ISOMO 35
Buni Butunakata Bulamuzi Busoga
Beiswe bansania tuli na bulamuzi butwatunganana kukata. Bulamuzi bumozi gesamba bulamuzi butunakata bunaba na mbaselo mbi aba nsoga ku beiswe aba ku bwida bweitu gamozi na Yehowa. Anga, tunakata bulamuzi bwa kumenya kuni kutwalame, buni butwakite kwa kumona musanga, nu ndi twasongane. Ndi twakata bulamuzi busoga, nti twabe na kalamo ka mbogimbogi nu nti twabogyebogye Yehowa.
1. Buni b’unakambya Biblia kwa kukukasya kukata bulamuzi busoga?
Lwabusio lwa kukata bulamuzi, sega Yehowa buno akukasye nu londa mu Biblia buno umenye buni buli makengelo mage. (Soma Misumo 2:3-6.) Yehowa ekulosyaga bwasi-bwasi milembe zinatukasya kukata bulamuzi kishembe. Kulemba milembe zongo mu nkungu zezo u bulamuzi busoga b’unakata.
Wakite buni ndi takuli milembe za Biblia zili bwasi-bwasi ku bulamuzi b’ukutunda kukata? Aba mu nkungu zezo Yehowa akusondelezye “mu nzila ziwatunganana kuyanga.” (Isaya 48:17) Buni bwenakita bubo? Kunaba kanuni zinakusondelezya. Kanuni za Biblia zili bulili bwa bulingilo bukulosya buni buli makengelo ma Kalaga. Tukumenya buni buli makengelo ma Kalaga ku kabamba ka kintu kishembe gatwasoma misagu zili mu Biblia. Gatwamenya buni buli makengelo ma Yehowa tunakata bulamuzi bukumubogyabogya.
2. Bikizi biwatunganana kukengela kubyo lwabusio lwa kukata bulamuzi?
Biblia byatenda bunee: ‘Mwiya menge ekutitika bwekwenda.’ (Misumo 14:15) Bubo bwisulwa buno, lwabusio lwa kukata bulamuzi twatunganana kwibikila nkungu za kukengela ku kabamba ka bibyo bitwasombole kukita. Kwa kusongolola bulamuzi kishembe ibuzye bunee: ‘Ninakambya kanuni nkizi za Biblia? Bulamuzi bukizi bunanilisizya bubobelelo bwa mutima? Bulamuzi bunakate bwabe na mbaselo nkizi ku bango? Kya mutali nunse, ndi bwabogyebogye Yehowa?’—Kukokomezia Mulembe 32:29.
Yehowa u watunganana kutulosya bikizi bili bibi nu bisoga. Ndi twamenyinina busoga milembe nu kanuni zage nu kwidindika kuzilemba, nti twabe na kalenganio kasoga. Kalenganio keitu u kekutukengelesya kumenya bikizi bili bibi nu bisoga. (Baroma 2:14, 15) Kalenganio k’igisibwa busoga katukasye kukata bulamuzi busoga.
TUMENYININE
Lola mu nzila nkizi kanuni za Biblia nu kalenganio keitu bikutukasya kukata bulamuzi.
3. Siga Biblia bikusondelezye
Buni bunatusondelezya kanuni za Biblia mu nkungu zitukukata bulamuzi? Lola VIDEO, nu kusila ibuzye zeno mbuzya zalemba.
-
Bukandulwa bwa kwisombolela buli na bwisulilwa bukizi?
-
Kabamba kakizi Yehowa atukasile bukandulwa bwa kwisombolela?
-
Atukasile kikizi kwa kutukasya kukambya bukandulwa bweitu bwa kwisombolela mu nzila nsoga?
Kwa kumona kanuni kamozi ka Biblia, soma Baefeso 5:15, 16. kusila lola buni b’unakambya ‘busoga nkungu zi uli nazo’ kwa . . .
-
kusoma Biblia bindi binsania.
-
kuba wamulume musoga aba mukikulu musoga, mubuti musoga aba mwana musoga.
-
kukundamana ku mikundamano za Kikristo.
4. Igisya kalenganio kobe kwa kukata bulamuzi busoga
Tabunaba bubibu kukata bulamuzi busoga ndi kuli milembe zili bwasi-bwasi. Tondo wakite buni ndi takuli milembe zili bwasi-bwasi? Lola VIDEO, nu kusila ibuzye zeno mbuzya zalemba.
-
Mu zeno video, kikizi kyakitile mubitu kwa kugomya (kwigisya) kalenganio kage nu kukata bulamuzi bukubogyabogya Yehowa?
Kabamba kakizi tatwatunganana kusega bango batukatile bulamuzi butwatungananine kukata? Soma Baebrania 5:14, nu kusila ibuzye zeno mbuzya:
-
Aba buno tabunaba bubibu kusega bango batukatile bulamuzi, tondo beiswe beinyene twatunganana kumenyinina kikizi?
-
Bikizi binakukasya kugomya kalenganio kobe nu kukata bulamuzi busoga?
Anga bukusondelezibwa muntu na karte, kalenganio keitu kekutukasya kukata bulamuzi ku bibyo bitwakite mu kalamo keitu
5. Kutya kalenganio ka bango
Bulamuzi butunakata bwatingana na bulamuzi bunakata bango. Buni butunalosya buno twakutya kalenganio ka bango? Kengela zeno nkita ibili:
Lukita 1: Mubitu umozi ukutundaga kwitonda akumukila mu ikundamano muli babitu bekwinaga mutima kumona ku bantu bekwitonda.
Soma Baroma 15:1 nu 1 Bakorinto 10:23, 24, nu kusila ibuzye zeno mbuzya:
-
Bulingilingi na mano masanzo mubitu enakata bulamuzi bukizi? Wakite kikizi ndi uli gamozi na muntu uli na kalenganio ketekutunda kukita bibyo byukukitaga?
Lukita 2: Mubuto izi buno Biblia tabyazugila kunua maku kwa kutalengelelwa, tondo akatile bulamuzi bwa kutanua maku. Amanwa ku mbaselo kishembe za kwibogyabogya nu amona mibuto bekunua maku.
Soma Musambazi 7:16 nu Baroma 14:1, 10, nu kusila ibuzye zeno mbuzya:
-
Kulembana na mano masanzo, mubuto enakata bulamuzi bukizi? Wakite kikizi ndi wamona muntu ekukita bibyo bitekuziga kalenganio kobe kukita?
Bikizi binakukasya kukata bulamuzi busoga?
1. Sega Yehowa akukasye kumenya buni buwakite.—Yakobo 1:5.
2. Londa mu Biblia nu mu bitabu byalemanina Biblia buno umone kanuni z’unakambya. Unabuzya tondi Bakristo bakula mu mutima.
3. Kengela mbaselo za bulamuzi b’ukukata ku kalenganio kobe nu ku kalenganio ka bango.
NDI MUNTU AKUSOLELA BUNEE: “Uli na bukandulwa bwa kukita binsania biukutunda. Ntwangane na bubo bwakengele bango?”
-
Kabamba kakizi buli busoga kumenya buni buli makengelo ma Kalaga nu ma bango bantu?
MAKENGELO MANENE
Tukukata bulamuzi busoga ndi twamenyinina buni buli makengelo ma Yehowa ku kabamba ka bibyo bitukukita nu kukengela ndi bulamuzi bweitu bwakasye bango aba kubinia mitima.
Mbuzya za kwikengelesya
-
Buni b’unakata bulamuzi bukubogyabogya Yehowa?
-
Buni b’unagomya aba kwigisya kalenganio kobe?
-
Buni b’unalosya buno wakutya kalenganio ka bango?
LONDA LINGO
Buni b’unakata bulamuzi bwagugumanie bwida bwobe gamozi na Kalaga?
“Kata Bulamuzi Bukukutya Kalaga” (Munara wa Mulinzi, 15 Mwezi wa 4, 2011)
Menyinina mu nzila nkizi Yehowa ekutukasaga nsungu.
Lola bikizi byakasizye wamulume umozi kukata bulamuzi bubibu.
Lola buni b’unabogyabogya Yehowa ndi takuli milembe zili bwasi-bwasi ku bibyo biwakite.
“Ndi Wijanizya Milemba za Biblia Bindi Binsania?” (Munara wa Mulinzi, 1 Mwezi wa 12, 2003)
