Bubi bwalingile gano ga kisi gabende Satana atenda buza butangi. Mu lutangi Satana abezaga muanzelo wasililila, tondo “ntabezaga imana mu bulili.” (Yoana 8:44) Abezaga na mpusia za kukumbamilwa nuko kuli tugu kwa Kalaga. Atendile buza kwa mukikulu mutangi, Eva, nu amukakizye buno emuanze gwe, nu ntaanze Kalaga. Adamu ajangile Eva; ntabende na luanzo kwa Kalaga nugwe. Bwakitile bwasinga mbabazio nu lukwo.​—Soma Kulinga 3:1-6, 19.

Gasindikile Eva ku bwagi, Satana agunine bwangato bunene bwa Kalaga u kubula, magala mage makw’angata mwigulu nu gano ga kesé . Kibombo kinene kya bantu kyibika mu bubo bwa kusomba Kalaga abe Mukota. Bubo u bwabende Satana “mukota wa kisi.”​—Soma Yoana 14:30; 1 Yoana 5:19.

Binsania byakitile Kalaga byabezaga byasililila. Bantu nu baanzelo babumbile babezaga na bwangato bwa ku mwanza lebelebe. (Kukokomezia Mulembe 32:4, 5) Atukasile bukandulo bwa kusombola gesambana kukita busoga nu kukita bubi. Bubo bukandulo bwatukasa butuneima kumulosya lutundo lweitu.​—Soma Yakobo 1:13-15; 1 Yoana 5:3.

Mu nkungu nigi Yehowa asigilila kuguna kube ku bwangato bwage. Kabamba ka buni? Tumenye buno takuli bukota bwetelimo buneima kukota busoga. (Musambazi 7:29; 8:9) Miaka 6 000 zise zasila  kutinga, twimonela lebelebe buno, bakota ba ga kisi tabagwamile kusila bita, kwitana, kumonela bango bantu nu lusambo.​—Soma Yeremia 10:23; Baroma 9:17.

Kulingamania na bukota bwa bantu, bukota bwa Kalaga buli na mponga kwa babo babukatizia. (Isaya 48:17, 18) Kano kaluma, Yehowa azikye bukota bwa bantu. Babo tugu babobelela ku Bukota bwage ubekasigala mu kisi.​—Isaya 11:9.​—Soma Danieli 2:44.

Lola video Kabamba kabuni Kalaga asigilila mbabazio?

Satana ibwinde buno takuli muntu ukukitila Yehowa na lutundo lwa lebelebe. Unatunda kulosya bubo buza? Unagwama! Nkiki za Kalaga zatukasia iswe bansania tulosye ndi twatunda bukota bwage ali bukota bwa bantu. Tukulosya kuni ukutuli kutingila misako zeitu.​—Soma Yobu 1:8-12; Misumo 27:11.

Tukusombola Kalaga ebe Mukota weitu ndi twalonda Idini lya bulili nu kwilonga mu nzila za Ijuki lyage, Bibilia. (Yoana 4:23) Twabika Satana bulazi ndi twatina politike nu bita bili mu kisi, anga Yesu.​—Soma Yoana 17:14.

Satana ekukita magala mage kusindika bantu bakite mizinga za butazi nu mizinga zingo zili mbi. Ndi twazitina, twasekwe nu kuba na katati kutuka ku mibuto zeitu nu bango beli butweta. (1 Petro 4:3, 4) Twatunganana kusombola: Twabe na bulemba na bantu bekutunda Kalaga? Twajange milembe zage zili na bumenyinino nu zili na lutundo? Ndi bubo, twalosye buno Satana atendile buza gatendile buno, mu malindiko, takuli muntu uneima kwanza Kalaga.​—Soma 1 Bakorinto 6:9, 10; 15:33.

Lutundo lwa Kalaga ku bantu lwakokomezia buno bubi nu tubebe bikuvwa kusila. Babo bolosya buno bakatizia bubo babe na kalamo ketena kuzinda gano ga kisi.​—Soma Yoana 3:16.