ISOMO 3
Ndi misago misoga za Bibilia zikutukila lebelele kwa Kalaga?
1. Nazi u wasanzizye Bibilia?
Musago wa buno bana kantu bekalama milyalya ga kisi wasangwa mu Bibilia. (Nimbo 37:29) Bibilia bikile na bitabo bikeke 66. Kalaga asanzizye na bantu anga 40 beli na bukatizio: Bitabu bitano bitangi byasanzilwe na Musa kuse miaka tununu tusatu nu nkama itano (3 500), kitabu kizinda kyasanzilwe na musingwa Yoane, kuse kwatinga miaka kanunu kamozi nu nkama mubula (1 900). Meli makengelo ma Kalaga, ta makengelo mabo, ku buno Kalaga atendile na basanzi ba Bibilia kutingila muuza wage wasililila. (2 Samweli 23:2) U kutenda buno Yehowa u wasanzile Bibilia.—Soma 2 Timoteo 3:16; 2 Petro 1:20, 21.
Lola video Nazi u wasanzizye Biblia?
2. Buni bu tunamenya lebelebe buno Bibilia byatukile kwa Kalaga?
Twizi buno Bibilia byatukile kwa Kalaga kukabamba ka buno tabyatingwa na musago wa galwazubusyo. Takuli muntu unagwama kulongeka bubo. (Yosua 23:14) Winyene Kalaga eli na magala mansania u unagwama kusambala bitondo bya bulingilingi bikavwa bya kisi kinsania.—Soma Isaya 42:9; 46:10.
Bwatunganana buno kitabu kyatukila kwa Kalaga kibe kimozi tugu. Bibilia u kikyo kitabu kimozi. Kyabeganibwa mu tununu nu tununu twa bitabu mu tununu twa mitendezi. Kitabu kya wakalazi, tondo kikwenda gamozi na migisya ma siyanse. Lingo babo bantu 40 basanzile Bibilia, bantu bamozi, bitondo byabo tabyatingana. * Tondo, Bibilia byalosya lutundo lwa Kalaga. Bibilia bikile ono lelo na magala ma kuketeka mulimo musoga mu kalamo ka bantu. Bino bitondo byakatizya tununu nu tununu twa bantu babogelabogela bulili Kitondo kya Kalaga.—Soma 1 Batesalonika 2:13.
Lola video Nazi u wasanzizye Biblia?
3. Kyasambala Bibilia?
Bibilia byasambala misago misoga, kulosya buno Kalaga ena makengelo masoga ma galwabusyo, makengelo ma lutundo lunene ku bantu. Byasambala buni butwidile mbogimbogi za kulama mu kisi kya paradizo kutukila kubumbwa nu kyasambala mu kuzinda, buni bukatukasa lingo Kalaga zezo paradizo.—Soma Kulolesibwa 21:4, 5.
Kino kitabu kya Bibilia kili na milembe, kanuni nu nsungu. Tondo, byasola bwabezaga bantu na Kalaga wakalazi, byalosya bumba bwa Kalaga. Bibilia binakukasya kumenyana na Kalaga. Byasambala buni u buunaba kilemba kyage.—Soma Nimbo 19:7, 11; Yakobo 2:23; 4:8.
4. Buni butunamenyinina Bibilia?
Kitabu kikeke kino kyakukasie kumenyinina Bibilia ndi wakita bwakitaga Yesu. Asomaga masanzo mu Bibilia nu kusambalila bantu bwisulilwa bukutenda masanzo m’opindwe.—Soma Luka 24:27, 45.
Takuli lugano lusoga kutinga misago misoga zikutukila kwa Kalaga. Nu, kuli bantu bete kwanga, nu bango bakutwa na bitondo byongo. Bubo bunaba, ugwe ntusigilile bitondo bya Kalaga. Menya buno unaba na kilemalizio kya kalamo kete na kuzinda ndi wijigisya kumenya Kalaga.—Soma Yoana 17:3.
^ par. 3 Soma broshire “Kitabu Kwa Ajili ya Watu Wote.”
