Yova jiri ko njí maisha hwè ndirigoti ke jiri nja saa na ko njí fete ro ma ddi. Nde, fete krʉ ká adi Mungu nyǒ thotho? Ko ká ka ko dhǒ jidha Yova dho ngbaribbai fø lo kana?

1. Bí kʉ ná fete ká adi hwè bbʉ Yova dho nzɨ addudho?

Bí kʉ ná fete nzá dyʉ ndi ro Biblia ddi ná lo ró ri ndirigoti ri tso wapagani ngangʉe nari ni chu ró, ni nanga ka ndi keni ke. Fø di ná fete tso nju kali dhi dini na. Ri chulu ndrŭ ka ndima gba ndima tso uchawi dhi lo na ma, inga ndima di riddi nari kʉ nafsi ro nzɨ adi dhe ri. Nja kʉ ná fete dyʉrie ndi kali dhi lo ró (ushirikina) inga nzá ka ndi njini ná lo ndrŭ u nari ró. (Isaya 65:11) Yova rija ndidzá ndrŭ dho: “Anituni ro . . . ndirigoti nzɨ ni lø nzá tsetse ná ritsi ronga.”​—2 Wakorinto 6:17. a

2. Ndrŭ madha ba nǎ ro ná bbobbo ddo dho ká Yova adi ndi mbu ngbaribbai?

Yova rija ko dho, nzɨ ko “li ko thí ndrŭ djo.” (Azø Yeremia 17:5.) Nja kʉ ná bbobbo ddo ndrŭ lirie ndiri na ndima bbʉ madha pikpa dho, inga bbasødda dho d’e. Nja kʉ ná ddo na, ndrŭ adi heshima bbʉ ndima dhó ngø nǎ drapo dho inga ndima dhó ngø bangʉe uhuru nari dho. (1 Yohana 5:21) Nja kʉ ná ddo na, ndrŭ adi heshima bbʉ politiki nǎ lo dho inga ndima dhó sosiete dho. Yova ká ka ndi mbu ndi ngbaribbai njati ko di nzá ka ndrŭ dho ná madha bbʉ ddikpa le dho inga ddikpa tengenezo dho ró?

3. Mungu adi nja fete tso u nzɨ dho nari ká kʉ ngbá nyi?

Biblia gʉ “bbo le wa jø nari ma, ʉna dhi fete le nji nari ma, [ndirigoti] ddi lé le ddi nja ndrŭ na wa jødha dho nari ma na.” (1 Petro 4:3) Nja kʉ ná fete dhi ngana, nzɨ ndrŭ adi ndima ronga tso ro cho chelo njidha ró ri ndirigoti ndrŭ adi uasherati ma nji. Ndiro ko kana kau di chøchø Mungu na d’e, ringani ko pʉ che kʉ ná nyi krʉ ko ró ro.

 ANE LONANGA BBO

 5. Ako nja ndrŭ tsotso ndiro ndrŭ bbʉ heshima ni u ná lo dho d’e

6. Yova jiri ko é hwè na

Yova adi riji ko ba saa ndiro ko di ddinga kodhó familia ma, kodhó bbakau ma na hwè na. Azø Muhubiri 8:15, ndirigoti anitilo i ngadhudha djo:

• Yova jiri ko é hwè na nari ká i verse dhǒ ngbaribbai?

Yova adi riji ndidzá ndrŭ ba saa ndiro ndima di ddinga nja ndrŭ ma na hwè na. Aninja VIDEO ndiro ni nja ngbaribbai ma ndrŭ adi rinji fø asamble eternasionale nǎ nari d’e.

Azø Wagalatia 6:10, ndirigoti anitilo i ngadhudha djo:

• Ri ká ngani ko má bbobbo ddo ndiri na ko njí “bblo lo” nja ndrŭ dho d’e?

• Addui ká ka ndi bbʉ hwè ni dho: Ri ká kʉ kpakpanga na le ni cho ndiro ni bbʉ kado fete dho nari inga ni nanga jini nari dho ni ri bbʉ nari?

• Bí kʉ ná Yova dzá Dimu adi saa ba ndima di ddinga ndima dhi nzø ma na ddikpa pekee kʉ ná saa na ndirigoti kpa adi kado ma bbʉ ddi nzø dho. Njati nidhó é nzø ró, ni ká ka ni njí ngbá pekee kʉ ná lo nzø dho?

 LO DZÁ DɄNGA

Yova adi riji ko nji hwè kodhó familia ma, kodhó bbakau ma na. Ro ke jiri nzɨ ko nji nzá tho ndi nyǒ ná fete.

Lo djolu le ngʉ nari

• Ko ká ka ko dhu ngbá lo ko tso, ndiro ko chu ddikpa fete ká tho Yova nyǒ tho ma inga nzá ma nari d’e?

• Ko ká ka ko kó kodhó familia ma, kodhó bbakau ma na tsotso ngbaribbai ndiro kpa famu ko vʉ nanga fete djo ná lo d’e?

• Yova jiri ko é hwè na nari ká ko chu ngbaribbai?