Bakristo bekukatiziaga buno Yesu akule ku kabamba ka bwagi bwa banakantu. (1 Petro 3:18) Aba bubo, k’onibwa takwalemanina tugu kukatizia buno Yesu eli m’onia weitu. Basumbu nubo bekukatiziaga buno Yesu eli “Mwana wa Kalaga,” tondo tabek’onibwa, bekulindila kuzikibwa.​—Luka 4:41; Yuda 6.

•  Natunganana kukita kikizi buno n’onibwe?

•  Buni butuna tenda ku kabamba ka “Masego ma Mwagi”?

•  Kuni kwalingile “Masego ma Mwagi”?

•   Watunganana kukatizia buno Yesu akasene kalamo kage ku bwagi bweitu. (Misako 16:30, 31; 1 Yoana 2:2) Bubo bwisa munda kukatizia buno lebelebe Yesu alamile nu binsania byatenda Biblia ku kabamba kage bili bya bulili.

•   Jigisye kumenya byigisya nunse Biblia. (2 Timoteo 3:15) Biblia byalosya buno musengwa Paulo nu Sila babwide mulangi wa muyololo bunee: “Katizia Mukota Yesu nu uwe nti wonibwe.” Kuzinda, balingile kumwigisya ‘kitondo kya Yehowa’ *. (Misako 16:31, 32) Bubo bwalosya buno wozo mulangi wa muyololo ntenakatizizye nunse Yesu kuteli kumenyinina tangi meigisya ma bulingilo ma Kitondo kya Kalaga. Atungananine kuba na bumenyinino bwa swaga bwa Masanzo.​—1 Timoteo 2:3, 4.

•   Igonge. (Misako 3:19) Watunganana nu kwigonga, bubo bwisulilwa buno kwibezya ku bubi bunsania buwakitile. Kwigonga kwobe kwamoneke na bango kwakusiga kukita bite kutananizya Kalaga nu kukita “misako zikulolesia kwiyania.”​—Misako 26:20.

•   Ututikwe. (Matayo 28:19) Yesu atendile buno, babo bekamujanga bakatunganana kututikwa. Mulangi wa muyololo utwatendelaga atutikilwe. (Misako 16:33) Unubwabezaga tondi g’igisezye musengwa Petro bulili ku kabamba ka Yesu ku bantu beingi, “kibombo kinene kubo kitabizizie moki ma Petro nu kututikwa.”​—Misako 2:40, 41.

•   Ânza makakizio ma Yesu. (Baebrania 5:9) Babo be “kukatizia bunsania” bwakakizizie Yesu mu kalamo kabo bekulosya buno bekumujanga. (Matayo 28:20) Bekubasila kuba “bakiti ‘b’idagi [aba ba kitondo NTW]’ ta. . .bongwilizi tugu.”​—Yakobo 1:22.

•   Ba na nkiki bindi binsania. (Marko 13:13) Babo bekujanga Yesu batunganana “kuba na nkiki” buno b’onibwe. (Baebrania 10:36) Tukate musumo wa musengwa Paulo, kutukila nkungu zabende mukristo, ânzile nunse makakizio ma Yesu nu kusigala mulandania ku Kalaga, nu kinga mankunku m’akulumende namo abede na nkiki aba nu gakuide.​—1 Bakorinto 9:27.

 Mu madini kishembe bantu bekukitaga masego anga “Masego ma Mwagi” aba “Masego ma Bukuluzi.” Mu masego mongo bekulosyaga buno beli bagi nu bekulosyaga lingo buno Yesu akule ku kabamba ka bwagi bwabo. Nu bekumanaga Yesu abe mu mitima zabo nu kulosya magala mage mu kalamo kabo. Tondo masego anga mamo menube “Masego ma Mwagi” tameli mu Biblia.

 Bantu kishembe bekubezaga na makengelo ma buno ndi muntu asega “Masego ma Mwagi,” nti ek’onibwa lebelebe. Tondo k’onibwa takwalemanina tugu masego. Kubuno tuli betasililila, tuku kitaga makosa bindi binsania. (1 Yoana 1:8) Unkisa Yesu akakizizye babo bekumujanga kuba na bugomya bwakusega kusigililwa kwa bwagi bwabo bindi binsania. (Luka 11:2, 4) Gantar’abubo, bakristo kishembe babezaga na kilemanizio kya kulama milyalya bakizimizizye kwa kusiga kukambela Kalaga.​—Baebrania 6:4-6; 2 Petro 2:20, 21.

 Makengelo ma bantu bekwijigisyaga misagu za w’akalazi matingana-tingana ku kabamba ka lulo lubuzya. Bamozi ntibatenda buno bumba bwongo bwalingile geba madini ma kiprotestanti malingile lingo ku buto. Bango bekukatiziaga buno bantu balingile kusega “Masego ma Mwagi” mu nkungu za migaluko za madini, zabasede mu siekle zi 18 nu 19. Biblia tabyatusega kusega ‘‘Masego ma Mwagi”​—Byatubula tondi buno tatwatunganana kusubilila kankanka masego kishembe.