Maria Magdala abezaga mwigisibwa mulandania wa Yesu Kristo. Izina lyage, Magdala, lyatukila ku mwino wa Magdala (mango zanumanagwa Magadan), wabezaga muntungo mwa kitatenge kya Galilaya. Mango alaminde mu mwino wongi.

 Maria Magdala abezaga umozi wa bakikulu bendaga gamozi na Yesu nu basengwa bage, nu babakasyaga na bintu bibeijanizyaga. (Luka 8:1-3) Maria eimonine bwakamagwa Yesu ku muti, nu abede gesamba babezaga batangi kumumona kusila kuyukibwa kutuka ku bakuzi.​—Marko 15:40; Yoana 20:11-18.

•  Ndi Maria Magdala abezaga kitazi kya mukikulu?

•  Ndi Maria Magdala abezaga “musengwa wa basengwa”?

•  Ndi Maria Magdala abezaga mwikulu wa Yesu?

•  Biblia byatendela bakikulu banga beli n’izina lya Maria?

 Biblia tabyatenda buno Maria Magdala abezaga kitazi kya mukikulu. Ku kabamba ka kalamo kage ka wâ kalazi, Biblia byatenda tugu buno Yesu apumbizye basumbu 7 mweli.​—Luka 8:2.

 Nu kuni kwatukile leno makengelo makubula buno abezaga kitazi kya mukikulu? Kusila ma siekle kishembe nagakuile, bantu kishembe batitikizizye buno we u wabezaga wozo mukikulu wanunizie magolo ma Yesu na bisozi nu kumanyonyona na nzwele zage. (Luka 7:36-38) Tondo, takuli isanzo lyatitikizya bubo mu Biblia binsania.

 Kilo. Kanisa ka katolika kekumumanaga “Musililila Maria Magdala” aba “musengwa wa basengwa” kubuno abezaga gesamba bantu batangi kusambalila basengwa buno Yesu ese ayukibwa kutuka ku bakuzi. (Yoana 20:18) Tondo bubo tabwakita buno amanwe musingwa. Nu Biblia tabyatenda buno abezaga musingwa.​—Luka 6:12-16.

 Kusanzwa kwa Biblia kwanzindide mu kuzinda kwa siekle itangi za nkungu zeitu. Tondo, kubasila ku siekle za 6 u kwakatile bakulu b’idini bakata bulamuzi bwakusakika Maria Magdala kuba wasililila. Mikanda kishembe ziteli gesamba masanzo ma bulili ma Biblia​—zasanzilwe mu siekle 2 nu 3​—zalosya buno bamozi gesamba basengwa ba yesu bakwelaga Maria logè. Tondo, misagu za botonga anga zezo tazalemanina Biblia aba kakeke.

 Kilo. Bwatingana na bubo, Biblia byalosya bwase-bwase buno Yesu tasongile. *