ISOMO 50
Buni Bunaba Kikanga Kyobe na Mbogimbogi?—Kibe 2
Bana beli lukaso kutuka ku Yehowa. Yehowa asega babuti kukunga busoga lukaso lwongo. Yehowa akasa babuti nsungu zinabakasya kukita bubo. Alosya tondi bana bibyo bibenakita kwa kukasya kikanga kibe na mbogimbogi.
1. Yehowa akasa babuti nsungu nkizi?
Yehowa ekutunda babuti batunde bana babo nu kutingya nkungu neingi gamozi nabo. Ekutunda lingo babuti balange bana babo ku bubi bunsania nu kukambya kanuni za Biblia kwa kubeigisya. (Misumo 1:8) Atenda buno ku beisi: “Mubakuzye mu meigisya nu mu iyano lya Mukota.” (Soma Baefeso 6:4.) Yehowa ekubogaboga nunse ndi babuti balemba nsungu zage gabekukuzya bana babo nu kutakasya ungo muntu mulimo wongo.
2. Yehowa akasa bana nsungu nkizi?
Yehowa asungula bana bunee: “Anzazi babuti beinyu.” (Soma Bakolosayi 3:20.) Ndi bana balosya lwanzo nu kungwilila babuti babo, nti babogyabogya Yehowa nu babuti babo. (Misumo 23:22-25) Yesu alosizye musumo musoga g’abezaga mwana. Anzaga babuti bage nu kub’ungwilila aba buno babezaga bantu betasililila nu we abezaga wasililila.—Luka 2:51, 52.
3. Buni bumunakunda Kalaga mu kikanga kyeinyu?
Ndi uli mubuti, lebelebe unatunda bana bobe batunde Yehowa anga b’ukukita. Buni b’unakita bubo? Unakita bubo kwa kulemba zeno nsungu za Biblia: “Mukameigisia [bitondo bya Yehowa, NWT] ku bana beinyu na komanizia, nu kumasambala kubeli, kungwa mwikala mu numba, nu kungwa mukwenda mu nzila.” (Kukokomezia Mulembe 6:7) Kitondo “Kwigisya na komanizia” kisulwa buno kwigisya kwa kusubilila kitondo kimozi. Bubo bwalosya buno watunganana kusubilila kitondo kimozi mambizi meingi ku bana bobe kwa kubakasya bakengele kitondo kyongo. Isanzo lilyo lyalosya buno bindi binsania watunganana kulonda nkungu za kwezezya na bana bobe ku kabamba ka Yehowa. Buli busoga kwibikila nkungu n’izinga kwa kukumbamina Yehowa mu kikanga. Ndi ntuli na bana, uneibikila nkungu n’izinga kwa kwijigisya Kitondo kya Kalaga.
TUMENYININE
Lola makengelo menakasya mbogimbogi nu bulangi ku kikanga.
4. Igisya bana bobe kwa lutundo
Bunaba bubibu kwigisya mwana. Buni bunakukasya Biblia? Soma Yakobo 1:19, 20, nu kusila ibuzye zeno mbuzya:
-
Buni bunalosya babuti lutundo gabekwezezya na bana babo?
-
Kabamba kakizi babuti tabatunganana kuzugila bana babo gabeli mu bongoa? a
5. Langa bana bobe
Kwa kulanga bana bobe, buli busoga kwezezya n’umozi n’umozi kubo ku kabamba ka kujama gamozi n’ungo buno beilange na babengi. Mango unamona buli bubibu kukita bubo. Lola VIDEO, nu kusila ibuzye zeno mbuzya zalemba.
-
Kabamba kakizi buli bubibu ku babuti bamozi kwezezya na bana babo ku kabamba ka kujama gamozi n’ungo?
-
Babuti bamozi bekwezezyaga na bana babo ku kabamba ka kujama gamozi n’ungo mu nzila nkizi?
Anga bwalosya bulengania, kisi kya Satana kikwitila ku bubi nunse. Soma 2 Timoteo 3:1, 13, nu kusila ibuzye luno lubuzya:
-
Bamozi ku bantu babi batendelwa mu mulindi 13, bekujamaga na bana ukutenda buno kubabinga. Kabamba kakizi buli busoga ku babuti kwezezya na bana babo ku kabamba ka kujama gamozi n’ungo nu kubalosya buni bubeneilanga na babengi?
Ndi wamenyile?
Balongeki ba Yehowa bekutikyaga video nu bitabu byeingi kwa kukasya babuti kwigisya bana babo ku kabamba ka kujama gamozi n’ungo nu kwilanga na babengi. Anga, lola:
-
Langa Bana Bobe (video)
-
“Igisya Bana Bobe ku Kabamba ka Kujama Gamozi N’ungo” (Amuka! Na. 5 2016)
6. Losya lwanzo ku babuti bobe
Bana, basikila aba bakinga benalosya lwanzo ku babuti babo mu nzila za kwezezya nabo. Lola VIDEO, nu kusila ibuzye zeno mbuzya zalemba.
-
Kabamba kakizi buli busoga mwana ezezye kwa lwanzo na babuti bage?
-
Mu nzila nkizi mwana enezezya na babuti bage kwa kubalosya lwanzo?
Soma Misumo 1:8, nu kusila ibuzye luno lubuzya:
-
Mwana atunganana kukita kikizi gekusondelezibwa na babuti bage?
7. Mukumbamine Yehowa mu kikanga
Bikanga bya Balongeki ba Yehowa bikwibikilaga nkungu n’izinga kwa kukumbamina Yehowa gamozi. Buni bukukitwa ikumbamino lya kikanga? Lola VIDEO, nu kusila ibuzye zeno mbuzya zalemba.
-
Buni bunakita kikanga kwa kulongeka programu z’ikumbamino lyabo bindi binsania?
-
Babuti benakita kikizi kwa kukita ikumbamino lya kikanga libe lya mutali nu likutananizya?—Lola kilimelime mu kulinga kwa lino isomo.
-
Kikizi kinakita bube bubibu ku kikanga kyobe kwijigisya gamozi?
Wakalazi, Yehowa atundaga bikanga bya Baisraeli byezezye bindi binsania ku kabamba ka Masanzo. Soma Kukokomezia Mulembe 6:6, 7, nu kusila ibuzye luno lubuzya:
-
Buni b’unakambya kanuni kongo?
Bimunakita mu ikumbamino lya kikanga:
-
Kwikungika ku kabamba ka mikundamano za Kikristo.
-
Kusoma nu kwezezya ku kabamba ka musagu wa Biblia watananizye kikanga kyobe.
-
Ndi uli na bana beki bakeke, oza aba tikya ku imprimante misagu zili ku mpelele ku kabamba ka bana ku jw.org.
-
Ndi uli na basikila aba bakinga, ezezya nabo musagu uli ku mpelele za basikila nu bakinga ku jw.org.
-
Mukite drama za musagu umozi watendelwa mu Biblia gamozi na bana beinyu.
-
Mulole nu kwezezya ku kabamba ka video zili ku jw.org.
NDI MUNTU AKUSOLELA BUNEE: “Bana tabenamenya Biblia.”
-
Unatenda buni?
MAKENGELO MANENE
Yehowa ekutunda babuti batunde, bigisye nu kulanga bana babo. Ekutunda bana banze babuti babo nu kubungwilila; nu ekutunda bikanga bimukumbamine gamozi.
Mbuzya za kwikengelesya
-
Babuti benakita kikizi kwa kwigisya nu kulanga bana babo?
-
Bana benalosya lwanzo ku babuti babo mu nzila nkizi?
-
Kuli mutali mukizi kwa kwibikila nkungu n’izinga kwa kukumbamina Yehowa gamozi mu kikanga?
LONDA LINGO
Bikizi biwatunganana kwigisya bana bobe, bikabakasya gabekaba bakulu?
Nsungu za mutali ku babo bekukunga bakungu.
“Biblia Byatenda Kikizi ku Kabamba ka Kukunga Babuti Bese Bakunguka?” (Musagu wa ku Enternete)
Lola mu nzila nkizi wamulume umozi utamenyaga kukuzya bana bage, bwabasile kuba isé musoga.
Lola buni bunakita isé kwa kugugumania m’ungwano na mwana wage.
“Isé Enakita Kikizi kwa Kukunda Mwana Wage?” (Munara wa Mulinzi, 1 Mwezi wa 11, 2011)
a Mu Biblia, kitondo “[kuzugila]” kyatendela kwigisya, kusondelezya nu kubezya. Takisulwa buno kukitila mwana bubi aba kwa butombo.—Misumo 4:1.
