ISOMO 22
Buni B’unasambalila Bango Musagu Musoga?
Kubuno ukwijigisya bulili bwa Biblia, mango unakengela bunee: ‘Muntu unsania atunganana k’ungwa ku bubuno bulili!’ Lebelebe, bantu bansania batunganana kubumenya! Mango unakua boba kusambalila bango bibyo biukwijigisya. Tulole buni b’unakinda boba bwongo nu kulinga kusambala musagu musoga wa Biblia kwa mbogimbogi.
1. Buni b’unasambalila bantu bawamenyana nabo bibyo biukwijigisya?
Beigisibwa ba Yesu batendile bunee: “Tatunavwama kusiga kutenda butwamonineko nu butungule kubo.” (Misako 4:20) Bamonile bulili bwa Biblia buli bwa mutali nunse, ukinsa batundile kusambalila bantu beingi musagu wongo. Ndi nugwe ukwijungwa bubo? Ndi u buligo, kasi, lola nzila ziunasolela bantu ba kikanga kyobe aba bilemba byobe, kwa lwanzo bibyo biukwijigisya.—Soma Bakolosayi 4:6.
B’unalinga kusambala
-
G’ukwezezya na muntu wa kikanga kyobe, lisya musagu wa Biblia kwa kutenda bunee: “Najigisizye kitondo kisoga nunse mu lino izinga.”
-
Kambya isanzo lya Biblia kwa kubobelezia munyobe uli musambi aba uli na mizangozango.
-
Solela munyobe na mulimo wakubuzya ku kabamba ka bibyo biwajigisizye mu Biblia aba ku mikundamano mu izinga.
-
Losya bilemba byobe site za Enternete za jw.org.
-
Umane bango ku igisyo lyobe lya Biblia aba ubalosye buni bubenasega igisyo lya Biblia ku Enternete kutingila jw.org.
2. Kabamba kakizi buli busoga nunse kwibikila kilumbilo kya kusambala gamozi n’ikundamano?
Beigisibwa ba Yesu tabazindide tugu kusambalila musagu musoga ku bantu babamenyile. Yesu “abasingile babili babili lwabusio lwage ku mwino na mwino” kusambala. (Luka 10:1) Kulongekwa bubo mu mulimo wa busambazi kwakasile bantu beingi kiziki kya k’ungwa musagu musoga. Kusambala gamozi kwalisizye lingo beigisibwa ba Yesu mbogimbogi nene. (Luka 10:17) Ndi unatunda kwibikila kilumbilo kya kusambala gamozi n’ikundamano?
TUMENYININE
Lola buni butunakinda boba bwa kusambala nu b’unamona mbogimbogi kwa kusambalila bango musagu musoga.
3. Yehowa abe gamozi nobe
Bantu bamozi bekutundaga kusambala, tondo mango benakua boba kumoneka na bantu. Aba benakengela buni bwakite bantu kusila k’ungwa ku musagu wabo.
-
Ndi ukukua boba kusambalila bango bibyo biukwijigisya? Kabamba kakizi?
Lola VIDEO, nu kusila ibuzye luno lubuzya lwalemba.
-
Buni bwakitile gono musikila nu babano bakinga kwa kukinda boba bwabo?
Soma Isaya 41:10, nu kusila ibuzye luno lubuzya:
-
Buni bunakukasya masego ndi ukukua boba kusambala?
Ndi wamenyile?
Beingi ku Balongeki ba Yehowa bakengelaga buno tabenakosya kusambalila bango musagu musoga. Anga Sergey, imonaga buno ntenakosya kwezezya na bango nu buli bubibu kukita bubo. Tondo kusila kwijigisya Biblia, atendile bunee: “Aba buno nabezaga na boba, tondo nalingile kwezezya na bango ku kabamba ka bibyo binajigisyaga. Nangamile kumona buno kwezezya na bango ku kabamba ka Biblia kwankasizye kwidemanina. Kwalindizye bukatizio bwane.”
4. Ube na lwanzo
G’ukusambala musagu musoga, ntulonde kumenya tugu bitondo biwatende, tondo londa kumenya buni buwatende bitondo byongo. Soma 2 Timoteo 2:24 nu 1 Petro 3:15, nu kusila ibuzye zeno mbuzya:
-
Buni b’unakambya mamo masanzo g’ukwezezya na bango ku kabamba ka Biblia?
-
Mango bantu bamozi ba kikanga kyobe aba bilemba byobe tabenaziga k’ungwa ku musagu wobe. Watunganana kukita kikizi? Nu ntwatunganana kukita kikizi?
-
Kabamba kakizi bunaba busoga kukambya mbuzya kwa menge kuteli kukandika bantu bakatizie bibyo biukutenda?
5. Kusambala musagu musoga kukulisya mbogimbogi
Yehowa akasile Yesu mulimo wa kusambala musagu musoga. Buni bwamonaga Yesu mulimo wongo? Soma Yoana 4:34, nu kusila ibuzye zeno mbuzya:
-
Kulya idia nsoga kukukasya kalamo keitu nu kukutulisizya mbogimbogi. Kabamba kakizi Yesu atendile buno kukita ntundo za Kalaga anga kusambala musagu musoga kwalingimana na kulya idia?
-
Ukukengela buno tunamona mbogimbogi nkizi mu kusambala musagu musoga?
Nsungu
-
Mu mikundamano za munkatini mw’izinga, lola buni b’unalinga kwezezya na bango.
-
Solela mwigisya wobe wa Biblia buno ukutunda kuba mwigisibwa ku mikundamano za munkatini mw’izinga. Beteko aba byaza biwatingye ku mikundamano, byakukasye kumenya buni b’unakita kwa kusolela bango bibyo biukwijigisya.
-
Kambya kibe “Ndi Muntu Akusolela Bunee” aba “Muntu Enakubuzya Bunee” bili mu kino kitabu kwa kumenya buni b’unakula mbuzya zikubuzibwa nunse nu kwakula muntu unalisya ntubya ku mwezezyo.
MUNTU ENAKUBUZYA BUNEE: “Misagu za bindi?”
-
Buni b’unakambya kikyo kiziki kwa kusolela wozo muntu bibyo biwajigisizye mu igisyo lyobe lya Biblia?
MAKENGELO MANENE
Kusambalila bango musagu musoga kukulisya mbogimbogi. Nu ndi walinga kukita bubo wamone buno tabuli bubibu anga b’ukukengela.
Mbuzya za kwikengelesya
-
Kabamba kakizi watunganana kusambalila bango musagu musoga?
-
Buni b’unakita bubo mu nzila za lwanzo?
-
Buni b’unakinda boba bu uli nabo ku kabamba ka kusambala?
LONDA LINGO
Lola nzila inazi za kusambala musagu musoga kwa kukambya karte za jw.org.
Ijigisye nkumu inazi zinakukasya kusambala musagu musoga.
“Ndi Uli Kayekayeka Kuba Muzubi wa Bantu?” (Munara wa Mulinzi, Mwezi wa 9, 2020)
Lola musumo umozi wa Biblia unakukasya kusambala musagu musoga aba buno uki mukinga aba musikila.
Menya buni b’unezezya musagu wa Biblia gamozi na bantu ba kikanga betemenyaga Yehowa.
“Kwitubya ku Mitima za Bantu ba Kikanga Beteli Bakatizia” (Munara wa Mulinzi, 15 Mwezi wa 3, 2014)
