Biblia byalenganizye buno, mu bindi bizinda, kukaba nsambo nnene za kutolokela, ukubula nsambo zikusasya kwa kutolokela. (Luka 21:11) Zezo nsambo nnene za kutolokela tazili nsungyo kutuka kwa Kalaga. Bwatingana na bubo, bwigi gano kutingila Bukota bwage Kalaga azindye nsambo insania, kwisa munda nsambo nnene za kutolokela.

•  Ndi Biblia byalenganizizye kubasila kwa nsambo nnene za kutolokela?

•  Ndi Kalaga es’asungyaga lingo bantu kutingila nsambo?

•  Ndi nsambo nnene za kutolokela ziligo ono lelo, zili nsungyo za Kalaga?

•  Ndi nsambo nnene za kutolokela zikazinda?

•  Masanzo ma Biblia matendela nsambo

 Biblia tabyatendela nsambo nnene aba nsambo za kwikazi, anga COVID-19, SIDA, kapaku, malaria, aba kisisya kya Espagne. Tondo zalenganizizye buno ‘nsambo nnene za kutolokela’ nu “keboka [NWT].” (Luka 21:11; Kulolesibwa 6:8 bwisulilwa bwa kunsi) Mbaselo zezo zili gesamba tulolesio twa “bindi bizinda [NTKI57],” bikumanwa lingo “kuzinda kwa nkiko.”​—2 Timoteo 3:1; Matayo 24:3.

 Twamisagu twalosya buno bantu basungizibwe na Kalaga kutingila nsambo tuli tukeke nunse mu Biblia. Anga, asambizye bantu kishembe na bibali. (Maganzo 12:1-16; 2 Bakota 5:20-27; 2 Nkiko 26:16-21) Aba bubo, mbaselo zezo tazabezaga nsambo za keboka zatolokile nu bantu betamenyaga kango ku bubo. Bantu bagunine bwase-bwase Kalaga u basungizibwe bubo.

 Kilo. Bantu kishembe bekutitikizya buno Kalaga ekumbyaga nsambo nnene za kutolokela nu ingo nsambo kwakusungya bantu ono lelo. Tondo makengelo mamo tam’ungwana na bwatenda Biblia. Ku kani kabamba?

 Katangi ntu buno, bakambi ba Kalaga ba wâkalazi​—nu b’ono lelo—bekusambaga. Anga, Timoteo wabezaga mukambi mulandania wa Kalaga asambaga “mambizi meingi.” (1 Timoteo 5:23) Tondo, Biblia tabyatenda buno bubo bwalosya buno ntamonaga lingo mponga za Kalaga. Unubuligo tondi ono lelo, bakambi balandania ba Kalaga bekusamba nubo. Bubo bukubasilaga kubuno mambizi meingi benasangwa ga kiziki kibé nu mu nkungu mbé.​—Musambazi 9:11.

 Ka mabili keli buno, Biblia b’igisya buno nkungu za Kalaga z’asungye kuzo batombo tazibasa. Bwatingana na bubo, tukulama mu “busi bwa lonio”​—ukubula nkungu zikumana Kalaga amana bantu bansania kuba bida bage buno bakululwe. (2 Bakorinto 6:2) Nzila z’ekukambya kwakumana bantu kweli ntu kutingila mulimo wa kusambala mu kesé kinsania uli na musagu ukutananizya​—wa “musagu musoga wa Bukota.”​—Matayo 24:14.

 Lebelebe. Biblia byatendela nkungu zili bwigi gano zitekasambaga lingo muntu. Kalaga azindye nsambo insania, gângatwe kesé na Bukota bwage. (Isaya 33:24; 35:5, 6) Ekatikya mankunku, mbabazio nu lukuo. (Kulolesibwa 21:4) Nu ekayukya kutuka ku bakuzi babo bakule buno ba bogelebogele kulama mu lukita lusoga lwa mubili gano ga kesé mu nkita za sililila.​—Nimbo 37:29; Misako 24:15.

 Kulolesibwa 6:8 [NWT]: “Nu namonine kwabasile farasi zenga anga mazi. Wozo wabezaga wabakama gantata gazo, amanagwa buno lukuo, nu hadese, kiziki kya bakuzi, kyamuyangaga. Bakasilwe bwangato . . . buno beite . . . na nsambo za kutolokela.”

 Bwisulilwa: Bulengania bwa bantu ba 4 ba bakamaga gantata ga farasi bwatendelwa mu kitabu kya Kulolesibwa, bwalosizye buno kukaba nsambo nnene za kutolokela mu bino bindi bituku lama mubyo.