Ego. Biblia byakasana butitikizio bwa bulili bwalosya buno Kalaga ekubezagako. Biblia byatulindya mutima buno tube na bukatizio ku Kalaga, ta kukatizia makengelo m’idini meteli na butitikizio, tondo kwa kukambya magala ma “bumenyinino” nu “menge” meitu ma kukengela. (Baroma 12:1; 1 Yoana 5:20) Gano geli makengelo makasana Biblia:

•   Bubo bwalongekilwe bintu busoga mu meigulu nu ga kisi nu binsania bili na kalamo ga kisi, bwalosya buno kuli Mubumbi. Biblia byatenda bunee: “Kubuno na numba na numba na zobakilwe na muntu, tondo wozo wakitile bintu binsania u Kalaga.” (Baebrania 3:4) Aba buno makengelo meli mu isanzo lyongo meli bwasi-bwasi, tondo basomi bingi bekumona buno buli bubibu kunana bubo. *

•   Beiswe banakantu, tukutundaga kumenya kabamba kakizi tuli gano ga kisi. Nu tukwendelelaga kuba na nkasa zezo inube buno twakukya meijanizyo meitu ma mubili. Biblia byamana zezo nkasa buno “meijanizyo ma mutima,” u kutenda buno nkasa za kutunda kumenya Kalaga nu kumukumbamina. (Matayo 5:3 NWT; Kulolesibwa 4:​11) Mamo meijanizyo ma mutima malosya buno Kalaga ekubezaga ko nu eli Mubumbi weitu uli na lutundo nu ekutunda tukukye meijanizyo mongo.​—Matayo 4:4.

•   Mu Biblia muli bulengania bwingi bwasanzilwe wakalazi nunse nu bwazindilide anga bubo bwatendile tugu Biblia. Kuzindilila kwa bulengania bwongo mu nzila zili bwase-bwase kwalosya buno wozo wasambalile bulengania bwongo eli na magala nunse kutinga banakantu.​—2 Petro 1:21.

•   Basanzi ba Biblia bamenyaga misagu za sayansi zitamenyaga bantu balamaga mu nkungu zezo. Anga, wakalazi bantu bingi bakatiziaga buno kisi kili gantata ga nyama nnene, anga nzogu, ngulube za mu lubanda aba ngombe nnene. Tondo, Biblia byatenda buno Kalaga ‘abikile kisi geteli kina.’ (Yobu 26:7) Nu lingo, Biblia byalosya busoga lukita lwa kisi, byatenda buno kisi ‘kyabilingana’ aba kili ‘‘mutimbo.” (Isaya 40:22, bwisulilwa bwa kunsi; Douay Version) Bantu bavwa kumona buno Kalaga tugu u wakasizye basanzi ba Biblia bamenye misagu zezo za bulili nu zili bwasi-bwasi.

•   Biblia bikwakulaga mbuzya ningi mbibu, mbuzya zinakita muntu ntekatizie buno kuli Kalaga ndi ntamona makulo ma bulili. Anga: Ndi Kalaga eli lutundo nu eli Mwija Magala Mansania, kabamba kakizi nsungyo nu bubi bwitela mu kisi? Kabamba kakizi madini mekulisyaga bubi kuteli kukita bitondo bisoga?​—Tito 1:​16.