B’lo dae ná cho 5 kana, le-djoi ma, le-vei ma na nga jieni bbo krʉ bi ro ndima kiroho nǎ programu ba dz’ djolú gble nari dho JW Teve djó. Ngba mai ko nja JW teve nǎ da nalo 2020 na ndirigoti 2020 goti si njini nalo ma ró, akonja ri chulu njini b’lo ná bblo lo bi 10 nǎ 2014 djoro kpø njʉnga djo.

Ri thika le le luga 185. Anji le ngʉ adi JW Teve nji Angle nǎ dhé. Ro, 1/5/2015 djoro, Lodho chutso ddá ná che na le d’ri ná kpa lieri le lé JW Teve thika luga 40 nǎ. Kpadjo, JW Teve thika léle luga 185 nǎ na nga djoro cho da tho b’lo.

Ri vʉ ngø djolú gble. JW Teve le bbʉ le-djoi ma, le-vei ma na dho ngø djolú gble nari dzá lodho le video thika kpari le bí dz’ lu djo. JW na le adi nji nji video adi pʉ ná kpa chulú bí ina nja kʉ ná kutaniko lu føri kʉ Ethiopia nǎ ma, Iceland nǎ ma, Mongolia nǎ ma, Saipan nǎ ma, Tuvalu nǎ ma, ndirigoti Uganda nǎ ma. JW Teve le adi nja 230 kʉ ná ngø lu, føri kʉ dada dda ná ngana ngø, Antarctic ma, dda kana kʉ ná ngø ddiddi Heard Island ma ndirigoti McDonald Islands ma na bbai, ná føri kʉ nga nrŭ e bi ná nga. Ngba njangʉe JW Teve rivʉngʉe anziro ná saa na ná nrŭ dhó hesabu kʉ 8.6 millioni ngatsi.

Ri kʉ bí ndirigoti ndi nǎ njonjo kʉ nalo kpari na. JW Teve singʉe ná nga djo ro, ri njini saa 60 ngatsi b’lo, føri tsu ndi nǎ nari kʉ hotuba ma, nrŭ tso le ngadhu nari ma, b’lo njini nalo djo le ngadhu nari ma, ø lo ma ndirigoti dramu ma. JW Teve nǎ ya kwanza dyi, La plus belle vie qui soit, singʉe na nga djoro, krʉ bi ro miziki ma video ma na adi si JW Teve djo. Fø dyi thika le lee luga 368 nǎ.

Ri adi nji ná nrŭ. Ri tso ngangʉeni ná saa na, Lodho chutso ddá na che na le d’ri ná kpa dhé ngʉ adi fø programu nji. Føri goti, kpa tsotso adi kó ná kpa ma ngangʉe fø njí njidha tso ddi. Fø nga djoro kpø njʉnga djo, b’lo nji fø progamu ná le-djoi dho hesabu si 29 b’lo.

Ri djo nrŭ po nalo. Amerique nǎ dhe na ngʉ nzani ná ddikpa le djo pori, ndi adi hwè ba bbo fø programu djó si ná fø dyi dho. Ke pori i: “Bblo kʉ ná miziki, ndi nǎ bblo kʉ nalo na adi rili mae ngab’odha na ndirigoti ri adi rili ma ve madho nzadha tso maisha na. Fø miziki adi ma tsotso ko madho nyie nja Wakristo bbai ná føri adi ma nanga ke bbo. Mbai bbo nidho ni bbʉ ko dho ná fø nyo dho!”

B’lo ndima nja 2016 nǎ bi 11 nǎ JW Teve nari goti, ndima dhi kpetsi ngba vingʉe kaser dhi dhe na ná ddikpa famiye ndingʉeri i: “ Ko dzzngʉe dzz Paradiso iko karibu dhi video nǎ miziki ko rrngʉe ná saa na. Fø nrŭ ko njangʉe ko nganga bbai. Ma di riddi ma ka ma ve kpakpalo tso nza ro Yova adi riji ma churi ndi chu kodho lo ngba ndirigoti ke ka ndi kó ko tsotso ko. Fø video chulú Yova adi kodhó bí kʉ ná sala goti ngʉngʉ.”

Ukraine nǎ ddikpa dza dhi nrŭ pongʉeri JW teve na le adi nja bi ró ná programu djo i: “Meresi bbo Lodho chutso dda ná chena le d’ri ná kpa bbʉ ná JW Teve dho!”

Ko po mbai bbo ndi dhi saa na ke bbʉ ná fø nyo dho, føri rili ko tso gbani dz’lú djó kʉ ná le-djoi ma le vei ma na.​—1 Petro 2:17.