Dz’ djolu gble bí kʉ ná ndrŭ adi ripo ndima kʉ Wakristo, ro kpa adi ndima tso tsú politiki nǎ lo na. Nja dini adi riji ndima chuni bbo vote dhi kandida ma, parti politiki ma na tsotso ndima kó nari na. Ndirigoti politiki nǎ kpa adi njínji dini nǎ lo na ndiro dini na kpa vʉ ndima vote dhi saa na d’e. Bí ina dini nǎ bbobbokpa dho le adi bbonga bbʉ politiki nǎ. Ndirigoti bí kʉ ná ngø nǎ le adi nja dini nzǐ leta dhó dini.

 Ni ká ddiri ngbǎ fø lo djo? Yesu Kristo dyø ná kpa dho ká ri kaka ndima tsú ndima politiki nǎ lo na? Fø logoti ni ka ni ba Yesu dhó loroji ni nja ró. Ke pongʉeri: “Ma bba loroji ni dho, ma njieri nari bbai ni dho maddi ringani ni njiri fø.” (Yohana 13:15) Nde, politiki nǎ lo djo ká Yesu bba ngbá loroji?

 Nzá. Yesu nzá tsungʉe ndi tso dz’ dzá politiki nǎ lo na ri.

 Yesu nzá nengʉe ndi é politiki djó bbonga ri. Shetani Ibilisi jingʉeri ndi bbʉ “dz’ djó krʉ kʉ ná pidhinga” Yesu dho ná saa na, Yesu gʉngʉe ri gʉ. (Matayo 4:8-10) a Ddikpa saa na, ndrŭ njangʉe Yesu nji ná lo ro, ndrŭ jingʉeri ndima li ke pi. Biblia ripo: “Yesu chungʉeri kpa si ndi lø ndima li ndi pi d’e ná saa na, ke tungʉe ndi ndirigoti ke rangʉe di ddiro ngø tsɨ djo.” (Yohana 6:15) Yesu nzɨ ngʉ adi riji ndi njí ndrŭ ji ná lo ri. Føri dho, ke gʉngʉe politiki nǎ lo na ndi ndi tso tsú ná fø ri gʉ.

 Yesu nzá gbangʉe ndi tso ro politiki nǎ ddikpa lo na ma ddi ri. Loroji na, Yesu dhó saa na Wayahudi nzɨ ngʉ adi riji ndima ø palata Waroma dho ri ndirigoti kpa ngʉ adi rinja føri nga kʉ chø kʉ ná lo ri. Kpa ngʉ riji Yesu tsú ndi tso fø lo na ná saa na, Yesu nzá ungʉe fø lo tso ro ri. Ke pongʉeri kpa dho: “Anibbʉ Kaizari dhó ritsi Kaizari dho, ro Mungu dhó ritsi Mungu dho.” (Marko 12:13-17) Ke nzá tsungʉe ndi tso politiki nǎ lo na ri, ro ke dhongʉeri kpa dho nari kʉ, Roma nǎ guvernema inga Kaizari kó ná palata ringani kpa øø. Ndirigoti ke dhongʉeri nari kʉ ri nzá ngani le rrnga guvernema po ná lo dho krʉ ri. Ri nzá ngani le bbʉ Mungu dhó ritsi guvernema dho ri. Loroji na, ri nzá ngani le bbʉ madha guvernema dho ri.—Matayo 4:10; 22:37, 38.

 Yesu gbangʉe ndi tso Mungu dhó Pidhinga na ndirigoti ke ngʉ adi riddi nja ndrŭ dho. (Luka 4:43) Ke nzɨ ngʉ adi ndi tso tsú politiki nǎ lo na ri dhonalo ke chungʉeri nari kʉ, Mungu dhó Pidhinga dhé ka ndi si rili Mungu pingʉe ndrŭ dho anziro ná lo njini njí. (Matayo 6:10) Yesu chungʉeri nari kʉ, Mungu dhó Pidhinga nzɨ si njínji ndrŭ dhó pidhinga chulu ri ro ri si ndrŭ dhó pidhinga tso d’ød’ø.—Danieli 2:44.

 Nzɨ. Yesu unakpa rrngʉe nga ke pongʉe kpa dho ná i lo dho “ni nga kʉ dz’ dzá sehemu ri.” (Yohana 15:19) Kpa dyøngʉe ke dho loroji ndirigoti kpa nzá tsungʉe ndima tso politiki nǎ lo na ri. (Yohana 17:16; 18:36) Politiki nǎ lo na kpa ndima tso tsú nari rɨngana, kpa njingʉe Yesu jangʉe ndima dho ná lod’radha ndirigoti longaddidha dhi njí Mungu dhó pidhinga djo.—Matayo 28:18-20; Matendo 10:42.

 Karne ya kwanza nǎ Wakristo dho, bbo nǎ mana kʉ ná lo ngʉe Mungu dho le ngarr nari, ro kpa ngʉ adi ngarr dz’ djó guvernema dho maddi. (Matendo 5:29; 1 Petro 2:13, 17) Kpa ngʉ adi ngarr ndima di ná ngø nǎ sheria dho ndirigoti kpa ngʉ adi palata ma ø ddi. (Waroma 13:1, 7) Nzɨ mai kpa ngʉ ndima tso tsú politiki nǎ lo na ro, kpa ngʉ adi faida ba nì guvernema nǎ bbobbokpa ngʉ nji ndrŭ dho ná bblo lo nǎ ro.—Matendo 25:10, 11; Wafilipi 1:7.

 Biblia ridho nari kʉ, Yesu ma ndi unakpa ma na krʉ nzá tsungʉe ndima tso ro politiki nǎ lo na ri. Føri dzá lo dho, Yova dzá Dimu kʉ Wakristo nari dho kpa ro nga e ngbá nga laidjó ma ddi ri. Karne ya kwanza na Wakristo bbai, kpa adi Yesu jangʉe ná njínji, kpa “Pidhinga dzá hwè lo-i d’ra.”—Matayo 24:14.