ISOMO 38
Kutya Lukaso lwa Kalamo
Kuli bintu byeingi bitunakita nu kubogelabogela kubuno tuli mu kalamo. Aba mu nkungu zituli mu mbabazio kuli bibyo bitunabogelabogela mu kalamo. Buni butunalosya buno twakutya lukaso lwa kalamo? Nu kuli kabamba kakizi kasoga ka kukita bubo?
1. Kabamba kakizi twatunganana kukutya kalamo?
Twatunganana kukutya kalamo kubuno keli lukaso lwatuka ku Yehowa, Tateiswe uli na lutundo. Eli “kanuabalongo ka kalamo”—u kutenda buno we u wabumbile binsania bili na kalamo. (Nimbo 36:9) “Wenyene ukukasaga bansania kalamo, nu muuza, nu binsania.” (Misako 17:25, 28) Yehowa ekutukasaga binsania bitwijanizya kwa kulama. Gantata na binsania, atukasile kiziki kya kubogelabogela kalamo.—Soma Misako 14:17.
2. Buni butunalosya Yehowa buno twakutya lukaso lwa kalamo?
Yehowa alingile kulanga kalamo kobe kutukila busi bwekilwe ijeme lyobe. Ku masego masanzizye Yehowa mu Kitondo kyage, Davidi, umozi ku bakambi bage amubwide bunee: “Meiso mobe mamonine ku mubili wane lwabusio lwa kubutwa.” (Nimbo 139:16) Kalamo kobe keli ka mutali nunse ku meiso ma Yehowa. (Soma Matayo 10:29-31.) Bukumwinia mutima nunse kumona muntu isombolela kwita ungo aba kwikama. a (Kutuka 20:13) Yehowa ekwina lingo mutima ndi twabika kalamo keitu gabibu bulyabulya aba ndi tatukulanga kalamo ka bango. Ndi twalanga kalamo keitu nu ka bango, nti twalosya buno twakutya lukaso lusoga lwa kalamo.
TUMENYININE
Lola nzila zimozi z’unalosya kuzo buno wakutya lukaso lwa kalamo.
3. Kunga mubili wobe
Bakristo batutikwa bekukambyaga kalamo kabo kansania kwa kukambela Yehowa. Buli anga bakasana mibili zabo kuba bisansa ku Kalaga. Soma Baroma 12:1, 2, nu kusila ibuzye zeno mbuzya:
-
Kabamba kakizi watunganana kukunga mubili wobe?
-
Unakita bubo mu nzila nkizi?
4. Idange buno ntubabazye muntu aba kwita
Biblia byatukakizia buno tatukite bintu binabika kalamo keitu g’itega. Lola VIDEO kwa kumenya bibyo biunakita kwa kwilanga.
Soma Misumo 22:3, kwa kulola buni bun’ilanga nu kulanga bango . . .
-
kwobe ku numba.
-
ku mulimo.
-
g’ukukita meija.
-
g’ukwendya aba bakweka mu kaminyo, pikipiki, nkinga, bwato nu bingo.
5. Kutya kalamo ka mwana uli mu ijeme
Mu lwimbo lwasanzile Davidi, alosizye buno Yehowa ekutananizibwaga na bubo bukukula mwana munda mwa nina. Soma Nimbo 139:13-17, nu kusila ibuzye luno lubuzya:
-
Ku meiso ma Yehowa, ndi kalamo ka muntu kekulingaga g’ekwa ijeme aba gabutwa mwana?
Milembe za Yehowa ku Baisraeli ba wakalazi zalangaga nina nu mwana wage uki mu ijeme. Soma Kutuka 21:22, 23, nu kusila ibuzye zeno mbuzya:
-
Yehowa ekumona buni muntu w’ita mwana uli mu ijeme kwa kuteitundila?
-
Ekwijungwaga buni ndi muntu akita bubo na nko? b
-
Buni buwamona makengelo ma Kalaga?
Aba mukikulu ukukutyaga kalamo enamona buno takuli bubi kutikya ijeme. Soma Isaya 41:10, nu kusila ibuzye zeno mbuzya:
-
Ndi mukikulu ekukandikwa kutikya ijeme, atunganana kulonda lukasyo ku nazi? Kabamba kakizi?
NDI MUNTU AKUSOLELA BUNEE: “Mukikulu enatikya ijeme ndi atunda—kubuno uli mubili wage.”
-
Kikizi kyakutitikizia buno Yehowa ekukutyaga kalamo ka nina nu ka mwana wage uli mu ijeme?
MAKENGELO MANENE
Biblia byatwigisya buno twatunganana kutunda, kwanza nu kulanga kalamo, lukaso lwa Yehowa. Bubo bwisa munda kalamo keitu nu ka bango.
Mbuzya za kwikengelesya
-
Kabamba kakizi kalamo keitu keli ka mutali ku meiso ma Yehowa?
-
Buni bukwijungwaga Yehowa ndi muntu ita ungo na nko?
-
Kabamba kakizi ukukutya lukaso lwa kalamo?
LONDA LINGO
Buni butunalosya lusimo ku Yehowa ku kabamba ka lukaso lwa kalamo?
Mona ijakulo ku luno lubuzya: Ndi Kalaga ekusigililaga mukikulu watikizye ijeme?
“Biblia Byatenda Kikizi ku Kabamba ka Kutikya Ijeme?” (Musagu wa ku Enternete)
Lola mu nzila nkizi makengelo ma Kalaga ku kabamba ka kalamo matunganana kutusondelezya gatukusombola bintu bya kwibogyabogya nabyo.
“‘Meija Mbibu’—Ndi Tameli na Mbaselo Mbi?” (Amuka!, 8 Mwezi wa 10, 2000)
Ndi leno muntu eli na mekengelo ma kwikama? Lola lukasyo lwa Biblia.
“Nikutunda Kukua—Ndi Biblia Binankasya Ganili na Makengelo ma Kwikama?” (Musagu wa ku Enternete)
a Yehowa ekwangaga nunse babo batamba mutima. (Nimbo 34:18) Izi makengelo mekubezaga na muntu ukutunda kwikama, nu ekutunda kumukasya. Lola mu nzila nkizi lukasyo lwage lunakasa muntu magala ma kukinda makengelo ma kwikama, soma musagu “Nikutunda Kukua—Ndi Biblia Binankasya Ganili na Makengelo ma Kwikama?” uli mu kibe Londa Lingo mu lino isomo.
b Babo batikizye ijeme tabatunganana kwibezya—Yehowa enabasigilila. Kwa kumenya byeingi, soma musagu “Biblia Byatenda Kikizi ku Kabamba ka Kutikya Ijeme?” uli mu kibe Londa Lingo mu lino isomo.
