ISOMO 40
Buni Butunaba Bantu Benga ku Meiso ma Kalaga?
Kengela ku nina ukukungika mwana wage wamulume kwa kwenda ku likolo. Atitikizia buno mwana wage oga nu nsulu zage zili nsoga nu zenga. Bubo bwakasye mwana abe na lukita lusoga lwa mubili nu bwalosye bango buno babuti bage bekumukungaga busoga. Anga bubo, Yehowa, Tateiswe wa mwigulu ekutunda tube bantu benga—ku mubili nu kuba na makengelo, mutendezi nu misako zaswaga. Ndi tuli bantu benga, nti twidisizye mutali nu kulisizya Yehowa lutanuno.
1. Buni butunaba bantu benga ku mubili?
Yehowa atubula bunee: “Mube baswagibwa.” (1 Petro 1:16, NWT.) Kuba bantu baswagibwa kwisulwa buno kuba bantu benga mu nzila za mubili nu kuba na makengelo nu mutendezi waswaga. Tunengya mubili kwa kwoga bindi binsania nu kufula nsulu zeitu nu kwengya numba, nkinga, pikipiki nu kaminyo keitu. Tunakasya lingo kwengya Numba zeitu za Bukota. Kwengya mubili weitu kukulisizya Yehowa lutanuno.—2 Bakorinto 6:3, 4.
2. Twatunganana kusiga misako mikizi kwa kuba bantu benga?
Biblia byatukakizia buno “twiyengye ku nsese insania za mubili nu za mutima.” (2 Bakorinto 7:1) Bubo bwisulwa buno, twatunganana kusiga binsania binabigya mubili nu makengelo meitu. Makengelo meitu mekutananizya Yehowa, ukinsa tukwidindika kwidekanukya na makengelo metatunganana. (Nimbo 104:34) Tukwidindika lingo kuba na mutendezi musoga.—Soma Bakolosayi 3:8.
Bingo bikizi binabigya mubili nu makengelo meitu? Kuli bintu bimozi binabigya mubili weitu, anga kunua kwanga, kutakuna miraa, kwidonga kapapilo (kwanga wa mu miembe), miti za kulebesya, nu bingo bintu bya bulebi byazugilwa na mbulamatali nu baminganga. Kwa kubembuka kukita bibyo, nti twabe na mubili musoga nu twalosye lwanzo ku lukaso lwa kalamo. Tukwidindika tondi kuba na makengelo nu misako misoga kwa kutakita misako za nsese anga kwilutila bumania (kupiga punyeto) nu kulola pornografia. (Nimbo 119:37; Baefeso 5:5) Bunaba bubibu kusiga kukita misako zezo za nsese, tondo Yehowa enatukasya kuzisiga.—Soma Isaya 41:13.
TUMENYININE
Lola kabamba kakizi kwengya mubili kukulisizya Yehowa lutanuno, nu buni bunasiga muntu kukita misako za nsese.
3. Kwengya mubili weitu kukulisizya Yehowa lutanuno
Tunamenya makengelo ma Yehowa ku kabamba ka kuba bantu benga kwa kusoma makakizio makasile Baisraeli wakalazi. Soma Kutuka 19:10 nu 30:17-19, nu kusila ibuzye zeno mbuzya:
-
Kulembana na mamo masanzo, buni buli makengelo ma Yehowa ku kabamba ka kwengya mubili?
-
Unakita kikizi kwa kwengya mubili bindi binsania?
Kuba muntu wenga kukusega magala nu nkungu. Tondo tunakita bubo kunsania kutukulama ibe buno tuli bagumi aba bazambi. Lola VIDEO, nu kusila ibuzye luno lubuzya lwalemba.
-
Bantu benatenda kikizi ku kabamba ka Yehowa nu mulimo weitu wa busambazi gabatumona twengya mubili nu bintu byeitu?
4. Buni bunasiga muntu misako mibi?
Yehowa enatukasya kusiga misako mibi
Ndi ukunua kwanga aba ukukambya miti za kulebesya, unamona buno buli bubibu kusiga zezo misako. Kikizi kinakukasya? Kengela tangi, zezo misako zinakulisizya mbaselo nkizi. Soma Matayo 22:37-39, nu kusila, lola mu nzila nkizi kunua kwanga aba kukambya miti za kulebesya kunaba na mbaselo nkizi ku . . .
-
bwida bwobe gamozi na Yehowa.
-
kikanga kyobe nu ku bango.
Kengela biwakite kwa kusiga misako mibi. a Lola VIDEO.
Soma Bafilipi 4:13, nu kusila ibuzye luno lubuzya:
-
Kusega mambizi meingi, kwijigisya Biblia nu kukundamana, ndi kunakasa muntu magala ma kusiga misako mibi?
5. Muntu enakita kikizi kwa kukinda makengelo nu misako za nsese
Soma Bakolosayi 3:5, nu kusila ibuzye zeno mbuzya:
-
Buni butwamenya buno kulola pornografia, kusingilana mikanda zili na bitondo bya nsese bya butazi, nu zili na bilimelime nu video za bantu beli mundulu, nu kwilutila bumania zili misako za nsese ku meiso ma Yehowa?
-
Ku makengelo mobe, ndi tunavwama kulemba bibyo byatusega Yehowa ku kabamba ka kwengya mubili nu makengelo ? Kabamba kakizi watenda bubo?
Lola buni bunakita muntu kwa kukinda makengelo ma nsese. Lola VIDEO.
Yesu alisizye musumo walosya buno twatunganana kukita mpumba zeitu insania buno tusigale na makengelo masoga. Soma Matayo 5:29, 30, nu kusila ibuzye luno lubuzya:
-
Aba buno Yesu ntatendile buno twibigye mubili, tondo alosizye bubo butwatunganana kukita. Muntu atunganana kukita kikizi kwa kusiga makengelo ma nsese? b
Ndi ukwidindika kusiga makengelo ma nsese, Yehowa ekumona mpumba ziukukita. Soma Nimbo 103:13, 14, nu kusila ibuzye luno lubuzya:
-
Ndi ukulwania misako za nsese, buni bunakukasya lino isanzo kwa kwendelela kukita bubo?
Ntutambe mutima, endelela kulwana!
Muntu enakengela bunee: ‘Kubuno nakikitanwa, kasi nsyakosye.’ Tondo kengela tangi bubuno: Muntu uli mu katangoa, ndi akikitanwa nu agoa, bubo tabwisulwa buno akindwa aba asubya lingo kuko kwatukile. Anga bubo, ndi muntu akikitanwa mu misako zekutunda kusiga, tabwisulwa buno ntenakosya lingo kwidekanukya na misako mibi. Aba bubo tabwalosya buno mamo magala mansania ma use wakita meli ma bulya. Muntu unsania enakikitanwa. Kasi ntutambe mutima! Kutingila lukasyo lwa Yehowa, unabasila kusiga misako mibi.
NDI MUNTU AKUSOLELA BUNEE: “U bumba bwane. Nsinasiga.”
-
Unakambya isanzo ikizi kwa kumulosya buno kutingila lukasyo lwa Yehowa, enabasila kusiga misako mibi?
MAKENGELO MANENE
Tukubogyabogya Yehowa kwa kwendelela kwengya mubili weitu, kuba na makengelo, mutendezi nu misako misoga.
Mbuzya za kwikengelesya
-
Kabamba kakizi buli busoga nunse kuba bantu benga?
-
Unakita kikizi kwa kwengya mubili?
-
Buni b’unendelela kuba na makengelo nu misako misoga?
LONDA LINGO
Bintu bikizi biteli bibibu binakita muntu kwa kwengya mubili aba buno nteli na bikulo byeingi?
Lola bibyo biunakita kwa kusiga kunua kwanga.
Lola mbaselo mbi za kulola pornografia.
“Ndi Pornografia Zili na Bubi?” (Munara wa Mulinzi, 1 Mwezi wa 8, 2013)
Lola buni bwasigile wamulume umozi kulola pornografia.
“Nsyakosizye Mamibizi Meingi Lwabusio lwa Kusiga” (Munara wa Mulinzi, Na. 4 2016)
a Musagu “Buni B’unasiga Kunua Kwanga,” watendelwa mu kibe Londa Lingo kya lino isomo, walosya muntu bibyo byenakita kwa kusiga misako mibi anga kunua kwanga.
b Kwa kumenya kikyo kinakasya muntu kwa kusiga misako za kwilutila bumania, lola musagu “Buni Buninasiga Misako za Kwilutila Bumania?” mu kitabu Maulizo Yenye Vijana Wanajiulizaka—Majibu ya Kuwasaidia, Buku ya 1, Sura ya 25.
