1, 2. Bí kʉ ná nrŭ ká adi ngba lo dhú ndima tsó?

DDIKPA bbo kʉ ná vʉvʉ (Tsunami) sa ddikpa bbagʉ nga. Ddikpa jaddake dza sø ddikpa kanisa nă e ná nrŭ kana, ná fø sø vo nja nrŭ ronga vó ndirigoti nja nrŭ cheni che. Kasere dhí dhe hwi ddikpa isɨle, ná fø le bbà nzø mbʉ (5).

² Afø dina chʉ ngaba nalo njini inga kpakpa lo banga ná saa na, bí kʉ ná nrŭ adi ridhú ndima tsó, “Addudho?” Bí kʉ ná nrŭ adi ridhu ndima tsó, ká addudho dz’ djo nga lɨlɨ ndrò na ndirigoti nzadha na. Ni ká d’erie ngaro dhu ni tso fø lodjo ngba?

3, 4. (a) Habakuki ká dhungʉe ngba lo? (b) Yova ká ngʉngʉe kedhó logoti ngba?

³ Biblia ripo udha nà ngʉe Mungu djo ná nrŭ ma ka, afø di na nga ro dhu ddi ndima tso. Lorojina nabii Habukuki dhungʉeri Yova tsó: “Ni ká ribba ma nja che kʉ nalo addudho? Ndirigoti ni ká bba nga nzadha dho addudho?Sadha ma, fudjo nrŭ nji nari ma ká ma nja addudho? Ndirigoti gʉ nrŭ gʉni nari ma là nrŭ nji nari ma, ká ra anzi addudho?”​—Habakuki 1:3.

⁴ Habakuki Sura 2:2, 3 nă, ko zøri Mungu ngʉè Habakuki dhó logoti ndirigoti ke pongʉeri ndi kasi fø lo sisi. Yova ji nrŭ bbo. Biblia ripo: “Ke ngaddi ni djo nì.” (1 Petro 5:7) Yova ndro nzadha bbo, ko ndrorie ri  nari djolú. (Isaya 55:8, 9) Nde akotilo i ngadhudha djò: Nzadha ká kʉ bbo addu dho?

5. Bí kʉ ná dini djó bbobbokpa ká adi ngba lo ddi nzadha djo? Biblia ká ngba lo ddi?

⁵ Nrŭ di nzani ná saa na, dini djó bbobbokpa adi ripo føri kʉ Mungu ji nalo. Nja kpa adi ripo Mungu pɨ krʉ nrŭ si bani na nalo ndirigoti nrŭ si bani na ná kpakpa lo maddi. Ndirigoti kpa adi ripo le nzá ka le famu fø loro ri. Nja kpa adi ripo che cheni na nrŭ, rie nzø ma ro, fø nrŭ krʉ adi ra rà nà ndima ra di Mungu ma na d’e. Føri nga kʉ bbʉbbʉ lo ri. Yova nzɨ adi ko mbu che lo na ri. Biblia ripo: “Ri nzá ka ndi ka bbʉbbʉ Mungu njí che kʉ nalo ri, ndirigoti ritsi ddina ka ná ke nji nga kʉ chø nalo ro ri!”​—Yobu 34:10.

6. Bí Kʉ ná nrŭ ká adi che lo ti Mungu djò dz’ djó krʉ ngaba ná nzadha dzá lodho addudho?

⁶ Bí kʉ ná nrŭ adi ripo dz’ djó krʉ kʉ ná nzadha adi si Mungu dhó ro. Ká addudho? Kpa adi riddi Mungu i kʉ dz’ djó pi. Ro, b’lo ko chueri sura 3 nă nari bbai dz’ djó pi kʉ Stani Diabolo.

7, 8. Nzadha ká kʉ bbo dz’djó addudho?

⁷ Biblia ripo kodho “ngø lú kʉ che kʉ ná ke dhó bbonga tsena.” (1 Yohana 5:19) I ngø djó pi, Stani, tsɨ sani bbo ndirigoti ke nă nga kʉ zø ro ri. Ke “ nrŭ sha dz’ djolú gble.” (Ufunuo 12:9) Bí kʉ ná nrŭ adi ke dyø. Føri kʉ ya kwanza kʉ na lo, nari rili dz’ djónga lɨ kali na ma, ndro na ma, ndirigoti che lo na ma.

⁸ Dz’ djó nzadha kʉ bbo dho ná nja lo ki ma kʉ ddi. Adamu ma Eva ma na tsangʉe Mungu ro nari goti kpa dhó nzø bangʉe chenga. Ndirigoti chenga  dzá lodho, nrŭ adi rili nja nrŭ nzani nza. Kpa adi ndima nja pli nja nrŭ djolú. Kpa adi gʉni gʉ ma, kpa adi ra là dhí ngana ma, ndirigoti kpa adi nja nrŭ bé pá. (Muhubiri 4:1; 8:9) Nja saa na nrŭ adi nzani “nzá le pɨ nalo ngaba” nari dho. (Muhubiri 9:11) Nrŭ ka ndima ba aksida ma, che kʉ nalo ma, dhonalo nrŭ bani che kʉ ná ngana ndirigoti che kʉ ná saa na.

9. Yova ri bba che lo rá anzi dhonalo kʉ ni, nari ká ko ka kò uu addudho?

⁹ Yova nzɨ adi che lo ro bbʉ ri. Là ma, fudjo ma, ndirigoti che lo ma ngaba nari dho, nzá ringani koti chelo Mungu djò ri. Mungu nzɨ adi che lo ro bbʉ ri lorojina, rì ngø ja nari ma, bbo vʉvʉ ma ndirigoti dda chu nari ma na. Njaro ni ka ni dhuri nitso, ‘Njati Yova e ngø djó ritsi ddina ka nake ri ro, ke ká adi che lo tso cho nzɨ addudho?’ Ko churi Yova adi ngaddi bbo kodjo. Føri dho, che lo dho ke bba nga dho nalo kʉ nì.​—1 Yohana 4:8.

10. Stani ká tsangʉe Yova ro ngbaribbai?

¹⁰ Edeni dhí í nă, Diabolo shangʉe Adamu ma Eva ma na. Stani pongʉeri Mungu kʉ che kʉ na pi. Ke pongʉeri Mungu jʉ Adamu ma Eva ma na tso bblo kʉ ná ritsi ró. Stani jingʉe kpa uri ndi kʉ bblo kʉ ná pi Mungu djolú pli ndirigoti kpa nga kʉ Mungu dhó lazima na ri.​—Mwanzo 3:2-5; anja Longatudha 27.

11. Kodho ká ringani ko ngʉ ngba logoti?

¹¹ Adamu ma Eva ma na nzá rrngʉe nga Mungu dho ri ndirigoti kpa tsangʉe tsa ke ro. Kpa ddingʉe ri ndima ka ndima vʉ bblo lo ma inga che lo ma nă nga ndima dho. Tsa tsangʉe ná kpa nji che kʉ nalo, ndirigoti  Yova i chu bblo kʉ nalo ko dho nari ká ke ka ndi dhoe ngbaribbai?

12, 13. (a) Yova ká chengʉe Adamu ma Eva ma na théi nzá addudho? (b) Yova ká bba Stani e dz’ djó pi ndirigoti nrŭ nyo pi ndima djò ndima ro addudho?

¹² Adamu ma Eva ma nzá Yova sangʉe théi ri. Fønga ringa na, ke bbangʉe kpa gø nzø. Yova ji Adamu ma, Eva ma na dhí nzø vʉ longa ndima dho ndima ro, ie ká ka ndie ndima dhó pi nari. Yova pɨngʉeri dz’ djónga lɨ kaka ná nrŭ na, ndirigoti Diabolo njí addu ma ró, føri ka ndi njini nji.​—Mwanzo 1:28; Isaya 55:10, 11.

¹³ Stani gʉngʉe Yova mamilioni kʉ ná malaiká njí. (Yobu 38:7; Danieli 7:10) Yova bbangʉe saa Stani dho, ndiri na Stani dho ndi pongʉe nalo ká kʉ bbʉbbʉ ma nari d’e. Ke bba saa nrŭ dho, nrŭ nyo pi ndima djo ndima ro Stani dhó bbonga tsena. Ndiro nrŭ chu ndima ká ka ndima nyo pi ndima djo bbʉbbʉ ngadhí Mungu dhó kpakpanga ro nari d’e.

14. Mungu bba saa dá, nari ká dho ngba lo?

¹⁴ Cho løfu bí, nrŭ mburi ndima nyo pi ndima djo ndima ro, ro nrŭ tsonga lo gʉgʉ. Føri ridho Stani kʉ kali ba. Nrŭ dho lo ji Mungu ko ndima tso tso. Nabi Yeremia pongʉe bbʉbbʉ lo, ɨ ndi pongʉeri nari na: “Ma churi bblo, Ee Yova, nrŭ dhó chu nga kʉ nrŭ dhó kpakpanga na ri. Ri nzɨ ka nrŭ dho ndima ddá chu tso ndima dho ri.”​—Yeremia 10:23.

15, 16. (a) Yova ká bba nga nzadha dho bí cha addudho? (b) Yova ká d’e Stani bbʉ ná nzadha tso d’ø nzá addudho?

¹⁵ Mungu ká bbanga che lo dho bí cha addudho? Che lo njini nari tso ká ke cho nzɨ addudho? Ri jie  ddo da bí ndiri dhori Stani dhó pi tsonga lo gʉgʉ. Nrŭ mbu njonjo kʉ ná pidhinga, ro nrŭ tsonga lo gʉgʉ. Ngba mai darasa nalo ma, tekinolojia na lo ma ra anziro, che lo ra anzi, nga kʉ chø nalo ma, njedha ma, fudjo nrŭ nji nari ma, ndirigoti là nrŭ nji nari ma ra anzi anji nga djolú. Ko nzá ka kò nyo pi ro ko djò ri, rie nga Mungu dhé ri ró.

¹⁶ Ro, Yova nzá d’e Stani bbʉ ná che lo tso ro d’ø ri. Ke njie ri fø ró, ri ka ndi njaeni Mungu gba nditso Stani dhó pidhinga na nari bbai, ro ke nzá ka ndi nji fø di nalo ro ri. Nrŭ ka ndima ueri ndima kʉ kpakpanga na ni ndima nyo pi ndima djo ndima ro. Ro føri kʉ kali, ndirigoti ke nzá ka ndi gba nditso kali dhí lo nari. Ke nzá ka ndi sha kali ro ri.​—Waebrania 6:18.

17, 18. Stani bbʉ ná che lo krʉ tso ká Yova si d’ø ngbaribbai?

¹⁷ Yova ká kʉ kpakpanga na nì, ndi d’ya na tsatsa ná nrŭ nji nalo ma Stani nji nalo ma na tso d’e? Nio. Krʉ kʉ nalo kaka Mungu dho. Yova chu Stani pongʉe ndi djo ná logoti ka ndi ngʉe ná saa ngba. Ndirigoti Yova si i dz’ djonga ngʉ paradiso ndi pɨngʉe nari bbai. Krʉ kʉ “nonga le no ná kabuli nă ná nrŭ” si gaga. (Yohana 5:28, 29) Nrŭ nzɨ dhe kasi nji ri inga ndima dhè dhe ri. Yesu kasi Stani bbʉ ná che lo krʉ sisi. Yesu chulú Yova si “Diabolo dhó njí sasa.” (1 Yohana 3:8) Ko kʉ hwè na bbo, fø ddo si nari nji, Yova ngatso ve ko chú ndi ndirigoti ko jiri ngba ró, ko vʉ ke ko dhó pi. (Azø 2 Petro 3:9, 10.) Nza ma ko nzani ná saa na, ke adi ko tsotso kó ko nja ko ve ngatso d’e.​—Yohana 4:23; Azø 1 Wakorinto 10:13.

¹⁸ Yova nzɨ adi ko cho kpakpanga na ko vʉ ndi ndie ko dhó pi ri. Ke bbʉ le lé ro lé longa vʉ nari nrŭ dho.  Akonja ngbaribbai ma fø kado na mana kʉ bbo ko dho nari.

19. Yova ká bbʉ ngba blo kado ko dho? Fø kado dhò ká ko ka kò po mbai addudho?

¹⁹ Le lé ro lé longa vʉ na føri kʉ Yova dhó ro si ná kado. Føri rili koe njonjo ză ró ro. Ză nzá ka ndi vʉ bblo lo ma, che lo ma nanga ro ri. Ro, ko ka kò vʉ kodhó maisha kasi di ngbaribbai ma nari ndirigoti ko ka kò vʉri kò nji Mungu ji nalo. (Mezali 30:24) Ko nga kʉ mashini bbai ri, dhonalo mashini adi ndi njí le pɨ ná njí dhé nji. Ko kʉ longa vʉdha na ko chu kò kasie ngbadi ná nrŭ nari ma, kodhó kau kasie ie nari ma, ndirigoti ko kasi addu nji kodhó maisha nă nari ma na. Yova ji kodhó maisha e bblo.

20, 21. Njʉ ká ni ka ni vʉ ngba bblo kʉ nalo nanga?

²⁰ Yova ji kò ji ndi ji. (Matayo 22:37, 38) Ke kʉ ddikpa hwè na kʉ ná baba bbai kedzá ngba di ripo “ma ji ni ji” ndi thí naro ná saa na, nzá le chò ndi cho ro. Yova bbʉ le lé ro lé longa vʉ nari ko dho, ndiro ko vʉri ko ká ka kò nji njí ndi dho inga nzá ma nari d’e. Stani ma Adamu ma Eva ma na vʉngʉeri ndima gʉ Mungu gʉ. Ni ká ka ni nji njí ngbaribbai longa vʉdha dhí kado na?

²¹ Nidhó longa vʉdha na anji njí Yova dho. Mamilioni kʉ ná nrŭ vʉri ndima rrnga Yova dho Stani djolú. (Mezali 27:11) Nidho ká ringani ni nji ri ngba njʉ ndiro ni kasi di Mungu dhó ø dz’ djó, ke kasi nzadha tso d’ø ná saa na? Gosi ná sura si fø logoti ngʉ.