ISOMO 07

Yehowa Ekubezaga Buni?

Imbya odio aba lola video kwakusombola mutendezi

Ukukengela buno Yehowa ekubezaga buni? Mango unakengela buno atunganana kukumbaninwa, tondo eli bulazi nobe, anga buli nkeninkeni bulazi na beiswe. Aba unakengela buno eli na magala nunse nu nteli na buntu kishembe, anga bukubezaga lumpumpu. Lebelebe Yehowa ekubezaga buni? Kutingila Kitondo kyage Biblia, Yehowa atulosya nkumu zage. Atulosya tondi buno ekutwangaga.

1. Kabamba kakizi tatunamumona Kalaga?

Kubuno “Kalaga eli Muuza.” (Yoana 4:24) Yehowa nteli na mubili anga gono wa bisogo utukubezaga nago. Eli na mubili wa muuza utekumonekaga nu ekulamaga mwigulu, ga kiziki kitenamoneka na meiso meitu.

2. Yehowa eli na nkumu nkizi kishembe?

Aba buno Yehowa ntenamonekako, tondo eli Muntu lebelebe uli na nkumu nsoga zikutananizya babo bekubasila kumumenya. Biblia byatenda bunee: “Yehowa ekutunda kwisanana, aba ntasige basililila bage.” (Nimbo 37:28) Eli tondi “na kyombo, nu eli na mponga,” nunse ku babo bekusungibwa. (Yakobo 5:11) “Yehowa eli bwigi na babo beli na kabebe mu mutima, nu ekonia beli na mitima za kwiyania.” (Nimbo 34:18) Ndi wamenyaga buno bitukukitaga bikubogyabogya Yehowa aba kumwinia mutima? Muntu unsania wasombola kukita bwagi, nti ongya nu kwinia mutima wage. (Nimbo 78:40, 41) Tondo muntu wakita bili bisoga nti abogyabogya mutima wage.—Soma Misumo 27:11.

3. Buni bukulosyaga Yehowa buno atutunda?

Lukumu lutangi ku nkumu za Yehowa u lutundo. Lebelebe, “Kalaga eli lutundo.” (1 Yoana 4:8) Yehowa ekulosyaga buno atutunda kutingila Biblia nu bintu by’abumbile. (Soma Misako 14:17.) Kengela tangi bwatubumbile. Atukasile magala ma kumona idangi nsoga, atukasile matuzi makubogelabogela nimbo nu atukasile magala makungwa nsè z’idia. Ekutunda tubogelebogele kalamo.

TUMENYININE

Menya kikizi kyakambyaga Yehowa kwa kubumba bintu bya kwangamia. Lola lingo mu nzila nkizi Yehowa ekulosyaga nkumu zage zatananizya.

4. Muuza waswagibwa—u magala ma Kalaga mekukambyaga

Anga butukukambyaga maboko meitu kwa kukita mulimo, u bukukambyaga Yehowa muuza wage waswagibwa. Biblia byalosya buno muuza waswagibwa ta muntu, tondo magala ma Kalaga mekukambyaga kwa kukita kintu kishembe. Soma Luka 11:13 nu Misako 2:17, nu kusila ibuzye zeno mbuzya:

Kalaga ekukubulaga muuza wage waswagibwa ku bantu bansania bekumusega muuza wongo. Ndi ukukengela buno muuza waswagibwa uli muntu? Kabamba kabuni watenda bubo?

Yehowa ekukambyaga muuza wage waswagibwa kwa kukita bintu bya kwangamia. Soma Nimbo 33:6 nu 2 Petro 1:20, 21, nu kusila ibuzye luno lubuzya:

Mu nzila nkizi Yehowa akambizizye muuza wage waswagibwa?

5. Yehowa eli na nkumu zatananizya

Musa abezaga mukambi wa Kalaga, tondo alondile kumenya busoga Mubumbi wage. Ukinsa Musa amusegile bunee: “Wandolesie nzila zobe buno nikumenye.” (Kutuka 33:13) Kwa kwakula Musa, Yehowa amumenyesizye nkumu zage zimozi. Soma Kutuka 34:4-6, nu kusila ibuzye zeno mbuzya:

Yehowa amenyesizye Musa nkumu nkizi?
Nkumu nkizi za Yehowa zakutananizya nunse?

6. Yehowa ekwangaga bantu bage

Wakalazi, Baebrania bantu ba Kalaga babezaga ku bukobe ku nsi za Misri. Buni bwijungwaga Yehowa ku kabamba ka mbabazio zabo? Bika ODIO aba soma Kutuka 3:1-10. Nu kusila ibuzye zeno mbuzya.

ODIO: Yehowa Ab’angaga mu Mbabazio Zabo (2:45)

Musagu wongo wakwigisya kikizi ku bubo bukwijungwaga Yehowa gekumona banakantu mu mbabazio? (Lola milindi 7, 8.)
Ukukengela buno Yehowa ekutundaga lebelebe kukasya banakantu nu ndi eli na magala ma kukita bubo? Kabamba kakizi watenda bubo?