1-2. Kodhó maisha nǎ lo thika øni ná saa na, ká addudho Biblia nǎ nja lo nǎ mana ko adi famu bblo pli?

 NDOA kpetsi ke ma chi isɨle ma na ná dyi, kpa adi Biblia nǎ lo ró dyʉ ndi ná hotuba rr. Fø hotuba nǎ le loti djo nari ngae nzá kpa chu ná maandiko ri. Ro fø dyí nga djóro fø maandiko nǎ mana e bbo kpa dho. Ká addudho? Dhonalo kpa dhó maisha krʉ nǎ kpa si njínji ri na ndima dhó ndoa kana.

² Wakristo kʉ ná dza dhi ndrŭ ngʉ gø dhi ndrŭ ná saa na maddi rie fø. Loroji na, njaro cho bí kana kpa rr rie hotuba ro b’lo ngbaribbai ma le ka le ngu nzø nari djo. Ro kpadjo fø hotuba nǎ kʉ ná lo ka ndi si kpa dho ø, dhonalo kpadjo kpa ka ndima ddi longa ndima dhi ngba nganga dho. Føri kʉ bbo pli kʉ ná njí! Føri dho, kodhó maisha nǎ lo thika ro øni ná saa na, nja kʉ ná maandiko nǎ mana ko adi famu bblo pli. Ri kʉ fø lo dho Yova dhó njí dhi kpa adi Biblia zø ndirigoti kpa adi ngaddi ri djo “krʉ ddo ró” ndima dhó maisha nǎ ddiddi Waizraeli bbá pikpa dho le d’rangʉeri nari bbai.​—Kum. 17:19.

3. I lo nǎ ká ko si loti ngbá lo djo?

³ Gø dhi ndrŭ, nidhi nzø dho ni longaddi Yova djo nari kʉ bbo pli kʉ ná pendeleo. Ro ni adi riji ni njí nja lo maddi Yova djo ni longaddi kpa dho nari djolu. Ni adi riji ni kó nzø tsotso ndima ji ke bbo d’e. Nde ni ká ka ni njiri ngbǎ ndiro ni liri nidhi nzø ji Yova bbo d’e? I lo nǎ, ko si loti gø dhi ndrŭ ni tsotso ka ndi kó ná Biblia nǎ 4 kʉ ná kanuni (nzɨ thika leni ná bbʉbbʉ lo) djo. (2 Ti. 3:16) Ndirigoti ko si ngbaribbai ma, nja kʉ ná gø dhi ndrŭ bae faida fø kanuni na ndima njie njí ro nari nja.

4. Gø dhi ndrŭ tsotso ka ndi kó ná ya kwanza ri ká kʉ ngbá kanuni ndiro kpa liri ndima dhi nzø ji Yova ndima thí nǎ ro krʉ d’e? (Yakobo 1:5)

⁴ Kanuni ya 1: Anine Yova dhó chutso ddadha. Aninziri Yova bbʉ nidhó loji ná nyodyu ndiro ni kó nidhi nzø tsotso nzø ji ke d’e. (Azø Yakobo 1:5.) Ke kʉ bblo pli chu shauri bbʉdha ná ke. Ko ripo fø dho ná sababu kʉ bí. Akonja ri ro aro. Ya kwanza, Yova kʉ bbo pli chu lo ná muzazi. (Zb. 36:9) Ya pili, kedhó nyodyu dhi shauri nǎ ro le adi faida dhé ba krʉ ddo ró.​—Isa. 48:17.

5. (a) Yova dhó tengenezo ká adi ngbá ritsi bbʉ ndi kó gø dhi ndrŭ tsotso d’e? (b) Video nǎ le dhori nari bbai, ni ká ba ngbá somo ngbaribbai ma le-djo ma, le-ve Amorim ma na ngʉ ndima dhi nzø ngu nari nǎ ro?

⁵ Biblia ma, Yova dhó tengenezo ma na chulu Yova adi bí kʉ ná lo ja gø dhi ndrŭ dho ndiro kpa kó ndima dhi nzø tsotso ndiro nzø ji ndi d’e. (Mt. 24:45) Loroji na, ni ka ni ba bblo kʉ ná shauri anziro ngʉe ná Amuka! nǎ, ɨ djǒ ripo ná lo nǎ “Musaada kwa ajili ya Familia,” ndirigoti njʉ ni ka ni ba fø lo jw.org djó. Godhé, jw.org djó kʉ ná video ka ndi kó gø dhi ndrŭ tsotso nja ndima njinjí ri nǎ Yova bbʉ ná shauri na ndima dhi nzø ndima ngu nari kana. *​—Mez. 2:4-6.

6. Ddikpa dza ba ma, ndi bbá le ma na ká adi ndima mbu Yova dhó tengenezo chulu ndima ba ná chutso ddadha dho ngbaribbai?

⁶ Bí kʉ ná gø dhi ndrŭ pori nari kʉ ndima adi mbai po bbo Yova dho, kedhó tengenezo chulu ke bbʉ ndima tsotsokodha dho na ritsi dho. Ddikpa dza ba Joe pori ɨ: “Kodhó gbo kʉ ná nzø ko ngu bbʉbbʉ lo kana nari nga kʉ sʉsʉ ri. Ma bbá le ma na ko adi nganzi krʉ saa ró ndiro Yova kó ko tsotso d’e. Ndirigoti ko adi nja bí ina nari kʉ, ko tsotso ka ndi kó ná vichapo ma, video ma na adi si ndi nganga dhi saa na ndiro ko hwini ko bani na ná lo tso ró d’e. Krʉ saa ró, ko adi ko thí li Yova dhó chutso ddadha djo.” Joe ma, ndi bbá le ma na ra ri utso d’i nari kʉ, fø vichapo ma, video ma na adi rili ndima dhi nzø kana nga ngʉ chøchø Yova na.

7. Ká addudho ri kʉ bbo na mana kʉ ná lo gø dhi ndrŭ é bblo kʉ ná loroji ndima dhi nzø dho? (Waroma 2:21)

 ⁷ Kanuni ya 2: Aniddi longa nidhó loroji chulu. Nzø adi ndima dhó gø dhi ndrŭ nji ná lo nja chø ndirigoti nzø adi riji ndima dyø kpa. Bbʉbbʉ dhé, kaka ná gø dhi le ro nga kʉ ri. (Ro. 3:23) Nì mai ri kʉ fø ro, nyodyu na kʉ ná gø dhi ndrŭ adi kpakpanga nji ndiro ndima é bblo kʉ ná loroji ndima dhi nzø dho d’e. (Azø Waroma 2:21.) Ddikpa dza ba pori nzø djo ɨ: “Nzø kʉ ddiddi dda tso njú ndi na ná eponje bbai.” Ke pori ki: “Ko di njínji nzá ko ddi kpa dho ná lo nǎ ró, kpa ka ndima pori ko nga kʉ bblo loroji ri.” Følo dho njati ko jiri kodhi nzø ji Yova ró, ringani ko ji ke bbo pli ndirigoti ko ji ke ngbà nari njani nja.

8-9. Andrew ma, Emma ma na po ná lo nǎ ro ká ni ba ngbá somo?

⁸ Gø dhi ndrŭ ka ndima ddi longa ndima dhi nzø dho, nja ndima ji Yova d’e ná chu kʉ bí. Anja 17 dhó cho kʉ ná le-djo Andrew po ná ɨ lo: “Bí ina madzá gø dhi ndrŭ ngʉ adi ripo ma dho sala kʉ bbo na mana kʉ ná lo. Krʉ ngasdjo, rie b’lo ma ma njie sala ri ró, madzá baba ngʉ adi sala nji ma na godhé. Bí ina madzá gø dhi ngʉ adi ripo ma dho: ‘Ni ka ni tilo Yova na bí ina ndirigoti ni ji ná saa na.’ Fø lo dho ma njangʉe sala bbo na ma na kʉ ná lo. Ndirigoti kpadjo ri e sʉsʉ ma nji sala ndirigoti ma nja Yova jidha dhi Baba bbai.” Gø dhi ndrŭ aninonga nari kʉ, Yova ni ji nari ka ndi liri nidhi nzø ma ji ke ddi.

⁹ Akotilo Emma dhó loroji djo maddi. Le dzá baba bbangʉe le ma dhó familia ná saa na, ke bbangʉe deni bbo ledzá mama na. Emma pori ɨ: “Bí ina mbø badha ngʉe kpakpa mama dho, ro le ngʉ adi loti bí ina ngbaribbai ma Yova adi ndidhó njí dhi kpa tsotso kó ndirigoti kpa ronga b’o nari djo. Ma ngʉ adi ngbaribbai ma, le ngʉ adi njínji ndi u ná lo na nari njanja. Mama ngʉ adi njínji ma dho ndi ddi ná lo na maddi.” Somo kʉ, rie kpakpalo kana ma gø dhi ndrŭ kʉ ri ró, kpa ka ndima ddi longa ndima dhi nzø dho ndima dhó loroji chulu.​—Gal. 6:9.

10. Waizraeli bbá gø dhi ndrŭ ká ka ndima tielo ndima dhi nzø na Yova djo ngbá saa na? (Kumbukumbu la Torati 6:6, 7)

¹⁰ Kanuni ya 3: Anidi loti nidhi nzø ma na bí ina. Yova jangʉeri Waizraeli dho kpa di longaddi bí ina ndima dhi nzø dho ndi djo. (Azø Kumbukumbu la Torati 6:6, 7.) Fø gø dhi ndrŭ ngʉ adi lo ndima ka ndima ti ndima dhi nzø na ndirigoti ndima kó kpa tsotso kpa ji Yova ndima thí nǎ ro krʉ ná chu ba krʉ ddo ró. Loroji na, Waizraeli bbá kpetsi ngba ka ndi koe ndidzá baba tsotso nyo zʉdha na ndirigoti nyo tso njudha na. Føri goti singbangba ka ndi koe ndidzá mama tsotso ru nanga rodha na ma, ru dyadha na ma ndirigoti abba njí na ma. Gø dhi ndrŭ ma ngʉ adi njínji ddinga nzø ma na nari dho, kpa ka ndima tielo bbo na mana kʉ ná bí kʉ ná lo djo. Loroji na, kpa ka ndima tielo Yova njie ndima dho ná bblonga djo ndirigoti ngbaribbai ma ke ndima dhó familia tsotso kó nari djo.

11. Njʉ ká gø dhi ndrŭ ka ndima tilo ndima dhi nzø na ngbá saa na?

¹¹ I ddo ró nga lo e anziro ringʉe nari bbai ri. Njʉ bí kʉ ná ngø nǎ, gø dhi ndrŭ nzɨ adi saa ba dyíná ndima di nzø na ri, dhonalo kpa adi ra njí dhi ngana ndirigoti nzø adi ra darasa na. Føri dho gø dhi ndrŭ dho ri adi ngani ndima né ndima dhi nzø na ndima ka ndima tilo ná saa. (Efe. 5:15, 16; Flp. 1:10) Føri kʉ ibada ya familia  dhi saa ro na mai. Le-djo Alexander pori ɨ: “Madzá baba adi saa kpe bí ina ibada ya familia dho ndirigoti ke adi rili nzɨ ddikpa lo ma cho ddingana ko njuni nari tso ro ddi. B’lo ko ne Biblia nǎ longa nari goti, ko adi lo ro ti ddinga ke ma na.”

12. Ibada ya familia dhi saa na ká dzá ba dho ringani ndi no ngbá longa?

¹² Njati rie dza ba ni kʉ ri ró, ni ká ka ni njiri ngbǎ ndiro ibada ya familia bbʉ hwè nidzá nzø dho d’e? Ni ka ni jifunza buku Anji Maisha Hwè Theinga dho! nzø ma na. Fø buku chulu ri kʉ sʉsʉ le tilo ndrŭ na. Ni jiri nidzá nzø d’ra ndima dhó ngaddidha ni dho ró, ibada ya familia dhi saa na nzɨ mburi ni ó kpa na inga ni bbʉ malipizi kpa dho. Nzɨ bbari ni nanga kani, njati nja saa na kpa po ná lo gbani Biblia po ná lo na nzá ma ró. Føri rɨngana, adi mbai po kpa ndima dhó ngaddidha d’ra nga nǎ kali ro nari dho ndirigoti ali kpa kpakpa ndiro ri é sʉsʉ kpa dho kpa tilo ndima ddi ná lo djo d’e. Ni ka ni kó nidzá nzø tsotso bblo njati ni chu ngbaribbai ma kpa ndima mbu nari bblo ró.

13. Gø dhi ndrŭ ka ndima kó ndima dhi nzø tsotso ndima kana nga ngʉ chøchø Yova na ná nja ri ká kʉ ngbá saa?

¹³ Gø dhi ndrŭ, anine nidhi nzø tsotso ni ka ni kó ná saa ndiro kpa kana nga ngʉ chøchø Yova na d’e. Ri nzá ngani ni b’o Biblia nǎ longanedha dhi saa dhé ndiro ni ddi longa nidhi nzø dho Mungu djo d’e ri. Akonja Lisa po ná lo, le pori ɨ: “Nononi ná ritsi krʉ chulu ko ngʉ adi longaddi kodhi nzø dho Yova djo. Loroji na, kodhó tsɨ (imbwa) njí gbo ka ndi tá kodhó nzø na ná lo ná saa na, ko ngʉ adi ripo kpa dho, fø lo ridho Yova kʉ hwè dhi Mungu ndirigoti ke adi riji ko ma é hwè na ddi.”

14. Ká addudho ri kʉ mana dhi lo, gø dhi ndrŭ kó ndima dhi nzø tsotso ndiro nzø vʉ bbakau nyodyu na d’e? (Mezali 13:20)

¹⁴ Kanuni ya 4: Aniko nidhi nzø tsotso kpa ba bblo bbakau d’e. Mungu dzá lo ripo nari kʉ kodhó bbakau ka ndima liri kodhó nyi é che inga bblo. (Azø Mezali 13:20.) Gø dhi ndrŭ, ni ká chu nidhi nzø dhó bbakau ngbà? Ni ro ká adi njú kpa na ni ndiro ni ba saa ni di kpa ma na ddinga d’e? Ni ká ka ni njiri ngbǎ ndiro nidhi nzø  ba kau ngbà ji Yova ná ndrŭ kana d’e? (1 Ko. 15:33) Ni ka ni kó nidhi nzø tsotso nzø ba bblo kʉ ná bbakau, bblo dhó kiroho kʉ ná ndrŭ ni nzi ndiro ni njinjí ddinga kpa ma na d’e nari chulu.​—Zb. 119:63.

15. Gø dhi ndrŭ ká ka ndima njiri ngbǎ ndiro ndima dhi nzø ba bblo kʉ ná bbakau d’e?

¹⁵ Akonja Tony ró dho kʉ ná ddikpa dza ba bangʉeni na ná lo. Ke d’ra ngbaribbai ma, ndi bbá le ma na ndima kongʉe ndima dhi nzø tsotso ndiro nzø vʉ bblo kʉ ná bbakau d’e nari. Ke pori: “Cho bí kana, ma bbá le ma na, ko ngʉ adi njonjo dhó cho kʉ ná le-djoi ma, le-vei ma na nzi ko bba. Ko ngʉ adi nganyo ndirigoti ko ngʉ adi ibada ya familia nji kpa ma na ddinga. Føri kʉ bblo kʉ ná chu ndiro ko chu ngbà ji Yova ndirigoti ni njínji ke dho hwè na ná ndrŭ d’e. Ko bangʉe ledha bbo ko ngʉ adi wangalizi ma, wamisionere ma ndirigoti njonjo kʉ ná le-djoi ma, le-vei ma na nzǐ ko bba nari dho. Kpa chu ná lo ma, kpadhó bidii ma, kpa bbʉ ndima Yova dzá njí dho nari ma na kongʉe kodhi nzø tsotso ndima kana nga ngʉ chøchø Yova na d’e.” Gø dhi ndrŭ, aniko nidhi nzø tsotso ndiro kpa ba bblo kʉ ná bbakau d’e.

16. Ni ká ka ni njiri ngbǎ njati ddikpa ngba gʉ Yova dho ndi njínji nari gʉ ró?

¹⁶ Ni ká ka ni njiri ngbǎ njati rie ngbà ni nji krʉ ni ka ni njí ná kpakpanga, ro nidhó nzø kana ddikpa ngba gʉ Yova dho ndi njínji nari gʉ ró? Nzɨ ni pori nari kʉ ni nzani pá. Yova bbʉ lonangavʉdha dhi kado ko krʉ dho, føri tsu ndi nǎ nidhi nzø maddi, føri kʉ ko krʉ vʉri ko ká njínji Yova dho, inga nzi ma nari. Njati nidzá ngba vʉri ndi bba Yova bbá ró, ddikpa cha fø ngba si ndidhó lo thika thɨ nì dhé nari djo ni kʉ na ná ngab’odha nzɨ vi. Ano vi vingʉe ná ngba dhó loroji nga. (Lu. 15:11-19, 22-24) Fø jadda ke njingʉe bí kʉ ná chelo, ro mwisho ke ngʉngʉe ngʉ dhé ndima bba. Nja ke ka ndi pori “Føri ngʉe ddikpa loroji dhé. Fø di ná lo ká ka ndi njini bbʉbbʉ ledhó maisha nǎ?” Bbʉbbʉ o! Ddikpa jadda ke Elie ma bangʉeni fø di ná lo na ddi.

17. Elie dhó loroji ká li ni kpakpa ngbaribbai?

 ¹⁷ Elie pori ɨ ndidzá gø dhi ndrŭ djo: “Madzá gø dhi ndrŭ njingʉe krʉ ndima ka ndima nji ná lo ndiro ma ji Yova ndirigoti kedzá lo Biblia d’e. Nì mai ri kʉ føro, cho 15 ma ngʉe ná saa na, ma tsangʉe tsa.” Ma ngʉ adi chelo nji nga tselu, ro madzá gø dhi ndrŭ ngʉ adi ma tsotso kó ndiro ma kana nga ngʉ chøchø Yova na d’e, ro ma nzɨ ngʉ adi kpa po ná lo rr ri. Luti ke rangʉe ra ndima bbá ro ndirigoti kedhó nyi ngʉngʉe che bbo. Ro nì mai ri kʉ føro, ddikpa saa na ke ngangʉe Biblia nǎ lotidha tso ndidhó ddikpa kau na. Elie pori: “Bbo ma loti madhó kau na Yova djo nari ngʉ adi rili, ma ddinga bbo Yova djo. Bbʉbbʉ dhé, madzá gø dhi ndrŭ zʉngʉe ná bbʉbbʉlo kpa vengʉe di tsu ma thí na ndirigoti ri ngangʉe dhi ndi dhi nari tso dzodzo.” Mwisho djó, Elie vengʉe ngʉngʉ bbʉbbʉlo kana. * Addinga ngbaribbai ma kedhó gø dhi ndrŭ nanga jingʉeni ndima ddingʉe longa ndima dhi ngba dho jadda nga nǎ ro ke ji Yova d’e nari djo!​—2 Ti. 3:14, 15.

18. Ni ká adi ni mbu ngbaribbai bbo kpakpanga nji ndima ddi longa ndima dhi nzø ji Yova d’e ná gø dhi ndrŭ djo?

¹⁸ Gø dhi ndrŭ, nidhó bbʉni nari kʉ bblo pli kʉ ná pendeleo, føri kʉ ni ddi longa nidhi nzø dho ndiro kpa ngʉ Yova dho njínji ná ndrŭ d’e. (Zb. 78:4-6) Føri nga kʉ sʉsʉ kʉ ná njí ri, fø lo dho ko ni má bbo ni kpakpanga nji ni kó nidhi nzø tsotso nari dho! Njati ni njí krʉ ni ka ni njí ná kpakpanga ni kó nidhi nzø tsotso ndima ji Yova ndirigoti ni ddi longa kpa rrnga ke dho ró, ni ka ni uri u nari kʉ kodhi ra nǎ ji dhi Baba sie hwè na.​—Efe. 6:4.