Petro 3:7.

Ndi isonga lyinu talyakulungana lingo, londazi kukitilana misako misoga nu kulosyana lutundo. (1 Bakorinto 13:4, 5)  Kitondo kya Kalaga takyakakizya kulendela mu isonga buno kube kusila milondo z’isonga.​—Soma 1 Bakorinto 7:10-13.

Yehowa atunda mube na mbogimbogi. Abakasa nsungu nsoga zamikasye ku bogelabogela bunsuka bweinyu. Kalaga ekutunda buno mube na bumenyino nu mutali kutuka ku ba mubuta. (Bakolosayi 3:20) Mubumbi weinyu, nu mwana wage Kristo bekutunda mube na mbogimbogi nu kubakitila busoga.​—Soma Musambazi 11:9–12:1; Matayo 19:13-15; 21:15, 16.

Mwatunganana kukita mulimo ku buno, mulange bana binyu, bemone nsulu, numba nu idya. (1 Timoteo 5:8) Ndi mwatunda bana binyu bebe na mbogimbogi mwatunganana kubeigisya kutunda Kalaga nu kuisiga kwigisibwa na Kalaga. (Baefeso 6:4) Bu ukulosya lutundo lobe ku Kalaga kunaba na nsondolezia ningi ku bana bobe. Meigisia mobe ndi matuka mu Bibilia meli na bwangato bwa kugalula mitima za bana bobe.​—Soma Kukokomezia Mulembe 6:4-7; Misumo 22:6.

Bana bekukula busoga ndi balindikwa nu bakokomezibwa mitima zabo. Batalanila kusungulwa ku mibi zibekukita. Mamo meigisia meli masoga ku buno mavwe kulanga bana na misako zinabatukya mbogimbogi. (Misumo 22:15) Ku bubo bunsania lusungu talwatunganana kuba lukali nu lwa kubabazia.​—Soma Bakolosai 3:21.

Balongeki ba Yehowa basanzizie bitabo byenge bya meigisia ku babuti nu bana babo. Bibyo bitabo bili na meigisia matuka mu Bibilia.​—Soma Nimbo 19:7, 11.