ISOMO 16
Yesu Akitaga Kikizi G’abezaga mu Kisi?
Bantu beingi bekukengelaga buno Yesu eli anga mwana uten’itendela, aba mulengania uli na menge aba muntu wakule. Tondo ndi tunamenya byeingi ku kabamba kage kwa kwijigisya kalamo kage ka ga kisi? Mu lilino isomo twajigisye bitondo byeingi bya mutali ku bibyo byakitile Yesu nu twamone buni bubinatukasya.
1. Yesu abezaga na mulimo mukizi munene?
Mulimo munene wa Yesu wabezaga ‘kusambala musagu musoga wa bukota bwa Kalaga’ (Soma Luka 4:43.) Asambalaga musagu musoga wa buno Kalaga ek’imika bukota aba guvernema zikasila tubebe tunsania twa banakantu. a Yesu idindikile kusambala gono musagu wa bubobelelo mu miaka isatu nu kyeindi.—Matayo 9:35.
2. Miganogano zakilile Yesu zalosizye kikizi?
Biblia byatenda buno ‘Kalaga alosizye bwangato mu Yesu . . . azindilizizie migeleko, miganogano nu tulolesio.’ (Misako 2:22) Kutingila magala ma Kalaga, Yesu abezaga na magala ma kuzugila kisoa, kulisya bantu beingi konia basambi, aba kuyukya bakuzi. (Matayo 8:23-27; 14:15-21; Marko 6:56; Luka 7:11-17) Miganogano zakitile Yesu zalosizye bwasi-bwasi buno asingilwe na Kalaga. Zalosizye tondi buno Yehowa eli na magala ma kusila tubebe tweitu tunsania.
3. Tunajigisya kikizi kutingila kalamo ka Yesu?
Yesu anzaga Yehowa ku binsania. (Soma Yoana 8:29.) Yesu akitile binsania byamusegile Isé kukita, akitile bubo mu kalamo kage kansania aba buno bantu balondile kumuzugila kukita bubo. Alosizye buno bwakulungana ku banakantu kukambela Kalaga, inube mu nkungu mbibu. Kasi Yesu atusigile ‘kalolesio buno tuyange binyantilo bya masomoneno mage.’—1 Petro 2:21.
TUMENYININE
Lola buni bwasambalaga Yesu musagu musoga nu kukita miganogano.
4. Yesu asambalaga musagu musoga
Yesu akitaga lugendo lulazi mu nzila zizile na mukungu, kwa kusambala musagu musoga ku bantu beingi anga bwakosizye. Soma Luka 8:1, nu kusila ibuzye zeno mbuzya:
-
Ndi Yesu asambalilaga tugu bantu bavwaga kumungwilila?
-
Yesu akitaga kikizi kwa kwidindika kumona bantu?
Kalaga atendile wakalazi buno Masiya atungananine kusambala musagu musoga. Soma Isaya 61:1, 2, nu kusila ibuzye zeno mbuzya:
-
Buni bwazindilizizye Yesu bubo bulengania?
-
Ndi ukukengela buno bantu bekwijanizya k’ungwa ku musagu wongo musoga ono lelo?
5. Yesu igisizye bulili bwa mutali
Yesu asambalaga musagu musoga ku kabamba ka Bukota bwa Kalaga, nu igisizye tondi bulili bwa mutali. Lola bulili kishembe bwigisizye ku meigisya mage ma ku mwiduko. Soma Matayo 6:14, 34 nu 7:12, nu kusila ibuzye zeno mbuzya:
-
Yesu akasanine nsungu nkizi mu mamo masanzo?
-
Ukukengela buno nsungu zezo zinakasya bantu ono lelo?
6. Yesu akitile miganogano
Yehowa akasile Yesu magala ma kukita miganogano meingi. Kwa kumona muganogano umozi, soma Marko 5:25-34 aba lola VIDEO. Kusila ibuzye zeno mbuzya zalemba.
-
Mukikulu musambi watendelwa mu zeno video akatiziaga kikizi?
-
Kikizi kyakutananizya ku wono muganogano?
Soma Yoana 5:36, nu kusila ibuzye luno lubuzya:
-
Miganogano zakitile Yesu ‘zalongeka’ aba zalosya kikizi ku kabamba kage?
Ndi wamenyile?
Twamenya byeingi ku musagu wa Yesu kutingila bitabu 4 bya Biblia bikumanwa bitabu bya Injili—Matayo, Marko, Luka, nu Yoana. N’umozi kubasanzi ba bitabu bya Injili asanzile bitondo kishembe byatingana na bango ku kabamba ka Yesu. Ndi twasoma bibyo bitabu 4 nti twamona leno musagu wa kwangamia wa kalamo kansania ka Yesu.
-
MATAYO
u wasanzile kitabu kitangi kya Injili. Atendela meigisya ma Yesu. Tondo atendela nunse meigisya ma Yesu ku kabamba ka Bukota bwa Kalaga.
-
MARKO
u wasanzile kitabu kikeke kya Injili. Atendela-misagu za mbaselo neingi za kwangamia.
-
LUKA
atendela nunse mutali wa masego nu bubo bwakitilaga Yesu bakikulu.
-
YOANA
atendela nkumu neingi za Yesu kwa kusambala bubo bwezezyaga mambizi meingi na beida bage nu bango.
NDI MUNTU AKUSOLELA BUNEE: “Yesu abezaga tugu muntu musoga tondo ntabezaga Masiya.”
-
Buni buli makengelo mobe?
MAKENGELO MANENE
Yesu asambalaga musagu wa Bukota bwa Kalaga, akitaga miganogano nu anzaga Yehowa ku binsania.
Mbuzya za kwikengelesya
-
Yesu abezaga na mulimo mukizi g’abezaga mu kisi?
-
Miganogano zakitile Yesu zalosya kikizi?
-
Bulili bukizi bwa mutali bwigisizye Yesu?
LONDA LINGO
Yesu asambalaga nunse musagu mukizi?
“Bukota bwa Kalaga—Buli na Bwisulilwa Bukizi ku Yesu” (Munara wa Mulinzi, 1 Mwezi wa 10, 2014)
Lola kabamba kakizi tunakatizia buno miganogano zakitile Yesu zabezaga za bulili.
“Tunajigisya Kikizi ku Miganogano—Zakitile Yesu?” (Munara wa Mulinzi, 15 Mwezi wa 7, 2004)
Lola buni bwagalukile kalamo ka wamulume umozi g’ijigisizye bubo bwikasanine Yesu ku kabamba ka bango.
“Natundaga Nunse Kalamo Kane” (Munara wa Mulinzi, 1 Mwezi wa 10, 2014)
Lola mbaselo nene za mulimo wa Yesu zalongekwa kulembana na nkungu.
“Mbaselo Nene za Kalamo ka Yesu ga Kisi” (Tafsiri ya Ulimwengu Mupya, Apandise A7)
a Isomo 31-33 zatendele byeingi ku kabamba ka Bukota bwa Kalaga.
