ISOMO 09

Kunda Kalaga Kutingila Masego

Imbya odio aba lola video kwakusombola mutendezi

Ndi use wijanizya kusondelezibwa mu kalamo? Ndi uli na mbuzya za mutali ziunatunda kwakulwa? Ndi wijanizya kubobelezibwa aba kulindibwa mutima? Ndi unatunda kukunda (kusigelela) Yehowa? Masego u menakukasya ku bibyo binsania. Tondo nzila nkizi nsoga za kumusega kuzo? Ndi Kalaga ek’ungwililaga masego mansania? Unakita kikizi buno Kalaga ungwilile masego mobe? Kasi tulole.

1. Twatunganana kusega ku nazi, nu bikizi bitunasega?

Yesu igisizye buno twatunganana kusega tugu ku Tateiswe wa mwigulu. Yesu winyene asegaga ku Yehowa. Atendile bunee: “Segazi ku Kalaga anga bubuno; ‘Tateiswe uli mwigulu, . . .’” (Matayo 6:9) Mu nkungu zitwasega Yehowa, bwida bweitu gamozi nage nti bwagugumana.

Tunasega ku kabamba ka bintu binsania. Tondo, buno Kalaga aakule masego meitu, matunganana kuba bulingilingi na ntundo zage. “Ndi twasega kintu anga buli lutundo lwage nti atungwe.” (1 Yoana 5:14) Yesu akasanine musumo wa bintu bitwatunganana kusega ku kabamba kabyo. (Soma Matayo 6:9-13.) Tunasega ku kabamba ka meijanizyo meitu, tondo tatuneibilila kusima Kalaga ku bibyo by’atukitile nu kumusega buno akasye bango.

2. Buni butwatunganana kusega?

Biblia byatukakizya buno “mutendazi binsania bya mitima zeinyu [ku] . . . Kalaga.” (Nimbo 62:8) Kasi masego meitu matunganana kutuka mu mutima weitu nu bulingilingi na bubo butukukengela. Tunasega kw’iyuki nene aba kusega mu mutima, nako-nako nakutuli nu mu nkungu insania nu mu lukita lunsania lukulosya lwanzo ku Yehowa anga kwimana, kwikala gansi, kukoma mazu aba kutulama.

3. Kalaga ekwakulaga masego meitu mu nzila nkizi?

Ekwakulaga masego meitu mu nzila zatingana-tingana. Yehowa atukasile Kitondo kyage Biblia, mutukusanga mambizi meingi makulo ma mbuzya zeitu. Busomi bwa Kitondo kya Kalaga “bukukasa kikongolo menge.” (Nimbo 19:7; soma Yakobo 1:5.) Yehowa enatukasa bubobelelo bwa mutima ndi tuli mu mizangozango. Nu enakambya bakumbamizi bage kwa kutukasya mu nkungu za meijanizyo.

TUMENYININE

Menya buni b’unasega mu nzila zatananizya Kalaga, nu mutali uunamona kutingila masego.

4. Kalaga ekutundaga masego meitu mabe buni

Bikizi u byalosye buno masego meitu meitabizibwa na Kalaga aba tameitabizibwa? Lola VIDEO.

VIDEO: Ndi Kalaga Ek’ungwililaga Masego Mansania?—Kibe (2:42)

Yehowa ekutundaga tusege kweli. Soma Nimbo 65:2, nu kusila ibuzye zeno mbuzya:

Ukukengela buno Wozo “ukungwaga masego” ekutunda usege kweli? Kabamba kakizi watenda bubo?

Ndi twatunda buno Kalaga ungwilile masego meitu, twatunganana kulama bulingilingi na kanuni zage. Soma Mika 3:4 nu 1 Petro 3:12, nu kusila ibuzye luno lubuzya:

Twatunganana kukita kikizi buno Yehowa ungwilile masego meitu?

Mu nkungu za bita, bakoloboyo ba ndenge ibili, bekusega buno bakinde bita. Ndi bunakulungana buno Kalaga aakule masego mabo?

5. Masego meitu matunganana kutuka mu mutima

Bantu bamozi beigisizibwe kusubilila masego mamozi tugu. Tondo ndi Kalaga ekutundaga tusege bubo? Soma Matayo 6:7, NWT, nu kusila ibuzye luno lubuzya:

Buni b’unabembuka ‘kusubilila bitondo bibyo-bibyo lingo’ mu masego mobe?

Na busi na busi, kengela mponga imozi z’ukumona mu kalamo kobe nu usime Yehowa ku kabamba ka mponga zezo. Ndi na busi na busi mu izinga ukumusima ku mponga z’akukitile, nti wasege ku kabamba ka bitondo mutubakamo byatingana-tingana kuteli kusubilila kimozi.

Tata musoga ekutundaga mwana wage amusolele bikutuka mu mutima wage. Yehowa ekutunda nuwe tusege kweli bitondo bikutuka mu mutima weitu

6. Masego meli lukaso kutuka kwa Kalaga

Mu nzila nkizi masego menatukasa magala mu nkungu nsoga nu mu nkungu mbibu? Lola VIDEO.

VIDEO: Masego Mekutukasya mu Nkungu za Malendeko (1:32)

Biblia byalosya buno masego menatukasa bubobelelo bwa mutima. Soma Bafilipi 4:6, 7, nu kusila ibuzye zeno mbuzya:

Aba buno masego tamenasila mankunku mansania matuli namo, tondo menatukasya mu nzila nkizi?
Bikizi biunatunda kusega ku kabamba kabyo?

Ndi wamenyile?

Kitondo “amena” kisulwa buno “bube bubo” aba “u buligo.” Kutukila wakalazi mu nkungu za Biblia, bakumbamizi ba Kalaga bakambyaga kitondo “amena” kuzinda kwa masego.—1 Nkiko 16:36.

7. Ibikile nkungu za kusega

Mu nkungu imozi ndi tuli na byeingi byakukita, tuneibilila kusega. Yesu akataga masego na bukuti bugezye gani? Soma Matayo 14:23 nu Marko 1:35, nu kusila ibuzye zeno mbuzya:

Yesu akitaga kikizi kwa kwibikila nkungu za kusega?
Nkungu nkizi z’unamona nsoga kusega kuzo?

NDI MUNTU AKUSOLELA BUNEE: “Masego meli tugu anga musumbo, ukutenda kuli tugu kuzimizya nkungu, kubuno masego tamenakasya muntu.”

Unatenda buni?

MAKENGELO MANENE

Masego matuka mu mutima mekutukasya kugugumania bwida bweitu gamozi na Kalaga, mekutukasa bubobelelo bwa mutima nu magala matwijanizya kwa kutananizya Yehowa.