Yesu igisizye buno Bakristo basegwa kututikwa. (Soma Matayo 28:19, 20.) Tondo kututikwa kuli na bwisulilwa bukizi? Nu muntu atunganana kukita kikizi kwa kuzindilizya kikyo kilumbilo?

1. Kututikwa kuli na bwisulilwa bukizi?

Kitondo “kututikwa” kyatukila mu mutendezi wa Kigiriki, kisulwa buno “kwisa muntu we unsania” mu mazi. G’atutikilwe Yesu, bamwisile we unsania mu luuzi lwa Yordani, nu kusila ‘atukile mu luuzi.’ (Marko 1:9, 10) Anga Yesu, Mukristo unsania wa bulili ekututikwa kwa kwiswa we unsania mu mazi.

2. Ndi muntu atutikwa nti alosya kikizi?

Ndi muntu atutikwa nti alosya buno ese ikasana we winyene ku Kalaga Yehowa. Buni bukwikasana muntu ku Kalaga? Lwabusio lwa kututikwa, muntu nti akita masego, mu mamo masego nti asolela Yehowa buno ekutunda kumukambela milyalya. Akite idagano lya kukumbamina tugu Yehowa nu kukita ntundo zage u kwabe ga kiziki kitangi mu kalamo kage. Isombolela we winyene ‘kwituna . . .  nu kuyanga’ meigisya nu musumo wa Yesu. (Matayo 16:24) Kwikasana ku Kalaga nu kututikwa kukukasya muntu kugugumania bwida bwage gamozi na Yehowa nu gamozi na banyage Bakristo.

3. Muntu atunganana kukita kikizi lwabusio lwa kututikwa?

Lwabusio lwa kututikwa, muntu atunganana kwijigisya kumenya Yehowa nu kugugumania bukatizio bwage mweli. (Soma Baebrania 11:6.) Bukukula bumenyinino nu bukatizio bwobe, u buwatunde Yehowa nunse. Lebelebe, unatunda kusambala ku kabamba kage nu kulama bulingilingi na kanuni zage. (2 Timoteo 4:2; 1 Yoana 5:3) Ndi muntu ekulama “anga bwatunganana ku Mukota nu kumutananizya nunse” enakata bulamuzi bwa kwikasana ku Kalaga nu kututikwa.​—Bakolosayi 1:9, 10. a

 TUMENYININE

4. Bitunajigisya kutingila kututikwa kwa Yesu

Soma Matayo 3:13-17 kwa kumenya byeingi ku kabamba ka kututikwa kwa Yesu. Kusila ibuzye zeno mbuzya:

• Ndi Yesu atutikilwe g’abezaga eki kalenge?

• Buni bwatutikilwe? Ndi bamutogizye mazi g’itoe?

Kusila kututikwa, Yesu alingile kukita mulimo munene w’akasilwe na Kalaga. Soma Luka 3:21-23 nu Yoana 6:38, nu kusila ibuzye luno lubuzya:

• Kusila kututikwa, Yesu abikile mulimo mukizi ga kiziki kitangi mu kalamo kage?

5. Unazindilizya kilumbilo kyobe kya kututikwa

Mango mu kulinga unakua boba kwikasana ku Kalaga nu kututikwa. Tondo, unakula bukebuke mu mutima nu kwidemanina kwa kwibikila kikyo kilumbilo. Kwa kumenya buni bwakitile bantu bamozi, lola VIDEO.

Soma Yoana 17:3 nu Yakobo 1:5, nu kusila ibuzye luno lubuzya:

• Kikizi kinakasya muntu kwikungika ku kabamba ka kututikwa?

1. Tukwikasana ku Yehowa kwa kumusolela mu masego buno tukutunda kumukambela milyalya

2. Gatwatutikwa nti twalosya bango buno tuse twikasana ku Kalaga

 6. Kututikwa kwalosya buno muntu ingila leno mu kikanga kya Yehowa

Gatwatutikwa, nti twingila leno mu kikanga kya kisi kinsania kili na bumozi. Aba buno twatukila mu biziki byatingana-tingana nu mu bilongo byatingana-tingana, beiswe bansania tuli na bukatizio bumozi nu tukulama bulingilingi na kanuni zimozi. Soma Nimbo 25:14 nu 1 Petro 2:17, nu kusila ibuzye luno lubuzya:

• Kututikwa kuli na mutali mukizi ku bwida bwa muntu gamozi na Yehowa nu bango Bakristo bekumukumbamina?

 MAKENGELO MANENE

Yesu igisizye buno Bakristo batunganana kututikwa. Kwa kuzindilizya kikyo kilumbilo, muntu atunganana kugugumania bukatizio bwage ku Yehowa, kulama bulingilingi na kanuni zage nu kwikasana we winyene ku Kalaga.

Mbuzya za kwikengelesya

• Kututikwa kuli na bwisulilwa bukizi, nu kabamba kakizi buli bwa mutali kututikwa?

• Kwikasana ku Kalaga nu kututikwa kwalosya kikizi?

• Muntu atunganana kukita kikizi lwabusio lwa kwikasana ku Kalaga nu kututikwa?