Biblia byalosya bibyo biwatunganana kukita buno ubimenye busoga. Ibe kuni k’ukulama, menya buno musagu wa Kalaga uli mu Biblia ‘tauli mubibu kwobe, nu tauli bulazi nobe.’​—Kukokomezia Mulembe 30:11.

Bibyo biunakita kwa kumenya Biblia busoga

1.   Ube na makengelo masoga. Mona buno Biblia bili Kitondo kya Kalaga. Ube muntu ukwisigulizya, kubuno Kalaga ekusombaga beija lwikotio. (1 Batesalonika 2:13; Yakobo 4:6) Tondo ntukatizie bibyo biutetitikizia​—kubuno Kalaga ekutunda ukambye magala mobe ma kukengela aba “bumenyinino” bwobe.​—Baroma 12:1, 2.

2.   Sega Kalaga akukase menge. “Ntwegamine ku menge mobe uwenyene,” ubwatenda Biblia ku Misumo 3:5. Tondo, endelela ‘kusega menge ku Kalaga’ buno umenye Biblia busoga.​—Yakobo 1:5.

3.   Ijigisye bindi binsania. Kuteli kwijigisya mambizi mamozi, wamone mutali nunse kwa kwijigisya bindi binsania.​—Yosua 1:8.

4.   Sombola musagu wa kwijigisya. Kusombola musagu kishembe nu kulola bubo bwatenda Masanzo ku kabamba ka musagu wongo kuli nzila nsoga zakwijigisya bibyo byatenda Biblia. Lingila ku “meigisya matangi,” nu kusila “endelela na meigisya mazitu.” (Baebrania 6:1, 2, Habari Njema kwa Watu Wote.) Kwa kukita bubo walengemanie Masanzo mamozi ma Biblia na mango nu wamone buno Masanzo mamozi ma Biblia makasana bwisulilwa bwa mango Masanzo, inube ku misagu zili na “bitondo bili bibibu kumenyinina.”​—2 Petro 3:16.

5.   Sega bango bakukasye. Biblia byatusungula kusega bango batukasye buno tubimenyinine busoga. (Misako 8:30, 31) Balongeki ba Yehowa bekwigisyaga bantu Biblia kuteli kubasega musanga. Anga bwakitaga Bakristo mu nkungu za basingwa, bekukambyaga Masanzo kwakulosya bango bibyo bigisya lebelebe Biblia.​—Misako 17:2, 3.

Buno wijigisye Biblia ntwatunganana tugu kuba na:

1.   Bumenyinino nunse aba kwendelela nunse ku likolo. Basingwa 12 ba Yesu bamenyaga Masanzo nu beigisyaga bango Masanzo mongo, aba buno bantu bamozi bamonaga basingwa buno beli bantu “bateigile kampa aba beteli na menge nunse.”​—Misako 4:13.

2.   Musanga. Un’ijigisya meigisya ma Biblia kuteli kuliga musanga. Yesu abwinde beigisibwa bage bunee: “Mwakasilwe buliabulia nu inyuwe kasanazi buliabulia.”​—Matayo 10:8.