Lubuzya lulo lwatendela mutali wa kalamo, lunabuzibwa mu nzila ningi: anga, Kabamba Kakizi Tuli Gano ga Kisi? aba Kalamo Kane Keli na Mutali Mukizi? Biblia byalosya buno ndi tukutunda kuba na kalamo keli na mutali twatunganana kuba beida ba Kalaga. Lola bulili kishembe bwa mutali bwakasana Biblia.

•   Kalaga u Mubumbi weitu. Biblia byatenda bunee: “Kalaga; wenyene u watubumbile, nu beiswe tuli bage.”​—Nimbo 100:3; Kulolesibwa 4:11.

•   Kalaga eli n’inilo kishembe ku kinsania kyabumbile, nu ku beiswe tondi.​—Isaya 45:18.

•   Kalaga atubumbile na “meijanizyo ma mutima,” bwisa munda kutunda kuba na kalamo keli na mutali aba inilo. (Matayo 5:3 NWT) Ekutunda tukukye meijanizyo mongo.​—Nimbo 145:16.

•   Tunakukya meijanizyo meitu ma mutima kwa kukita bwida gamozi na Kalaga. Bantu bamozi bekukengelaga buno tabunakulungana kuba mwida wa Kalaga, tondo Biblia byatulindya mutima bunee: “Kundazi Kalaga, nu we amukunde.”​—Yakobo 4:8; 2:23.

•   Buno tube beida ba Kalaga, twatunganana kulama bulingilingi na bubo bwekutunda tulame. Biblia byalosya bubo bwekutunda tulame mu Musambazi 12:13: “Kua Kalaga boba nu kwanza makakizio mage, kubuno ku kabamba kako ukinsa twabumbilwe.”​ —Good News Translation.

•   Mu nkungu zikuvwa, Kalaga ekatikya nsungyo insania nu ekakasa beida bage kalamo ka milyalya u kutenda buno ku babo bekumukumbamina. Mu nkungu zezo, twabogelebogele nunse bibyo bikakita Yehowa gekazindilizya makengelo mage matangi mabezaga namo ku banakantu.​—Nimbo 37:10, 11.