Buni B’unitania Mankunku ma Kwijungwa Kuba Kwikazi
Ndi ukwijungwa buno walekanukibwa na bango nu uli ugwenyene? Ndi u buli go, kasi ukwijungwa anga bujungwile musanzi wa Nimbo watendile bunee: “Niseli anga kazoni keli kokinyene gantata ga numba.” (Nimbo 102:7) Nsungu za Biblia zinakukasya kwitania mankunku makulisibwaga na muntu kwijungwa kuba kwikazi.
Gugumania mwezezio wobe gamozi na Kalaga
Unaba na mbogimbogi aba mu nkungu z’ukwijungwa buno walekanukibwa na bango nu uli ugwenyene, ndi uku zangela-zangela meijanizio mobe ma mutima. (Matayo 5:3, 6) Misagu ziwamone kwa bulia zalemba gano zina kukasya ku bubo.
Biblia ku enternete ziteli mbibu kusanzulá
Mpelele “Meigisio ma Biblia ku Enternete”—n’akula ku mbuzya nene za kalamo
Mpelele “Video Neigi”—zili na meigisya ma bulingilo ma Biblia
Mpelele “Mbuzya Zalemanina Biblia Z’akulwa”—Z’akula ku Mbuzia zikwibuzyaga nunse bantu
Mpelele “Eigazi Bukatizyo Bwabo”—Zili na misagu zakukasye kumona mwobe mu makengelo kalamo ka bamulume nu bakikulu balandania batendela Biblia
Mpelele “Kyabumbilwe aba Kibasizye?”—Zikulosyaga bwambumbilwe bintu busoga nu mulukita lwakwangamia
Sanzulá masanzo mekubobelezya ma Biblia
Mano masanzo mekubobelezya bantu beingi. Kuteli kumasanzulá lubilo-lubilo, kambya nkungu z’ukwijungwa buno uli kwikazi kwa kusanzulá n’imozi zamo, kulyesela nu kusega.—Marko 1:35.
Songolola bwisulilwa bwa mbaselo zisamoneka ga kesé
Un’itania busoga mizangozango ndi wamenya kabamba kabuni bubi bukubasila, nu ndi wamenya buni u bukakita Kalaga kwa kubuzindya.—Isaya 65:17.
Ibembukye na mizangozango ziteli za mutali
Zeno misagu zalemba zinakukasya kwitania lukita lwa kwijungwa buno walekanukibwa na bango nu uli ugwenyene nu ‘ntwikutie’—Matayo 6:25.
Idondele bilemba nu wezezye nabo busoga
Kuba na bida kwakukasye kwijungwa busoga nu kuba tondi na makengelo masoga gawakulumana na mankunku. Ndi uli mu konfinema ku numba, unakambya video koferanse aba kumana bilemba byobe ku telefone buno mugugumanie bulemba bweinyu nu kwidondela bango. Zeno misagu zalemba zinakukasya kwidondela nu kuba “kilemba [kya bulili NWT].”—Misumo 17:17.
Ba na nkungu za kukita jimnastike
Biblia byatitikizya buno kukita jimnastike ‘‘kuli kusoga.’’ (1 Timoteo 4:8, NTKI57) Bubo bunakasya kuba na makengelo masoga, nunse ndi ukulwana na lukita lwa kwijungwa buno konfinema zaku lekanukia na bango. Aba buno ntukutuka ku numba, tondo unaba na byeingi byunakita byakukasye kumona magala.