Ø chi ndoa ná ndrŭ adi ridya nari kʉ, ndima ka ndima e hwè na theinga dho ndoa ndima chingʉe ná dyí ringʉe nari bbai dhé ri. Ro føri ka ndi ka ngbà. B’lo ddo bicha ndoa kana ndirigoti ni kpakpanga nji ndima njínji Biblia nǎ yadha na ná Wakristo churi nari kʉ føri ka ndi ka ngbà.

1. Biblia ká bbʉ ngba shauri dza bai dho?

Yova li kpetsi ke ndi ddá chutso familia nǎ ndrŭ dho. (Azø Waefeso 5:23.) Yova adi riji ke vʉ nanga ná lo bbʉ faida familia nǎ ndrŭ dho. Biblia rija dza bai dho: “Aniji nidhi isɨ ndrŭ ji.” (Waefeso 5:25) Føri na mana ká kʉ addu? Jidha na kʉ ná kpetsi ke adi njini bblo ndi bbá le na rie abba ma, inga ndrŭ kana ma ró. Ke adi le ronga b’ob’o chelo ró, ndirigoti ke adi kpakpanga nji ndi gba ledhó loji ná ritsi tso krʉ. (1 Timoteo 5:8) Føri djolu pli, ke adi le tsotso kó kiroho nǎ lo na maddi. (Matayo 4:4) Loroji na, ke ka ndi njí sala ndirigoti ndima zø Biblia ndi bbá le ma na. Njati kpetsi ke di ndi bbá le ronga b’o jidha kana ró, føri na ke rili ndima kana nga e chøchø Yova na.​—Azø 1 Petro 3:7.

2. Biblia ká bbʉ ngbá shauri isɨ ndrŭ dho?

Mungu dzá lo ripo isɨle “dho ringani ndi bbʉ heshima bbo ndi bbá ke dho.” (Waefeso 5:33) Føri ká le ka ndi njí ngbaribbai? Le ka ndi di ngaddi ndi bbá ke dhó bblo kʉ ná sifa djo ndirigoti ke kpakpanga nji ndiri na ndi kó ndi ma, ndima dhi nzø ma na tsotso nari djo. Le ka ndi bbʉ heshima ke dho ke vʉ nanga ná lo na ndi ndi tso gba nari chulu, heshima na ndi loti ke na ndirigoti ke djo nari chulu, njati ke é nzá u Yova ná ke ma ró.

3. Dza dhi ndrŭ ká ka ndima li ndima dhó ndoa kpakpa ngbaribbai?

Biblia ripo dza dhi ndrŭ djo: “Aro kʉ ná ndrŭ si ngʉ ddikpa le ndí.” (Matayo 19:5) Føri na mana kʉ kpa dho ringani kpa njí kpakpanga bbo ndiro nzɨ ndima dhó jidha djødjø ró. Føri kpa ka ndima njí ddinga ndima saa ba ndima di nari na ndirigoti pʉlʉpʉlʉ ndima ndima dhó jidha ma, ngaddidha ma, inga ndima ndima mbu nari d’ra ndima kana nari chulu. Kpa nzɨ adi ribba ddikpa ritsi ma, inga ddikpa le ro ma é mana na bbo pli ddi ndima dho ri, rie nga Yova dhé ri ró. Dza dhi ndrŭ dho ringani ndima njí kpakpanga bbo ndiro nzɨ ndima nji kau bbo pli nga kʉ ndima lai ndoa dhi le ná le na ró.

 ANE LONANGA BBO

4. Dza bai, aniji nidhi isɨ ndrŭ ndirigoti anib’o kpa ronga b’o

5. Isɨ ndrŭ, aniji ni bbá kpa ji ndirigoti anibbʉ heshima kpa dho

Biblia ripo isɨle bbʉ heshima ndi bbá ke dho njati ke é Yova dho njínji ná ke ma, inga nga ma ró. Azø 1 Petro 3:1, 2, ndirigoti anitilo i ngadhudha djo:

• Njati rie nzá ni bbá ke u Yova ri ró, njaro ni adi riji ke ngʉ Yova má ná ke. Nde ni ká ka ni kó ke tsotso bblo ngbá chulu? Ni ká riddi ni dho ringani ni d’ralo ke dho krʉ saa ró, inga nidhó nyí e bblo, inga ni bbʉ heshima ke dho? Ká addudho?

Dza bai ma ka ndima vʉ lo nanga ddinga ndima dhi isɨ ndrŭ ma na. Ni mai ri kʉ fø ro, nja saa na nzá isɨle ka ndi u ndi bbá ke vʉ nanga ná lo ri. Fø saa na, ringani isɨle d’ra ndidhó ngaddidha heshima na ndi bbá ke dho, ro le dho ringani ndi churi nari kʉ Yova bbʉ bbonga kpetsi ke dho ndiro ke vʉ lo nanga bblo familia dho d’e. Le dho ringani ndi njí kpakpanga ndiro ndi gba ndi tso ke vʉ nanga ná lo na d’e. Fø le rinji nari na, le rili ndi bbá dza nǎ ndrŭ krʉ e hwè na. Azø 1 Petro 3:3-5, ndirigoti anitilo i ngadhudha djo:

• Yova ká adi ndi mbu ngbaribbai isɨle di ­heshima bbʉ ndi bbá ke dho ró?

6. Ni ka ni sisi ni bbá dza nǎ ngaba ná kpakpalo djolu

 LO DZÁ DɄNGA

Kpetsi ke ma, isɨle ma na ka ndima e hwè na njati kpa jini ji ndima kana, kpa di heshima bbʉ ndima kana ndirigoti kpa di njínji Biblia nǎ kanuni na ró.

Lo djolu le ngʉ nari

• Dza ba ká ka ndi njí addu nja ­ndima é hwè na ndima dhó ndoa kana d’e?

• Isɨle ká ka ndi njí addu nja ndima é hwè na ndima dhó ndoa kana d’e?

• Njati ni é ndoa chi ná le ró, ri ká kʉ ngbá kanuni i ka ndi liri nidhó ndoa é kpakpa ri?