ISOMO 34

Buni Butunalosya buno Twatunda Yehowa?

Imbya odio aba lola video kwakusombola mutendezi

Ndi wamonile buno use watunda nunse Kalaga kutukila busi buwalingile kwijigisya Biblia? Ndi watunde kwendelela kugugumania bwida bwobe gamozi nage? Gekumona Yehowa buno wamutunda nunse, unu bwakutunde nugwe nu kukwanga. Buni b’unalosya buno wamutunda?

1. Buni butunalosya Yehowa buno twamutunda?

Tukulosya buno twatunda Yehowa kwa kumwanza. (Soma 1 Yoana 5:3.) Ntekukandikaga muntu kumwanza. Tondo, akasa n’umozi ku beiswe kiziki kya kwisombolela kumwanza aba kilo. Kabamba kakizi? Kubuno Yehowa ekutunda tumulosye lwanzo lukutuka ku ‘mitima zeitu.’ (Baroma 6:17) Tunatenda lingo buno, ekutunda umwanze ta ku kabamba kabuno u buwatunganana tugu kukita, tondo kubuno wamutunda. Kyeindi 3 nu 4 kya kino kitabu kyakukasye kulosya lutundo lwobe ku Yehowa kwa kukita bibyo byekutunda nu kutakita bibyo byekusomba.

2. Kabamba kakizi bunaba bubibu kulosya Yehowa buno twamutunda?

“Tubebe twa muntu wisanana tuli twingi.” (Nimbo 34:19) Beiswe bansania tukulwania lukita lweitu lwa kutasililila. Tunalwania tondi mankunku ma mwido wa musanga, buteisanana aba tungo tubebe. Mango bunaba bubibu kukita bibyo byatusega Yehowa mu nkungu za malindiko. Ukinsa bunaba bubibu kwanza Yehowa mu nkungu zezo. Tondo, ndi widindika kukita bibyo byakusega Yehowa nti walosya buno wamutunda kutinga bingo binsania. Walosye buno uli mukatizia kweli nu we abe mukatizia kwobe. Ntekakusiga aba busi bumozi.—Soma Nimbo 4:3.

TUMENYININE

Lola kabamba kakizi Yehowa ekubogaboga ndi wamwanza, nu kikizi kinakukasya kusigala mukatizia kweli.

3. Lubuzya lwa mutali lwakulemanina nugwe

Bulingilingi na kitabu kya Yobu, Satana ntasitakile tugu Yobu tondo asitakile tondi bantu bansania bekutunda kukambela Yehowa. Soma Yobu 1:1, 6–2:10, nu kusila ibuzye zeno mbuzya:

Satana alosizye buno Yobu anzaga Yehowa ku kabamba kakizi?—Lola Yobu 1:9-11.
Satana atendile kikizi ku kabamba ka bantu bansania nu ku kabamba kobe tondi?—Lola Yobu 2:4.

Soma Yobu 27:5b, nu kusila ibuzye luno lubuzya:

Buni bwalosizye Yobu buno atundaga Yehowa lebelebe?

Yobu alosizye buno atunda Yehowa kwa kusigala mukatizia kweli

Tukulosya buno twatunda Yehowa kwa kusigala bakatizia kweli

4. Bogyabogya mutima wa Yehowa

Soma Misumo 27:11, nu kusila ibuzye zeno mbuzya:

Buni bukwijungwaga Yehowa gawalosya buno uli na menge kwa kumwanza? Kabamba kakizi?

5. Unaba mukatizia ku Yehowa

Lutundo lweitu ku Yehowa lukutusinga kusolela bango musagu wage. Bukatizio bweitu kweli bukutusinga kukita bubo aba mu nkungu mbibu. Lola VIDEO, nu kusila ibuzye zeno mbuzya zalemba.

VIDEO: Tendela Bukatizio Bwobe aba mu Nkungu Z’ukuzugilwa (5:09)

Ndi ukumona buno buli bubibu kusolela bango musagu ku kabamba ka Yehowa?
Mu zeno video, kikizi kyakasizye Grayson kukinda boba bwabezaga nabo?

Tabunaba bubibu kuba bakatizia ku Yehowa ndi twatunda bibyo byekutunda nu kutakita bibyo byekusomba. Soma Nimbo 97:10, nu kusila ibuzye zeno mbuzya:

Kulembana na bibyo biuse wijigisya, bikizi bikutundaga Yehowa, nu bikizi byekusombaga?
Buni b’unajigisya kutunda bili bisoga nu kusomba bibi?

6. Ndi twanza Yehowa nti twidisizya mutali

Kwanza Yehowa kukubezaga kusoga bindi binsania. Soma Isaya 48:17, 18, nu kusila ibuzye zeno mbuzya:

Ku makengelo mobe, ndi tunakatizia buno Yehowa izi bili bisoga kweitu bindi binsania? Kabamba kakizi?
Kwijigisya kwobe Biblia nu kumenya Yehowa Kalaga wa bulili, kwakulisizya mutali mukizi?

NDI MUNTU AKUSOLELA BUNEE: “Misako zane tazili za mutali ku Kalaga.”