ISOMO 05
Biblia Bili Musagu wa Kalaga ku Beiswe Banakantu
Yehowa atukasile lukaso lusoga nunse, bitabu bikeke 66 mu ibuku limozi nene lyamanwa Biblia. Tondo, mango un’ibuzya bunee: ‘Kuni u kwatukile Biblia? Nazi wasanzizye Biblia?’ Lwabusio lwa kwakula ku mbuzya zezo, tutendele tangi buni bwatubasinde musagu wa Kalaga uli mu Biblia.
1. Kubuno bantu u basanzile Biblia, kabamba kakizi tukutenda buno Biblia byatukile kwa Kalaga?
Biblia byasanzilwe na bantu batinga 40 mu miaka zakuka 1.600, kutukila mwaka wa 1.513 L.K.Y., aba ku mwaka wa 98 NK.Z. Nu babo basanzi tabalamaga gamozi. Tondo, bibasanzile byatendela bitondo bitatingana. Bubo bwakulungana ku kabamba kakizi? Kubuno Kalaga u wasanzizye Biblia. (Soma 1 Batesalonika 2:13.) Babo basanzi tabasanzile makengelo mabo bobeinyene. Tondo, “batendile byatukaga ku Kalaga, basondelezibwaga na muuza waswagibwa.” a (2 Petro 1:21, NWT) Kalaga akambyaga muuza wage waswagibwa kwa kwipila aba kusondelezya babo bamulume kusanza makengelo mage.—2 Timoteo 3:16.
2. Nazi watunganana kuba na Biblia?
“Babilongo bansania, nu. . . bikanga binsania, nu . . . mitendezi insania, nu . . . bantu bansania” benamona mutali ku musagu musoga uli mu Biblia. (Soma Kulolesibwa 14:6.) Kalaga akitile buno Biblia bibe mu mitendezi neingi kutinga bingo bitabu binsania. Kasi bantu bansania benasoma Biblia. Bubo buligo, aba kuni kubekulama nu mutendezi ubekutenda.
3. Yehowa akungile Biblia mu nzila nkizi?
Biblia byasanzilwe ku bintu bitenizizya bindi byeingi, anga gantata ga bikoba bya nyama nu gantata ga papyrus (nsamba zikutuka mu kate ka papyrus). Tondo mambizi meingi bantu batundaga Biblia basanzaga kwa bwenge kopi za Biblia. Bakota bamozi nu bakulu ba madini batundile kuzimizya Biblia, bango bakasanine kalamo kabo kwa kukunga Biblia. Yehowa ntasigile muntu aba kintu kibe ntubya kwa kwezezya na beiswe. Biblia byatenda bunee: “Idagi lya Kalaga weitu likemana milyalya.”—Isaya 40:8.
TUMENYININE
Menya byeingi ku bubo bwasondelezyaga Kalaga asondelezya babo bamulume kusanza Biblia, bwakungile Biblia nu buni bwakitile kwa kukasya bantu bansania basome Biblia.
4. Biblia byalosya nazi u wabisanzizye
Lola VIDEO. Nu soma 2 Timoteo 3:16, kusila ibuzye mbuzya zalemba.
-
Kubuno banakantu u basanzile Biblia, kabamba kakizi kikumanwa Kitondo kya Kalaga?
-
Ndi wakatizia buno Kalaga akasile babo bantu basanze makengelo mage?
Mwemanizi wa mulimo asinga musanzi wage amusanzile mukanda, musagu ta wa musanzi tondo uli wa wozo wamusinga. Anga bubo, bantu basanzile Biblia, tabasanzile makengelo mabo tondo musagu watukaga kwa Kalaga.
5. Biblia byatingile mu tunkunku
Kubuno Kalaga u wasanzizye Biblia, twakatizia buno ntenasiga Kitondo kyage kizimine. Kutukila wakalazi, bakota bamozi nu bakulu ba madini batundile kuzimizya Biblia. Nu bakulu ba madini bagelekile kuzugila bantu kusoma Biblia. Aba buguni nu nsungyo za lukuo, bantu beingi babikile kalamo kabo gabibu aba mu menya ma kukua kwa kulanga Biblia. Kwa kumenya umozi kubo, lola VIDEO, nu kusila ibuzye mbuzya zalemba.
-
Kubuno wamenya bwikasanaga bantu kwa kukunga Biblia ndi kwakukasa nkasa za kusoma Biblia? Ku kabamba kakizi?
Soma Nimbo 119:97, nu kusila ibuzye luno lubuzya:
-
Kikizi kyasingaga bantu babike kalamo kabo gabibu anga mu menya ma kukua, kwa kwisula Biblia mu ingo mitendezi nu kubibegania?
6. Kitabu ku bantu bansania
Biblia u kitabu kimozi kise ky’isulwa mu mitendezi neingi nu kubeganibwa ku bantu beingi. Soma Misako 10:34, 35, nu kusila ibuzye zeno mbuzya:
-
Kabamba kabuni Kalaga ekutunda buno Kitondo kyage ky’isulwe mu mitendezi neingi nu kibeganibwe ku bantu beingi?
-
Kikizi kyakubogyabogya ku Biblia?
Bantu
9 ku 10
mu kisi kinsania
benasoma Biblia mu mitendezi zibek’ungwaga
Biblia bili mu
mitendezi zatinga
3.000
mu bitabu binsania aba bimozi kubyo
5.000.000.000
U ma kopi ma Biblia mese matikibwa.
Takuli kingo kitabu kili na ma kopi meingi kutinga Biblia.
NDI MUNTU AKUSOLELA BUNEE: “Biblia bili tugu kitabu kya wakalazi kyasanzilwe na banakantu.”
-
Buni buli makengelo mobe?
-
Bikizi u byalosya buno Biblia, kili Kitondo kya Kalaga?
MAKENGELO MANENE
Biblia, kili Kitondo kya Kalaga, nu atitikizizye buno bantu bansania bamone Biblia mu mitendezi zabo.
Mbuzya za kwikengelesya
-
Kutenda buno Kalaga asondelezyaga bantu basanze Biblia, kuli na bwisulilwa bukizi?
-
Kikizi kyakwangamia ku tunkunku twatingile muto Biblia, kwisulwa mu ingo mitendezi nu kubeganibwa kwabyo?
-
Kwa kumenya buno Kalaga akungile Biblia kwa kwezezya nobe, kwa kukita ujungwe buni?
LONDA LINGO
Historia za Biblia—kutukila ma kopi ma wakalazi nu kubasila ku bwisuzi bwa bino bindi.
Lola tunkunku tusatu tunene twatingile muto Biblia.
“Tunkunku Twatingile Muto Biblia” (Munara wa Mulinzi, Na. 4 2016)
Lola lingo buni bwabikile bantu kalamo kabo gabibu aba mu menya ma kukua kwa kwisula Biblia mu ingo mitendezi.
Ma kopi meingi ma Biblia mese matikibwa nu kwisulwa mu mitendezi neingi. Buni b’unakatizia buno musagu wage tawagalukizibwe?
“Ndi Musagu wa Biblia Wagalukizibwe aba Kwengelelwa?” (Musagu wa ku Enternete)
a Anga bwalosye isomo lya 07, muuza waswagibwa wa Kalaga u magala mage mekukambyaga kwa kukita bwekutunda.
