ISOMO 37
Biblia Byatenda Kikizi ku Kabamba ka Mulimo nu Musanga?
Ndi use walengelelwa na makengelo ma kulonda mulimo aba musanga? Bunaba bubibu kukukya meijanizyo meitu nu kukumbamina Yehowa anga bwatunganana. Biblia bili na nsungu zinatukasya.
1. Biblia byatenda kikizi ku kabamba ka mulimo?
Kalaga ekutunda tubogelebogele mulimo weitu. Biblia byatenda buno “takuli kingo kisoga kyamona muntu kutinga . . . kubogaboga na mulimo wage musoga.” (Musambazi 2:24) Yehowa ekukambaga nunse. Ndi tweiga Yehowa kwa kukamba na komanizia nti twamubogyebogye nu twamone mbogimbogi.
Buli busoga kukamba. Tondo tatwatunganana kubika mulimo weitu ga kiziki kitangi kutinga ikumbamimo lyeitu ku Yehowa. (Yoana 6:7) Yehowa atulaga buno ndi twabika ga kiziki kitangi ikumbamino lyeitu kweili nti akukye meijanizyo meitu ma mubili.
2. Biblia byatenda kikizi ku kabamba ka musanga?
Biblia byatenda buno ‘muntu ekulangwa na bikulo,’ tondo byatenda lingo buno musanga taunatulisizya mbogimbogi za bulili. (Musambazi 7:12) Ukinsa Biblia byatubula bunee: “Mubogeboge na bibyo bimuli nabyo” tondo tamutunde nunse bikulo. (Soma Baebrania 13:5.) Ndi tukubogelabogela bibyo bituli nabyo, tatwatambe mutima na makengelo makutunda kuba na byeingi. Nti twibembukya na nsombi za bintu biteli bya mutali. (Misumo 22:7) Nu nti twibembukya n’itega lya kwesa meija ma musanga nu bungilimizi bwa kutunda kuguma lubilu.
3. Buni butunalosya bango mponga na musanga weitu?
Yehowa eli Kalaga wa mponga, nu tukumujanga kwa kuba “kayikayika kukasana.” (1 Timoteo 6:18) Tunalosya mponga na musanga weitu kwa kukasya ikundamano nu kukasya babo beli mu meijanizyo, nunse Bakristo baneitu. Yehowa ekutananizibwaga nunse na makengelo masindika muntu kukasana, tondo ta nkindi za bikulo by’akasana. Gatwalosya bango mponga zatukila mweitu mu mutima, nti twamone mbogimbogi nu twabogyebogye Yehowa.—Soma Misako 20:35.
TUMENYININE
Lola mutali wa kuba na makengelo masoga ku kabamba ka mulimo nu kubogelabogela bibyo bituli nabyo.
4. Kutya Yehowa mu nzila zobe za kukita mulimo
Bwida bweitu gamozi na Yehowa bwatunganana kumoneka aba ku mulimo weitu. Lola VIDEO, nu kusila ibuzye zeno mbuzya zalemba.
-
Mu zeno video, kikizi kyakubogyabogya ku lukita lwa John ku mulimo nu misako zage?
-
Akitile kikizi kwa kwendelela kubika mulimo ga kiziki kyago?
Soma Bakolosayi 3:23, 24, nu kusila ibuzye luno lubuzya:
-
Kabamba kakizi makengelo matuli namo ku kabamba ka mulimo meli ma mutali?
Mulimo uli wa mutali. Tondo tatwatunganana kubika mulimo ga kiziki kitangi kutinga ikumbamino lyeitu ku Yehowa
5. Kubogelabogela bibyo bituli nabyo kukutulisizya mutali
Bantu beingi bekulondaga kwibikila bikulo byeingi anga bubenakosya. Tondo Biblia tabyatusungula kukita bubo. Soma 1 Timoteo 6:6-8, nu kusila ibuzye luno lubuzya:
-
Biblia byatusega kukita kikizi?
Tunaba na mbogimbogi aba buno tatuli na bintu byeingi. Lola VIDEO, nu kusila ibuzye luno lubuzya lwalemba.
-
Kikizi kyakasaga bino bikanga mbogimbogi aba buno tababezaga na bikulo byeingi?
Bunaba buni ndi tuli na bintu byeingi tondo tukutunda kuba na bintu byeingi nunse? Yesu alisizye musumo watendelaga itega lyongo. Soma Luka 12:15-21, nu kusila ibuzye luno lubuzya:
-
Wijigisya kikizi ku musumo wa Yesu?—Lola mulindi 15.
Soma nu lingimania Misumo 10:22 na 1 Timoteo 6:10. Nu kusila ibuzye zeno mbuzya:
-
Ku makengelo mobe, kikizi kili kya mutali nunse gesamba kuba na bwida busoga gamozi na Yehowa nu kuba na bikulo byeingi? Kabamba kakizi watenda bubo?
-
Kutunda kuba na bikulo byeingi kukulisyaga tubebe tukizi?
6. Yehowa akukye meijanizyo meitu
Mankunku ma kumona mulimo nu ma mwido wa musanga menatukasya kumenya ndi tukulemaninaga Yehowa. Lola VIDEO kwa kumona buni butunalwania mamo malindiko ma bukatizio, nu kusila ibuzye zeno mbuzya zalemba.
-
Mu zeno video, mubuto akulumende na tunkunku tukizi?
-
Akitile kikizi kwa kulwania tunkunku nu kutukinda?
Soma Matayo 6:25-34, nu kusila ibuzye luno lubuzya:
-
Yehowa alaga kukitila kikizi babo bekumubika ga kiziki kitangi mu kalamo kabo?
NDI MUNTU AKUSOLELA BUNEE: “Natunganana kukamba na komanizia buno nikasye kikanga kyane. Nsinakundamana ku mikundamano za Kikristo n’izinga.”
-
Isanzo ikizi lyakutitikizia buno kubika ikumbamino lyobe ku Yehowa ga kiziki kitangi u bulamuzi busoga b’unakata bindi binsania?
MAKENGELO MANENE
Kuba na mulimo nu musanga kuli kwa mutali, tondo takwatunganana kutukita twibilile kukambela Yehowa.
Mbuzya za kwikengelesya
-
Kikizi kinakukasya bindi binsania kubika mulimo ga kiziki kyago?
-
Kubogelabogela bibyo bituli nabyo kwatulisizye mutali mukizi?
-
Buni b’unalosya buno walemanina idagano lya Yehowa lya kukukya meijanizyo ma bakambi bage?
LONDA LINGO
Lola ndi Biblia byatenda buno buli bubi kuba na musanga.
“Ndi Musanga U Bulingilo bwa Bubi Bunsania?” (Musagu wa ku Enternete)
Lola buni butunakambya bikulo byeitu kwa kubogyabogya Kalaga.
“Biblia Byatenda Kikizi ku Kabamba ka Kukasana?” (Musagu wa ku Enternete)
Ndi buli bubi kwesa meija ma musanga?
“Makengelo ma Biblia ku Kabamba ka—Kwesa meija ma Musanga” (Amuka!, Mwezi wa 3, 2015)
Lola kikyo kyagalukizye kalamo ka wamulume umozi wabezaga mwibi nu wesaga meija ma musanga.
“Biblia Bikugalukyaga Kalamo ka Bantu” (Munara wa Mulinzi, 1 Mwezi wa 11, 2011)
