Kilo. Biblia byalosya buno twatunganana tugu kusega ku Kalaga winyene kutingila izina lya Yesu. Yesu ambwinde beigisibwa bage buno: “Segazi ku Kalaga anga bubuno; Tateiswe uli mwigulu, izina lyobe liganunwe.” (Matayo 6:9) Aba busi bumozi ntabwide beigisibwa bage basege ku baswagibwa, banzelo aba ku ungo muntu kuteli kusega ku Kalaga.

 Yesu abwide lingo beigisibwa bage bunee: “Nne nili nzila, bulili nu kalamo. Takuli muntu umozi unabasa ku Tatane ndi ntabasila mundi.” (Yoana 14:6) Yesu tugu u wasombwedwe na Kalaga kwa kututendela kweili.​—Baebrania 7:25.

Ndi buli bubi kusega ku Kalaga nu ku baswagibwa?

 Kalaga atendile buno ku imozi ku milembe ikumi: “Nne Yehowa, Kalaga weinyu, nili Kalaga wa lugi.” (Kutuka 20:5,) Kalaga eli na “lugi” mu nzila nkizi? Bwisulilwa bwa kunsi bwa bwisuzi bwa Biblia bwa New American Bible bwatenda buno ‘ekusegaga bantu bamukumbamine we winyene tugu.’ Kalaga ekusegaga muntu alosye misako insania za kukumbamina kweili tugu kwisa munda nu masego.​—Isaya 48:11.

 Ndi twasega ku ungo muntu inube ku baswagibwa aba banzelo, nti twagila Kalaga. Mu nkungu zatundaga musingwa Yoana kukumbamina mwanzelo, mwanzelo amuzuginde nu kumubula bunee: “Widange, ntukite bubo! Nili munyobe na mulimo nu wa mibuto zobe beli ba bulongeki bwa Yesu. Kumbamina Kalaga!.”​—Kulolesibwa 19:10.