1-2. (a) Ri ká kʉ ngba saa na i ko adi kodhi ji ko ji ná dhedhe ná le nga no bbo ri? b) Kuna ká Yesu njingʉe addu dhe ndi dhe nari nji?

 BBɄBBɄ dhé, njati rie bí ma cho da ji ko ji ná nrŭ chengʉeni nari goti ri ró, ko adi kpa ngano godhé. Ko di ngaddi kpa chengʉeni ná ddo djo ná saa na, ko adi kpa nga ki no vi.

² Krʉ cho ró, ko adi ko tso nju mamilioni kʉ dz’ djolu gble ná nrŭ ma na ndiro ko no bbo ko jirie ná ke dzá dhe nga d’e, ná føri kʉ Yesu Kristo. (1 Pe. 1:8) Ko adi ko tso nju dddinga ndiro ko no le ødha dhi be dho bbʉngʉe ndidzá shinga ndiro ndi tu ko chenga nǎ ro ndirigoti dhe nǎ ro ná ke nga d’e. (Mt. 20:28) Føri dho, Yesu jangʉeri ndi unakpa nó ndidzá dhe nga. Ke dhe nari nji kuna, ke njingʉe nzá ro ndi d’erie nji ná sherehe ndirigoti ke jangʉeri: “Anidi rinji fø ma nga nodha dho.” *​—Lu. 22:19.

3. I lo nǎ ká ko si loti ngba lo djo?

³ Yesu dzá dhe nga nodha dhi ngana si ná nrŭ kana ro sese dhó hesabu kʉ ná kpa kʉ ngab’odha na ndima si ra rà na. Ro ngab’odha na kʉ ndima si di dz’ djó ná mamilioni kʉ ná nrŭ ma adi si ddi fø ga. I lo nǎ ko si loti addudho ma njonjo dhó ngab’odha kʉ ná fø nrŭ nanga adi jini ndima si Ukumbusho dhi ngana krʉ cho ró nari djo. Ko si lo ki ti ngbaribbai ma ko adi faida ba fø ga ko si nari nǎ ro nari djo. Ya kwanza akonja ché na le d’ri ná kpa ká adi si Ukumbusho dhi ngana addudho ma nari.

4. Addudho i ká ché na le d’ri ná kpa adi mukati nyǒ ndirigoti divai jø Ukumbusho dhi ngana?

⁴ Krʉ cho ró, ché na le d’ri ná kpa adi mukati nyo ndirigoti divai jø Ukumbusho dhi ngana. Nde kpa ká adi mukati nyo ndirigoti divai jø addudho? Fø logoti ngʉdha dho, addinga Yesu ngʉe dz’ djó ná saa na, kedhó maisha nǎ ya mwisho kuna njingʉeni nalo djo. B’lo Pasaka dhi nyo da nari goti, Yesu ngangʉe tso ná sherehe le adi nzi Bboke dzá ngasdjo nga dhi nyo. Ke bbʉngʉe mukati ndirigoti divai 11 ngʉe ná chi tøni na mitume dho ndirigoti ke pongʉeri, kpa nyo ri ndirigoti kpa jø ri. Yesu tingʉe lo kpa na aro kʉ na koddo djo inga rrdha djo, føri ngʉe ø koddo ndirigoti Pidhinga dhi koddo. * (Lu. 22:19, 20, 28-30) Fø koddo klongʉe chu tso fø mitume dho ndirigoti sese dhó hesabu kʉ ná nja nrŭ dho ndima ngʉ pikpa ndirigoti kuhani ra nǎ d’e. (Ufu. 5:10; 14:1) Ri kʉ aro (2) kʉ ná fø koddo le nji dho ná ché na le d’ri ná kpa * kana ro ma go dz’ djó ná kpa dhé ka ndima nyo mukati ndirigoti ndima jø divai ukumbusho dhi ngana ri.

5. Ché na le d’ri na kpa ká chu addu ndima kʉ na ná ngab’odha djo?

⁵ Ché na le d’ri ná kpa nanga adi jini ndima si Ukumbusho na dho ná nja lo ki kʉ: Fø ga kpa si nari adi rili kpa ddinga ndima dhó ngab’odha djo. Yova bbʉ bblo pli kʉ ná ngab’odha kpa dho, “kpa é nzɨ dhedhe ndirigoti nzɨ sani sa ná shinga na ra nǎ. Kpa si pinyo ddinga Yesu ma, 144 000 kʉ ná kpa kana go gʉ ma dz’ djó ná kpa ma na ndirigoti føri djolu pli, kpa si tøni Yova Mungu njí! (1 Ko. 15:51-53; 1 Yoh. 3:2) Ché na le d’ri ná kpa churi chu nari kʉ ndima nzini ndiro ndima njí nja kʉ ná pendeleo hwè ra nǎ d’e. Ndiro kpa tso uni ra nǎ nga dho d’e, kpadho ringani ndima tøni chí kpø dhe djo. (2 Ti. 4:7, 8) Kpa kʉ ra nǎ ngab’odha na ná føri adi hwè bbʉ bbo kpa dho. (Tit. 2:13) Nde “nja chembø” dhó lo ká kʉ ngbaribbai? (Yoh. 10:16) Kpa adi si Ukumbusho na dho ná njari ká kʉ ngba lo?

6. Krʉ kʉ ná cho ró ká nja kʉ ná chembø adi si Ukumbusho dhi ngana addudho?

⁶ Nja chembø adi si Ukumbusho na nja ndima rr lo, nga ndima nyo mukati inga ndima jø divai ri. Dz’ djó ngab’odha na kʉ ná nrŭ nzingʉeni ya kwanza 1938 na ndiro ndima si Ukumbusho dho d’e. Bi 3, ddo 1, 1938 nǎ Dzamu dhi Munara pongʉeri: “Ri sie bblo pli [nja kʉ ná chembø] dho ndima si fø di ná njudha dhi ngana ndirigoti ndima nja addu ma njini fø ga nari. . . . Ri ka ndi sie hwè dhi saa maddi kpa dho.” Ddiddi ndoa dho nzini ná nrŭ e hwè na fø ga si da nalo dho nari bbai, nja kʉ ná chembø e hwè na ndima nja Ukumbusho dhi ngana si da nalo.

7. Nja chembø ká adi krr Ukumbusho dhi hotuba da ná saa na addudho?

⁷ Nja kʉ ná chembø adi ngaddi bbo ndima dhó ngab’odha djo. Kpa adi rine Ukumbusho dhi hotuba da ná saa na ndima di krr ndiro ndima rr Yesu ma, 144 000  kʉ ná kpa ma na si nji cho elfu ddi kana ndima dhó Pidhinga tsena chí tøni ná nrŭ dho nalo d’e. Yesu Kristo dhó Pidhinga tsena, ra nǎ si ra Pi nyo ná kpa si dz’ djó nga ngʉ paradiso ndirigoti ni ngarr ná nrŭ si ngʉ kaka ná nrŭ. Ri kʉ bblo Ukumbusho dhi ngana si ná mamilioni kʉ ná nrŭ dho ndima ddinga Biblia nǎ gosi njini ná unabi djo. Fø unabi ro bani Isaya 35:5, 6; 65:21-23; ndirigoti Ufunuo 21:3, 4 nǎ. Kpa di ndima mbu ø dz’ djó kʉ ná naribbai ndima ró ji ndima ji ná nrŭ ma na ró, kpadhó ngab’odha adi ngʉ kpakpa ndirigoti kpa nzɨ adi Yova dho ndima njínji nari tso ro bbari.​—Mt. 24:13; Gal. 6:9.

8. Ukumbusho dhi ngana ká nja kʉ ná chembø adi si nja ngba lo dho?

⁸ Akonja nja kʉ ná chembø adi si Ukumbusho na dho ná nja lo. Kpa adi riji ndima dho jidha ndirigoti ndima kó ché na le d’ri ná kpa tsotso. Mungu dzá lo d’rangʉeri nari kʉ ché na le d’ri ná kpa ma, dz’ djó ngab’odha na kʉ ná nrŭ ma na si njínji ddinga. Nde ngbaribbai? Akonja sese kʉ ná loroji.

9. Zekaria 8:23 ridho naribbai, nja kʉ ná chembø ká adi ndima mbu ngba ché na le d’ri ná kpa djo?

⁹ Azø Zekaria 8:23. I unabi nja kʉ ná chembø ká adi ndima mbu ngba ndima djoi ndirigoti ndima vei ché na le d’ri ná kpa djo nari dho. Le ripo “ddikpa Muyahudi” ndirigoti “ni,” ná føri na mana kʉ ddikpa kikundi. Føri kʉ ché ná le d’ri ná go gʉ ma shi dz’ djó ná kpa. (Ro. 2:28, 29) “Krʉ luga ti ná nrŭ tsɨ kana ro dre (10) kʉ ná kpetsikpa” na le dho nari kʉ nja chembø. Kpa “lø ke ró ru tso djǒ” nari na mana kʉ kpa gba ndima tso chí ndima tøni ro ché na le d’ri ná kpa na, nja ndima bbʉ tsetse ná ibada ddinga d’e. Ukumbusho dhi ngasdjo nja chembø adi si ndiri na ndima dhori ndima gba ndima tso ngba ché na le d’ri ná kpa na d’e.

10. Ezekieli 37:15-19, 24, 25 nǎ bani ná unabi njíni d’e, ká Yova njingʉe addu?

¹⁰ Azø Ezekieli 37:15-19, 24, 25. Ché na le d’ri na kpa ma, nja kʉ ná chembø ma na njínji ddinga na føri chulu Yova liri fø unabi njini nji. Fø unabi tilo aro kʉ ná tsú djo. Ngab’odha na kʉ ndima si di ra nǎ ná kpa le ddi “Yuda dhó” tsú na (Izraeli bbá pikpa le vʉngʉe nǎ ro ná bbu) ndirigoti ngab’odha na kʉ ndima si di dz’ djó ná nrŭ le ddi “Efraimu dhó” * tsú na. Yova ka ndi gbangʉe aro kʉ ná tsú tso ndiro ri ngʉ “ddikpa tsú” d’e. Føri na mana kʉ kpa njínji ddinga ndima dhó Pi Yesu Kristo dhó pidhinga tsena. Krʉ kʉ ná cho ro, ché na le d’ri ná kpa ma, nja chembø ma na adi ndima tso gbá ddikpa ngana Ukumbusho dho. Kpa adi ndima tso nju “ddikpa miya” bbai “ddikpa ke rø ndima ró ro.”​—Yoh. 10:16.

11. Matayo 25:31-36, 40 nǎ le tilo djo ná “chembø” ká Kristo djoi tsotso kó ngbaribbai?

¹¹ Azø Matayo 25:31-36, 40. I loroji nǎ, “chembø” le nzi nari kʉ chølo nji nga sini ná saa na ná nrŭ ndirigoti kpa kʉ ngab’odha na ndima si di dz’ djó, føri kʉ nja chembø. Kpa Kristo djoi gʉ ma ná kpa tsotso kó chí ndima tøni ro ndiro kpa nji bbo na mana kʉ ná lod’radha dhi njí dz’ djolu gble ndirigoti longaddidha dhi njí d’e.​—Mt. 24:14; 28:19, 20.

12-13. Nja chembø ká adi ndima Kristo djoi tsotso kó ni nari dho nja d’i ngba chu na?

¹² Ukumusho nji, nja chembø adi Kristo  djoi tsotso kó kapanye ndima nji nari na ndiro ngba nanga jini ná nrŭ si Ukumbusho dho d’e. (Anja kisanduku “ Atayarisha ni nzina Ukumbusho dho”) Kpa adi kpakpanga nji bbo ndiro krʉ kʉ ná ritsi e tayari Ukumbusho dho, nga ma ché na le d’ri ná ke e ndima dhó kutaniko nǎ ró. Nja chembø adi riji ndima kó Kristo djoi tsotso fø di na chu na. Fø chembø chu nari kʉ ndima nji ché na le d’ri ná kpa dho nalo Yesu adi nja ddiddi ndi nganga dho le nji naribbai.​—Mt. 25:37-40.

¹³ Kodhó ngab’odha e ko si di ra nǎ ma inga dz’ djó ma ró ko krʉ adi si Ukumbusho dhi ngana dho ná njari ká kʉ ngba lo?

14. Yova ma Yesu ma na ká dhongʉe bbo kʉ ná jidha ko dho ngbaribbai?

¹⁴ Ko adi mbai po Yova ma Yesu ma na dhongʉe ko dho ná jidha dho. Yova dhorie ndidzá jidha ko dho bí kʉ ná chulu, ro ddikpa kʉ ná chu dada nja kʉ ná chu krʉ djolu. Kodhi Mungu dhongʉe nga na dya kʉ ná jidha ndidzá bbo ndi ji ná Ngba ndi chongʉe ndi nzani ndirigoti ndi dhe ko djotsina nari chulu. (Yoh. 3:16) Ko chu ri nari kʉ Yesu maddi dhongʉe bbo kʉ ná jidha dhonalo ke ungʉe ndi tso ndiro ndi dhe ko djotsina d’e. (Yoh. 15:13) Yova ma Yesu ma na dhongʉe ko dho ná jidha kobe ro nzá ká ndi bbʉni ko dho ri. Ko ka ko po mbai krʉ ddo ro ko nji kodhó maisha nǎ nalo chulu. (Kol. 3:15) Ko si Ukumbusho na ná føri chulu ko kpa dhongʉe ko dho ná jidha ngano ndirigoti ko maddi mbai po kpa dho fø ko rinji nari chulu.

15. Ché na le d’ri ná kpa ma nja chembø ma na ká adi le ødha dhi be dhi kado nja bbo na mana kʉ ri addudho?

¹⁵ Le ødha dhi be dhi kado ko adi nja mana na bbo. (Mt. 20:28) Ché na le d’ri ná kpa adi le ødha dhi be nja mana na bbo, dhonalo føri liri kpa e bblo kʉ ná ngab’odha na. Yesu bbʉngʉe ndi nari djo kpa kʉ udha na nari dzá lo dho Yova nzi kpa chølo dhi kpa ndirigoti ndidzá nzø. (Ro. 5:1; 8:15-17, 23) Nja kʉ ná chembø ma adi le ødha dhi be nja mana na ddi. Kpa kʉ udha na Yesu bbʉ ndi nari djo nari dzá lo dho, kpa tøni Mungu nji tse ndima tse ro, kpa ka ndima nji takatifu kʉ ná njí ke dho ndirigoti kpa kʉ na ná ngab’odha kʉ ndima si dada “bbo kʉ ná mbudha lú.” (Ufu. 7:13-15) Ché na le d’ri ná kpa ma nja kʉ ná chembø ma na adi ridho ndima mbai po le ødha dhi be dho krʉ cho ró ndima si Ukumbusha dhi ngana nari chulu.

16. Ukumbusho dhi ngana ko adi si dho ná njari ká kʉ ngba lo?

¹⁶ Ukumbusho dhi ngana ko adi si dho ná njalo ki kʉ ko adi riji ko rrnga Yesu dho. Ko kʉ ngab’odha na gosi ná saa djo naribbai, ko adi riji ko rrnga Yesu dzá dhe nga nodha djo ke jangʉe ngasdjó ná i lo dho: “Anidi rinji fø ma nga nodha dho.”​—1 Ko. 11:23, 24.

17. Ukumbusho ká adi rili ko kana nga ngʉ chøchø Yova na ngbaribbai?

¹⁷ Ko kana nga adi ngʉ chøchø Yova na. (Yak. 4:8) Ko njae naribbai, Ukumbusho adi rili ko ddinga Yova bbʉngʉe ko dho ná ngab’odha djo, ndirigoti ko ddinga bbo ke dhongʉe ko dho ná jidha djo. (Yer. 29:11; 1 Yo. 4:8-10) Ko di  ngaddi kodhó bbʉbbʉ kʉ ná ngab’odha djo ndirigoti Mungu dho ko dho ná chí kʉ ná jidha djo ró, ko kʉ na Yova djo ná jidha ma, ko kana kau ma na adi ngʉ kpakpa ke na.​—Ro. 8:38, 39

18. Ko di ngaddi bbo Yesu dhó loroji djo nari ká ka ndi cho ko ronga ko nji addu?

¹⁸ Ri adi ko ronga cho ko dyø Yesu dhó loroji. (1 Pe. 2:21) Ukumbusho nji ko adi Biblia d’ra Yesu dhó ya mwisho Yenga ddo djo, kedhó dhe djo, ndirigoti kedhó gadha djo nalo zø. Føri goti, Ukumbusho dyi nǎ ngasdjó, hotuba adi Yesu kʉ na ko laidjo ná jidha ngano ko dho. (Efe. 5:2; 1 Yo. 3:16) Yesu bbʉngʉe ndi nari djo ko di lo zø, ndirigoti ko di ngaddi bbo ri djo ná saa na, ko adi kpakpanga ba ko “bbi ke bbingʉe nari bbai.”​—1 Yo. 2:6.

19. Mungu dhó jidha kana ká ko ka ko di ngbaribbai?

¹⁹ Ko vʉri ko di Mungu dhó jidha nǎ. (Yud. 20, 21) Ko adi di Mungu dhó jidha nǎ ko kpakpanga nji ko rrnga ke dho nari chulu, ko ke ró dho li ndi tsetse nari chulu, ndirigoti ko hwè bbʉ ke thí dho nari chulu. (Mez. 27:11; Mt. 6:9; 1 Yo. 5:3) Ukumbusho ko nji nari adi rili kodhó maisha nǎ krʉ ddo ro ko nji nalo di ridho Yova dho, ‘ma jiri ma di nidhó jidha kana theinga dho!’

20. Kodho ká ringani ko nji Ukumbusho addudho?

²⁰ Njati rie kodhó ngab’odha kʉ ko si di theinga dho ra nǎ ma inga dz’ djó ma ri ró, ko krʉ kʉ bblo kʉ ná sababu na ko nji ukumbusho. Krʉ cho ró ko adi ko tso nju ddinga fø ddo na, nja ko no bbo ko ji ná ke Yesu Kristo dhó dhe nga d’e. Føri djolu pli, ko adi bbo kʉ ná jidha ngano, Yova dhongʉe ko dho ná jidha, ndidzá ngba ndi bbʉngʉe ndiro ke e le ødha dhi be d’e. I cho nă, Ukumbusho si da ngasdjó Mbʉnji dyi, Bi 4, ddo 15, 2022 nǎ. Ko ji Yova ma ndidzá Ngba ma na, ná føri dho, Yesu dhó dhe nga ko si no ná dyi, ddikpa ritsi ro ma ngaddi sie mana na pli ko dho Ukumbusho djolu ri.