Ngbà mai dz’ djó bbobbonga njingʉe kpakpanga ndima cho fø lɨ tso ro, Bi 2 ddo 24, 2022 nǎ bbʉtso, Russie nǎ bbasødda ngangʉe lɨ njidha tso Ukraine na. Fø lɨ ta nari ká lø dz’ lu ronga ngbaribbai? Nations-Unies nǎ sekretere generale António Guterres, po ɨ lo nari goti ddo da sese: “Ndrŭ ka ndima nzani bbo ndirigoti ritsi ka ndi sani bbo fø lɨ djotsina Europe nǎ ndirigoti dz’ djolu gble.”

•   Yesu Kristo d’rangʉeri, “ndrŭ tsɨ si lɨ nji ndima kana ndrŭ tsɨ ro ndirigoti pidhinga si lɨ nji ndima kana pidhinga ro.” (Matayo 24:7) Azø ɨ djǒ ripo ná lo “‘Ni Nini Ishara ya “Siku za Mwisho?” nja ni chu ngbaribbai ma Biblia ridho nari kʉ njʉ njini ná lɨ Yesu d’rangʉe ná unabi njini nari dhǒ.

•   Biblia nǎ Ufunuo dzá buku ddi lɨ “kazz dhi rangi na kʉ ná kana” djó di ná ke na ndirigoti ke “ngoi tu da dz’ djó ro.” (Ufunuo 6:4) Azø ɨ djǒ ripo ná lo “Wale Wapanda-Farasi Ine​​—Ni Nani?” nja ni chu ngbaribbai ma fø unabi njini lɨ dhi lo kana njʉ nari d’e.

•   Danieli dzá buku pongʉeri nari kʉ lɨ si ta “arø nga laidjó pi” ma kana “agʉ nga laidjó pi” na. (Danieli 11:25-45) Anja video Njinjini ná unabi​—Danieli Sura 11 nja ni chu addudho ma, Russie ma, ndi na gba ndima tso ná kpa ma na le nzǐ arø nga laidjó pi nari d’e. a

•   Ufunuo dzá buku ma tilo ddi “Ritsi ddi na ka ná Mungu dhó bbo ddo dhi lɨ djo.” (Ufunuo 16:14, 16) Ro føri nga kʉ njʉ njini njini ná lɨ bbai ri. Azø ɨ djǒ ripo ná lo, “Vita vya Har-Magedoni Ni Nini?” nja ni chulo bbo gosi si ná ddo djo d’e.

•   Biblia rid’ra Mungu si “lɨ tso d’ød’ø dz’ lu djó ro.” (Zaburi 46:9) Azø ɨ djǒ ripo ná lo “Tumaini Bora la Wakati Ujao” nja ni chulo bbo Mungu tsoni gosi ná ddo na ndi si nji ná lo djo d’e.

•   Yesu ddingʉeri ndi unakpa dho kpa nziri Mungu dhó Pidhinga si. (Matayo 6:9, 10) Fø Pidhinga kʉ ra nǎ kʉ ná guvernema, ri si rili Mungu ji ná lo njini dz’ djo ndirigoti Mungu ji ná lo kʉ dz’ djó e ngoi. Nja ni chu ngbaribbai ma fø Pidhinga si faida bbʉ ni dho nari d’e, anja ɨ djǒ ripo ná video Ufalme wa Mungu Ni Nini?

 Ukraine nǎ di ná Yova dzá Dimu dada 129 000 djolu. Ddiddi nja ngøna kʉ ná Yova dzá Dimu bbai, kpa adi Yesu dyø, nga ndima ro kʉ ngbá nga lai djó maddi nari na ndirigoti kpa nzɨ adi ndima tso ro tsu lɨ dhi lo na ri. (Yohana 18:36) Dz’ djolu gble kʉ ná Yova dzá Dimu adi ra anzi “Pidhinga dzá hwè lo-i” ndima d’ra nari na dhonalo ri si ndrŭ dhó kpakpalo sisi, føri tsu lɨ maddi ndi na. (Matayo 24:14) Ko ni nzǐ ni ne ko nja ni chulo bbo Biblia nǎ ngab’odha dhi lo djo d’e.