ISOMO 17
Yesu Eli na Nkumu Nkizi?
Kubuno tuse twijigisya byeingi ku kabamba ka bibyo byatendile Yesu nu bibyo byakitile g’abezaga mu kisi, twatendele leno nkumu zage zinatukasya kuba beida ba Isé, Yehowa. U nkumu nkizi gazisamba? Nu buni butunajanga Yesu mu kalamo keitu?
1. Yesu asusania Isé mu nzila nkizi?
G’abezaga Yesu mwigulu, alolaga bindi binsania bibyo byakitaga Isé, nu ijigisizye byeingi kweli mu miaka neingi. Ukinsa ekukengelaga, ekwijungwaga nu kukita anga Isé. (Soma Yoana 5:19.) Lebelebe Yesu ekulosyaga nkumu za Isé mu nzila zasililila ukinsa atendile bunee: “Wozo wammonako, nti amona ku Tatane.” (Yoana 14:9) Bukwijigisya kumenya nkumu za Yesu, u buwabasile kumenya Yehowa busoga. Kubuno, Yesu akwilaga bantu kyombo mu mbabazio zabo, bubo bwalosya buno Yehowa ekutwangaga.
2. Buni bwalosizye Yesu buno atunda Yehowa?
Yesu atendile bunee: “Bwatunganana kisi kimenye buno nkutunda Tatane. Ububo nkukita binsania anga bwankakizizie Tatane.” (Yoana 14:31) G’abezaga Yesu mu kisi, alosizye lutundo lwage lunene ku Isé kwa kumwanza aba mu nkungu zabezaga mbibu kukita bubo. Kubuno Yesu atundaga nunse Isé ukinsa asambalilaga bango ku kabamba kage nu kukasya bantu babe beida bage.—Yoana 14:23.
3. Mu nzila nkizi Yesu alosizye buno atunda banakantu?
Biblia byatenda buno ku kabamba ka Yesu: “Mbogimbogi zane zabezaga nunse . . . [ku] bantu.” (Misumo 8:31) Alosizye lutundo lwage ku bantu kwa kubalindya mutima nu kubakasya. Akitaga miganogano ta kwa kulosya tugu buno abezaga na magala tondo kwa kulosya kyombo. (Marko 1:40-42) Akitilaga bantu bansania mponga nu ntabezaga na bulundulundu. Bitondo byage byakasile kilemanizio nu kubobelezia babo babezaga na mutima musoga wa kumungwilila. Lutundo lwamusingile kwitabizya kusungibwa nu kukua ku kabamba ka banakantu bansania. Tondo Yesu ekutundaga nunse babo bekulemba meigisya mage.—Soma Yoana 15:13, 14.
TUMENYININE
Ijigisye byeingi ku nkumu za Yesu nu lola buni b’unalosya lutundo nu mponga anga bwalosizye Yesu.
4. Yesu ekutundaga Isé
Musumo wa Yesu watulosya buni butunalosya lutundo lweitu ku Kalaga. Soma Luka 6:12 nu Yoana 15:10; 17:26. Kusila kusoma isanzo imozi lwabusio lwa kutinga ku ingo, ibuzye luno lubuzya:
-
Buni butunalosya buno twatunda Yehowa anga Yesu?
Yesu atundaga Isé wa mwigulu nu mambizi meingi ezezyaga nage mu masego
5. Yesu ekutundaga banakantu
Yesu abikaga meijanizyo ma bango ga kiziki kitangi. Aba mu nkungu zabezaga ese akutwa, tondo akambyaga nkungu nu magala mage kwa kukasya bantu. Soma Marko 6:30-44, nu kusila ibuzye zeno mbuzya:
-
Mu nzila nkizi Yesu alosizye buno azangelagazangelaga bango mu musagu wono?—Lola milindi 31, 34, 41, nu 42.
-
Kikizi kyasingaga Yesu kukasya bantu?—Lola mulindi 34.
-
Kubuno Yesu ekulosyaga nkumu za Yehowa kasi bubo bwatwigisya kikizi ku kabamba ka Yehowa?
-
Mu nzila nkizi tunajanga Yesu kwa kuzangelazangela bango?
6. Yesu eli na mponga
Yesu alosyaga mponga aba buno ntabezaga na bintu byeingi nu ekutunda nu beiswe tulosye mponga. Soma Misako 20:35, nu kusila ibuzye luno lubuzya:
-
Bulingilingi na bwatendile Yesu, kikizi kinatukasya kuba na mbogimbogi?
Lola VIDEO, nu kusila ibuzye luno lubuzya lwalemba.
-
Mu nzila nkizi tunalosya bango mponga aba buno tatuli na bintu byeingi?
Ndi wamenyile?
Biblia byatwigisya buno tusege Yehowa mu izina lya Yesu. (Soma Yoana 16:23, 24.) Ndi twasega mu nzila zezo, nti twalosya lusimo lweitu ku bubo bwakitile Yesu kwa kutukasya kuba beida ba Yehowa.
NDI MUNTU AKUSOLELA BUNEE: “Kalaga ntekutwangaga mu mbabazio zeitu.”
-
Kubuno Yesu alosyaga nkumu za Isé, kasi mu nzila nkizi bibyo binsania byakitaga byalosya buno Yehowa ekutwangaga?
MAKENGELO MANENE
Yesu ekutundaga Yehowa nu banakantu. Kubuno Yesu asusania Isé, kasi b’ukwendelela kumenya Yesu u buwabasile kumenya Yehowa busoga.
Mbuzya za kwikengelesya
-
Buni butunalosya buno twatunda Yehowa anga bubo bwakitile Yesu?
-
Buni butunalosya buno twatunda banakantu anga bubo bwakitile Yesu?
-
Nkumu nkizi za Yesu zakubogyabogya nunse?
LONDA LINGO
Lola nkumu kishembe za Yesu zitunajanga.
“Ube na Zeno Nkumu kwa Kweiga Yesu . . ” (Yesu—Ni Njia, Kweli, na Uzima, Ukurasa wa 317)
Lola kabamba kakizi twijanizya kusega mu izina lya Yesu.
“Kabamba Kakizi Tusege mu Izina lya Yesu?” (Munara wa Mulinzi, 1 Mwezi wa 2, 2008)
Ndi Biblia byatendela lukita lwa mubili wa Yesu?
Tunajigisya kikizi kutingila lwanzo lwalosyaga Yesu ku bakikulu?
“Lwanzo nu Lutanuno: Makakizio Mabili ma Kalaga” (Munara wa Mulinzi, 1 Mwezi wa 9, 2012)
