Buno ubasile kuba mwida wa Kalaga watunganana kwijigisya kumumenya nu kukita bikumutananizya. Ndi wakita bubo Kalaga nuwe nti ‘akukunde’ (Yakobo 4:8) Biblia byatutitikizizya buno “we nteli bulazi ku muntu na muntu mutuli.”​—Misako 17:27.

•  Biwatunganana kukita buno umenyinine Kalaga

•  Makengelo matatunganana ku kabamba ka Kalaga

 Sanzulá Biblia

•  Bwatenda Biblia: “Masanzo mansania mopidwe na Kalaga.”​—2 Timoteo 3:16.

•  Bwisulilwa: Kalaga u wasanzizye Biblia. Abikile makengelo mage mu bantu basanzile Biblia. Kitabu kya Biblia u mpanga kinatulosya ntundo za Kalaga. Kikutulosyaga nu bwekubezaga, kwisa munda lutundo lwage, mwisanano, nu kyombo kyage.​—Kutuka 34:6; Kukokomezia Mulembe 32:4.

•  B’unakita: Sanzulá Biblia nâ busi. (Yoshua 1:8) Kengela ku bibyo byukusanzulá, nu wibuzye bunee: ‘Kyanigisya wono musagu ku kabamba ka Kalaga?’​—Nimbo 77:12.

   Anga buno, sanzulá Yeremia 29:11, nu wibuzye bunee: ‘Buni buli ntundo za Kalaga kundi​—ndi za bubobelelo aba nsungyo? Ndi ekunkitila bulingilingi na misako zane, aba ekutunda kunkasa kilemanizio kisoga kya nkungu zikuvwa?’

 Lola nunse bibumbwa

•  Bwatenda Biblia: “Magala [ma Kalaga] matanakuzinda nu bu Kalaga bwage, bikumonekako kutukila kubumbwa kwa kisi, bikumenyininwa ku ‘milimo zage [aba bibumbua bingi NTKI57]’.”​—Baroma 1:20.

•  Bwisulilwa: Anga bunalosya kintu kishembe kyalosya itombe lya motombe, aba bun’ijigisya muntu byeingi ku kabamba kamuntu wakitile masini kishembe makwangamya, Unu bukolsyaga bibumbwa bya Kalaga bikumoneka byalosya bwekubezaga. Anga, lukita lwakwangamia lwa buntonto bwa banakantu nu buzikukambaga bwalosya menge ma Kalaga. Musi nu zingo nkeninkeni zalosya magala ma Kalaga mekukasyaga buno binsania bibe mu biziki byabyo.​—Nimbo 104:24; Isaya 40:26.

•  B’unakita : Ibekele nkungu za kulola nu kwijigisya ku kabamba ka bibumbwa. Nu wibuzye bunee, ‘Ganamona buno binsania byabumbilwe mu lukita lwa kwangamia, bubo bwan’igisya kikizi ku kabamba ka Kalaga’ * Lebelebe, bibumbwa tabikutwigisyaga binsania ku kabamba ka Kalaga. Ukinsa atukasile Biblia.

 Kambya izina lya Kalaga

•  Bwatenda Biblia: “Namusakike nunse kubuno amenyine izina lyane. Alile kundi nu namwitabile.”​—Nimbo 91:14, 15.

•  Bwisulilwa: Kalaga, wozo ukumanwa Yehowa, ekwangaga nunse babo b’izi izina lyage nu bekulikambyaga munzila z’isa. * (Nimbo 83:18; Malaki 3:16) Kubuno Kalaga winyene u watubula izina lyage, kasi winyene u wimenyesya kweitu. Atenda bunee: “Nne nili Yehowa; u izina lyane.”​—Isaya 42:8.

•  B’unakita: Kambya izina lya Yehowa g’ukutenda ku kabamba kage.

 Sega ku Yehowa

•  Bwatenda Biblia: “Yehowa eli bwigi na bansania bekumusega.”​—Nimbo 145:18.

•  Bwisulilwa: Yehowa ekubezaga bwigi na babo bekumusega kwa bukatizio. Masego meli gesamba ikumbamelo kwa Kalaga, nu mekulosya bukuti butuli nabo kweli.

•  B’unakita: Ba na bugomya bwakusega Kalaga. (1 Batesalonika 5:17) Musolele bukuj’ungwa nu mankunku m’uli namo.—Nimbo 62:8. *

 Gugumania bukatizio bwobe ku Kalaga

•  Bwatenda Biblia: “Geteli bukatizio tabunakulungana kumutananizia.”​—Baebrania 11:6.

•  Bwisulilwa: Twatunganana kuba na bukatizio ku Kalaga buno tumu kunde. Bulingilingi na Biblia, kuba na bukatizio kwisa munda bintu byeingi kutinga kukatizia tugu buno lebelebe Kalaga ekubezagako. Bwisulilwa lingo kumukatizia kwa mutima unsania, bwisa munda kukatizia malagi nu makakizio mage. Kulemaninana u bulingilo bwa bwida busoga.

•  B’unakita: Bukatizio bwa bulili bukulemaninaga bumenyinino. (Baroma 10:17) Kasi jigisye Biblia buno wimonele winyene ndi unalemanina Kalaga nu nsungu zage. Balongeki ba Yehowa babe na mbogimbogi zakwijigisya Biblia n’obe. *

 Kita bikutananizya Kalaga

•  Bwatenda Biblia: “Lutundo lwa Kalaga luli kulanga makakizio mage.”​—1 Yoana 5:3.

•  Bwisulilwa: Yehowa eli bwigi na babo bekulosya buno bamutunda, kwakukita mpumba zabo zinse buno bânze makakizio mage.

•  B’unakita: G’ukwijigisya biblia lekanukya byatunda nu byasomba Kalaga. Ibuzye bunee: ‘Migaluko mikizi zinina kita lingo buno nitananizye Mubumbi?’​—1 Batesalonika 4:1.

 Menya buku kwangaga Kalaga kwakulemba nsungu zage

•  Bwatenda Biblia: “Sondazi, mumenye buno Yehowa eli musoga.”​—Nimbo 34:8.

•  Bwisulilwa: Kalaga akumana wimonele uwinyene bwekubezaga musoga. Gawamone uwinyene buno akutunda nu ekukwangaga, watunde kuba mwida wage.

•  B’unakita: Kambya nsungu z’ukumona mukusanzula Biblia, nu wamone buno zili za mutali. (Isaya 48:17, 18) Lingo mona bwakindile bantu kishembe bakinda mankunku, bubagalukizye kalamo kabo nu ka bikanga byabo, nu kumona mbogimbogi za bulili, * kutingila lukasyo lwa Kalaga.

 Makengelo matatunganana: Tatuna menya Kalaga kubuno eli muuza nu ntekumonekaga.

 Bulili: Kuli bintu bitatuna vwama kumenyinina ku kabamba ka Kalaga, anga buno, eli muuza utekumonekaga. Tondo, tatun’ida kumenya Kalaga kabamba ka bubo. Kububo Biblia byatenda buno, twatunganana kumumenya buno tumone kalamo ka milyalya. (Yoana 17:3) Biblia byakambya bitondo biteli bibibu kwakutukasya kumenya Mubumbi weitu. Anga, bwekubezaga, makakizio mage nu mpango z’eli nazo ku kesé nu ku banakantu. (Isaya 45:18, 19; 1 Timoteo 2:4) Nu anga butwatendile gantar’agano, Biblia byatulosya nu izina lya Kalaga. (Nimbo 83:18) Kasi, tatuna menya tugu Kalaga, tondo tunaba nu bida bage.​—Yakobo 4:8.