Ndi use wakwilwa na mutundwa wobe? Mu zezo nkungu za kabebe, mango uneibuzya bunee: ‘Kikizi kikubasila muntu ndi akua? Ndi kuli kilemanizio kya kumonana lingo na batundwa beitu busi bumozi?’ Mu lilino isomo nu lilyo lyalemba, wamone makulo ma Biblia mekubobelezia.

1. Kikizi kikubasila muntu ndi akua?

Yesu alengemanizizye lukuo na kabwebwe. Ndi muntu eli mu kabwebwe, u kutenda buno azombama nunse, ntenamenya bibyo bikutinga mu ntungo mwage. Buni bwalingimana lukuo na kabwebwe? Ndi muntu akua ntenungwa lubaba, ntenaba na malima aba buno atundaga nunse bilemba byage nu bantu ba kikanga kyage. “Bakuzi tabeizi kena,” u bwatenda Biblia.​—Soma Musambazi 9:5.

2. Kumenya bulili ku kabamba ka bakuzi kwatulisizya mutali mukizi?

Bantu beingi bekukua lukuo boba​—nu bango bekukua bakuzi boba! Tunabobelezibwa na meigisya ma Biblia ku kabamba ka bakuzi. Yesu atendile bunee: “Bulili . . . bwamukandule.” (Yoana 8:32) Madini mamozi mekwigisyaga buno ndi muntu akua, nti kuli kintu mweli kikusigalaga mu kalamo. Tondo Biblia tabigisya bubo. Bubo bwalosya buno bakuzi tabekusungibwaga. Nu lingo, kubuno bakuzi tabeizi kampi, kasi tabenatukitila bubi. Ukinsa tatwatunganana kubobelezia mitima za bakuzi aba kubakumbamina nu tatwatunganana kubasegela.

Bantu bamozi bekutenda buno benezezya na bakuzi. Tondo tabunakulungana. Anga butuse twamenya, bakuzi “tabeizi kena.” Babo bekukengelaga buno bekwezezyaga na batundwa babo bakule, lebelebe bekwezezyaga na basumbu bekwisusanizya na babo bantu bakule. Kasi, kumenya bulili ku kabamba ka lukuo kwatulanga na basumbu. Yehowa atuzugila tatulonde kwezezya na bakuzi kubuno izi buno kwezezya na basumbu kunatukita bubi.​—Soma Kukokomezia Mulembe 18:10-12.

3. Ijigisye bulili ku kabamba ka lukita lwa bakuzi

Mu kisi kinsania, bantu beli na bukatizio bwatingana-tingana ku kabamba ka lukita lwa bakuzi. Tondo bubo bukatizio bunsania tabunaba bwa bulili.

• Bantu beli na bukatizio bukizi bwatingana-tingana ku kabamba ka lukita lwa bakuzi kuko k’ukulama?

 4. Kumenya bulili ku kabamba ka lukuo kwatulisizya mutali

Kumenya bulili ku kabamba ka lukuo kwatukandula ku boba bwa bakuzi. Soma Musambazi 9:10, nu kusila ibuzye luno lubuzya:

• Ndi bakuzi benatukitila bubi?

Kumenya tondi bulili bwa Biblia kwatulanga ku bumba bwa kubobelezia mitima za bakuzi kwa kukita kabwasa aba kubakumbamina. Soma Isaya 8:19 nu Kulolesibwa 4:11, nu kusila ibuzye luno lubuzya:

• Ukukengela Yehowa ekwijungwaga buni gekumona muntu ekukumbamina bakuzi aba ekulonda lukasyo lwabo?

5. Kwijigisya bulili ku kabamba ka lukuo kwatubobelezia

Bantu beingi beigisizibwe buno, gabekakua bekasungibwa ku kabamba ka misako mbi zibakitile wakalazi. Tondo twabobelezibwa kumenya buno takuli muntu ukusungibwa kusila kukua​—inube wozo wakitaga bwagi bunene. Soma Baroma 6:7, nu kusila ibuzye luno lubuzya:

• Anga bubo butwasoma mu Biblia, wozo wakua nti akandulwa mu bwagi aba nti atikibwa katati ka bwagi bwage, ukukengela buno ndi muntu akua enasungibwa ku makosa makitile wakalazi?

B’ukumenya Yehowa nunse, u buwamenye buno ntekasungya aba busi bumozi bakuzi. Soma Kukokomezia Mulembe 32:4 nu 1 Yoana 4:8, nu kusila ibuzye zeno mbuzya:

• Ndi Kalaga uli na nkumu zatendelwa mu mano masanzo enasungya bakuzi?

• Ndi wamona buno bulili ku kabamba ka lukuo bukubobelezia? Kabamba kakizi?

 MAKENGELO MANENE

Ndi muntu akua, nti ntekulama lingo. Bakuzi tabekusungibwaga, aba tabenatukitila bubi.

Mbuzya za kwikengelesya

• Kikizi kikubasila muntu ndi akua?

• Kumenya bulili ku kabamba ka lukuo kwatulisizya mutali mukizi?

• Kumenya bulili ku kabamba ka lukuo kwatubobelezia mu nzila nkizi?