Biblia byatendela mbaselo nu nkita zamoneke ko mu “kuzinda kwa nkiko,” aba “kuzinda kwa kesé.” (Matayo 24:3) Biblia byamana nkungu zezo “bindi bizinda” nu “nkungu nzinda,” aba “bindi bya kuzinda.” (2 Timoteo 3:1; Danieli 8:19; NTKI57) Tutuno u tulolesyo tukumoneka ko nunse twa bulengania bwa bindi bizinda:

•   Nako naku bita.​—Matayo 24:7; Kulolesibwa 6:4.

•   Nzala.​—Matayo 24:7; Kulolesibwa 6:5, 6.

•   Tuningini tunene.​—Luka 21:11.

•   Nsambo za kutolokela “nsambo nnene.”​—Luka 21:11.

•   Kwetela kwa butombo.​—Matayo 24:12.

•   Kubigibwa kwa kesé na banakantu.​—Kulolesibwa 11:18.

•   Bantu betela ku bubi, bukumoneka ku misako zibeli nazo anga “beteli na lusimo nu bata swaga, . . . Tabekutunda kusigilila bango, beli bakandiki, tabekwisungula, nu bakali, tabekutunda busoga, bekaba bagabuzi, bekaba na kasaswe k’itenda, bakeikotia.”​—2 Timoteo 3:1-4.

•   Kutamba kwa lutundo lwa kikanga, bantu “tabekutunda ba kwabo” bana nubo beseli “betekwanza babuti babo.”​—2 Timoteo 3:2, 3.

•   Lutundo lwa bantu beingi ku Kalaga luse lwatamba.​—Matayo 24:12.

•   Bantu bekumoneka buno bekukua kalaga boba, tondo bekutuna magala mage.​—2 Timoteo 3:5.

•   Bwisulilwa bwaswaga bwa bulengania bwa Biblia, kusambya nu bubo bwa bindi bizinda.​—Danieli 12:4.

•   Kusambalwa kwa musagu musoga wa Bukota mu kesé kinsania.​—Matayo 24:14.

•   Bantu bengi tabekwanga nu bekunyomia tulolesio twalosya buno kuzinda kuse bwigi.​—Matayo 24:37-39; 2 Petro 3:3, 4.

•   Bukuzindilila bulengania bwa Biblia bumozi gantar’abungo, ta buno malengania kishembe kumo aba meingi gamesamba.​—Matayo 24:33.

Ndi tukulama “Bindi Bizinda”?

 Lebelebe. Nkita zise mu kesé nu bulingilingi na nkiko za Biblia, binsania byalosya buno bindi bizinda byalingile mu mwaka wa 1914. Bukota bwa Kalaga bwalingile kwangata mwigulu mu wozo mwaka, nu mulutangi bwapumbizye Satana nu basumbu bage mwigulu nu kubabikila myaga buno binsania bibekukita bizindile tugu ga kesé. (Kulolesibwa 12:7-12) Makengelo ma Satana mekumoneka ku misako nu mitima mebé za bantu zikukita buno bindi bizinda bibe “bindi bibibu.”​—2 Timoteo 3:1.