ISOMO 08
Unaba Mwida wa Yehowa
Yehowa ekutunda umumenye busoga. Ku kabamba kakizi? Alegela buno bukwendelela kwijigisya nkumu zage, bubo bwekukitilaga banakantu nu malagi mage ku nkungu zikuvwa, unu buwatunde kuba mwida wage. Ndi unaba lebelebe mwida wa Kalaga? (Soma Nimbo 25:14.) Unakita kikizi buno ube mwida wage? Biblia by’akula zezo mbuzya nu byalosya buno kuba mwida wa Yehowa kuli na mutali nunse.
1. Yehowa akumana buno ukite kikizi?
“Kundazi Kalaga, nu we amukunde.” (Yakobo 4:8) Bubo buli na bwisulilwa bukizi? Yehowa akumana ube mwida wage. Bantu bamozi bekumona buno buli bubibu kuba beida ba Kalaga kubuno ntekumonekaga. Tondo mu Kitondo kyage, Biblia, Yehowa atulosya binsania bitunatunda kumenya ku kabamba ka nkumu zage zinatukasya kuba beida bage. Gatukusoma musagu wa Yehowa uli mu Biblia ku kabamba keitu, bwida bweitu gamozi nage nti bwagugumana aba buno tatunamumonako.
2. Kabamba kakizi Yehowa u Mwida musoga u unaba nage?
Takuli muntu unakutunda anga bwakutunda Yehowa. Ekutunda ube na mbogimbogi nu umusege mu nkungu insania ziwijanizya lukasyo. Ukinsa Biblia byatusolela bunee: “Bikazi tubebe tweinyu tunsania kweli, kubuno wenyene ekumulanga.” (1 Petro 5:7) Mu nkungu insania, Yehowa eli kayekayeka kukasya, kubobelezya nu kungwilila beida bage.—Soma Nimbo 94:18, 19.
3. Twatunganana kukita kikizi kwa kuba beida ba Yehowa?
Yehowa ekutundaga bantu bansania, “tondo eli gamozi na bantu beisanana.” (Misumo 3:32) Kwa kuba mwida wa Yehowa, muntu atunganana kukita bitondo byekumona buno bili bisoga nu kutakita bibyo byekusombaga. Bango bekumonaga buno tabenakosya kulama bulingilingi na kanuni za Yehowa ku bubi nu busoga. Tondo, Yehowa eli na kyombo nunse. Ekwitabizyaga muntu unsania wamutunda lebelebe nu ukwidindika kumutananizya.—Nimbo 147:11; Misako 10:34, 35.
TUMENYININE
Menya buni b’unabasela kuba mwida wa Yehowa, nu kabamba kabuni eli Mwida musoga u unaba nage.
4. Abrahamu abezaga mwida wa Yehowa
Musagu wa Abrahamu uli mu Biblia (ekumanwa lingo Abramu) watukasya kumenya bwisulilwa bwa kuba mwida wa Kalaga. Soma musagu wa Abrahamu mu Kulinga 12:1-4. Nu kusila ibuzye zeno mbuzya:
-
Yehowa asegile Abrahamu kukita kikizi?
-
Yehowa amulagile kikizi?
-
Abrahamu akitile buni ku makakizio m’akasilwe na Yehowa?
5. Yehowa ekusega beida bage bakite kikizi?
Mambizi meingi tukutundaga beida beitu batukitile bukishembe.
-
Kikizi kiunatunda beida bobe bakukitile?
Soma 1 Yoana 5:3, nu kusila ibuzye luno lubuzya:
-
Yehowa ekusega kikizi ku beida bage?
Buno twanze Yehowa, twatunganana kugalukya misako zeitu. Soma Isaya 48:17, 18, nu kusila ibuzye luno lubuzya:
-
Kabamba kakizi Yehowa ekusega beida bage bakite migaluko?
Mwida musoga ekutukengelesya kukita bintu binatulisizya mutali nu kutulanga. U bukukita Yehowa ku beida bage
6. Yehowa ekukitaga kikizi kwa kukasya beida bage?
Yehowa ekukasya beida bage kulwania tunkunku twabo. Lola VIDEO, nu kusila ibuzye zeno mbuzya zalemba.
-
Buni bwakasizye Yehowa gono mukikulu uli mu video kwa kugalukya makengelo mage mabi nu bubo bwijungwaga?
Soma Isaya 41:10, 13, nu kusila ibuzye zeno mbuzya:
-
Yehowa alaga kukitila beida bage bansania kikizi?
-
Ukukengela buno Yehowa enaba Mwida wobe musoga? Kabamba kabuni?
Beida basoga bekukasya muntu mu nkungu za meijanizyo. Unu bwakukasye Yehowa
7. Kwa kuba mwida wa Yehowa, watunganana kwezezya nage
Ndi beida babili bekwezezya nkungu insania, bwida bwabo nti bwagugumana. Soma Nimbo 86:6, 11, nu kusila ibuzye zeno mbuzya:
-
Buni butunezezya na Yehowa?
-
Buni bukwezezyaga Yehowa na beiswe?
Tukwezezyaga na Yehowa kutingila masego; ekwezezyaga na beiswe kutingila Biblia
NDI MUNTU AKUSOLELA BUNEE: “Tabunakulungana kuba mwida wa Kalaga.”
-
Unakambya isanzo ikizi kwa kulosya buno tunaba beida ba Yehowa?
MAKENGELO MANENE
Yehowa ekutunda kuba Mwida wobe, nu ekakukasya kukita bubo.
Mbuzya za kwikengelesya
-
Yehowa ekukasya beida bage mu nzila nkizi?
-
Kabamba kakizi Yehowa ekusega beida bage kukita migaluko?
-
Ndi ukukengela buno buli bubibu nunse kuba mwida wa Yehowa? Kabamba kabuni?
LONDA LINGO
Unamona mutali mukizi kwa kuba mwida wa Kalaga?
“Yehowa—Kalaga Watunganana Kumenywa” (Munara wa Mulinzi, 15 Mwezi wa 2, 2003)
Menya buni buunagugumania bwida bwobe na Kalaga.
“Buni Buninaba Mwida wa Kalaga?” (Maulizo Yenye Vijana Wanaulizaka—Majibu ya Kuwasaidia
Londa buno umenye bwatendile mukikulu umozi buno bwida bwage gamozi na Yehowa bwamwonizye.
Ungwilila bukulosya basikila nu bakinga makengelo mabo ku bwida bwabo na Yehowa.
