A·po·kaʹly·psis (apocalypse), u izina lya kitabu kya Kulolesibwa mu mutendezi wa Kigiriki, nu izina lyongo lili na bwisulwa bwa “Kulimbula” aba “Kubisula.” Kitabu kyongo kyabisula bitondo byabezaga byabiswa nu kulimbula mbaselo zatungananine kubasila mu nkungu ningi kusila kusanzwa kwa kitabu kyongo. Bulengania bwingi buli mu kitabu kyongo tabuzindilila.

Makengelo manene ma kitabu kya Kulolesibwa

•   Misagu za bulingilo.​—Kulolesibwa 1:1-9.

•   Musagu wa Yesu ku makundamano mutubakamo.​—Kulolesibwa 1:10–3:22.

•   Kumoneka kwa Kalaga mu kisumbi kyage kya bukota mwigulu.​—Kulolesibwa 4:1-11.

•   Kulembana kwa tulolesio:

  •   Tumenyikilo mutubakamo.​—Kulolesibwa 5:1–​8:6.

  •   Myonze mutubakamo, myonze isatu izinda zasambala nsungyo isatu.​—Kulolesibwa 8:7–14:20.

  •   Bituma mutubakamo, na kituma kili kya bongoa, u kutenda buno lusungyo lwa Kalaga ku kisi.​—Kulolesibwa 15:1–16:21.

  •   Tulolesio tukulosya bubo bukazikibwa basombi ba Kalaga.​—Kulolesibwa 17:1–20:10.

  •   Tulolesio twatendela mponga zikalisya Kalaga mwigulu nu ga kisi.​—Kulolesibwa 20:11–22:5.

•   Misagu nzinda.​—Kulolesibwa 22:6-21.

Nzila zinatukasya kumenya busoga kitabu kya Kulolesibwa

1.   Kitabu kya Kulolesibwa kili na musagu ukubobelezia bantu bekukambela Kalaga nu taukubeitya boba. Aba buno bantu bingi bekulingimania kitondo “apocalypse” na kibuka kinene, tondo kitabu kya Kulolesibwa kyalinga nu kusila kwa kutenda buno babo bekusoma nu kumenyinina musagu uli mukyo nu kulama bulingilingi na musagu wongo, bekaba na mbogimbogi.​—Kulolesibwa 1:3; 22:7.

2.   Kitabu kya Kulolesibwa kyatendela “tulolesio” twingi mu nzila za misumo.​—Kulolesibwa 1:1.

3.   Bingo bitabu bya Biblia bise byatendela bantu bingi nu tulolesio twingi twakwangamia tuli mu kitabu kya Kulolesibwa:

   •   Yehowa: u ‘Kalaga wa bulili kwigulu nu mu kisi kinsania’ unu Mubumbi wa bintu binsania.​—Kukokomezia Mulembe 4:39; Nimbo 103:19; Kulolesibwa 4:11; 15:3.

   •   Yesu Kristo: u “Kyana kya mukoko kya Kalaga.”​—Yoana 1:29; Kulolesibwa 5:6; 14:1..

   •   Satana Diabolo: eli musombi wa Kalaga.​—Kulinga 3:14, 15; Yoana 8:44; Kulolesibwa 12:9.

   •   Babiloni Munene: eli musombi wa Yehowa Kalaga nu bakambi bage, asusanizibwa na mwino wa Babiloni aba Babeli za wakalazi, unu kwatukile meigisya ma buza mekwigisyaga madini ono lelo.​—Kulinga 11:2-9; Isaya 13:1, 11; Kulolesibwa 17:4-6; 18:4, 20.

   •   “Kitatenge’’: u bantu babi bekuguna Kalaga​—Isaya 57:20; Kulolesibwa 13:1; 21:1.

   •   Bintu byakambibwaga wakalazi ku kabamba k’ikumbamino mu numba za kukumbamina Kalaga aba tabenakulo bili bintu anga: sanduku z’idagano, kitatenge kya kiyolo (aba isagani nene lya kwoga mulyo), matala, bulago bwa nsunu nsoga, nu kasenga kwa kukasana tuyulo.​—Kutuka 25:10, 17, 18; 40:24-32; Kulolesibwa 4:5, 6; 5:8; 8:3; 11:19.

   •   Nyama za mu lubanda: zasusanizya makota ma banakantu.​—Danieli 7:1-8, 17-26; Kulolesibwa 13:2, 11; 17:3.

   •   Maganzo: makambibwa mu nzila za musumo.​—Kulolesibwa 1:20; 8:13; 13:18; 21:16.

4.   Tulolesio twongo twalemanina “Busi bwa Mukota,” nu busi bwongo bwalingile mu mwaka wa 1914 gabende Kalaga imika Yesu kuba Mukota wa Bukota bwage. (Kulolesibwa 1:10) Bwamoneka buno, bulengania bwingi buli mu kitabu kya Kulolesibwa bunazindilila nunse mu bindi bituli mubyo.

5.   Kwa kumenya busoga kitabu kya Kulolesibwa twijanizya bibyo bikutukasyaga kumenya bingo bitabu bya Biblia, u kutenda buno, menge matukila ku Kalaga nu kukasibwa tondi na babo bese bamenyinina busoga kitabu kyongo.​—Misako 8:26-39; Yakobo 1:5.